സ്വർണവില കുതിച്ചു, ഈ മാസത്തെ ഉയർന്ന നിരക്കിൽ, വരും ദിവസങ്ങളിൽ വീണ്ടും വില കൂടുമോ..?

സ്വർണം എന്നാൽ മലയാളികൾക്ക് ഒരു വികാരമാണ് അല്ലേ. എല്ലാ നല്ല ദിവസങ്ങളിലും സ്വർണാഭരണങ്ങളണിഞ്ഞ് കൂടുതൽ സുന്ദരിയാകാനാണ് സ്ത്രീകൾ ആഗ്രഹിക്കുന്നത്. എന്നാൽ സ്വർണത്തിന് വില കേൾക്കുമ്പോൾ എല്ലാവരുടേയും ചങ്ക് ഒന്ന് പിടയ്ക്കും. കാരണം വേറെ ഒന്നുമല്ല, മുകളിലേക്ക് കുതിച്ചുയരുന്ന സ്വർണവിലയാണ്. കഴിഞ്ഞ നാല് വർഷത്തിനിടെ 25,000 രൂപയോളമാണ് ഒരു പവൻ സ്വർണത്തിന് കൂടിയത്.

ഇന്നത്തെ സ്വർണവില

പവന് 53,280 രൂപ എന്ന നിരക്കിലായിരുന്നു സംസ്ഥാനത്ത് ഇന്നലെ സ്വർണവ്യാപാരം നടന്നത്. എന്നാൽ വ്യാഴാഴ്ച സ്വർണവില കുതിച്ചുയർന്നു. 540 രൂപയാണ് 24 മണിക്കൂറിനിടെ ഒരു പവൻ സ്വർണത്തിന് കൂടിയത്. അതോടെ വില 53,840 രൂപയിലേക്കെത്തി. 6730 രൂപയാണ് ഒരു ഗ്രാമിന്‍റെ വില.

ജൂൺ മാസം സ്വർണത്തിന് രേഖപ്പെടുത്തുന്ന ഏറ്റവും ഉയർന്ന വിലയാണ് ഇന്നത്തേത്.

ജൂണിലെ സ്വർണവില ഒറ്റനോട്ടത്തിൽ

ജൂൺ 1 - ഒരു പവന് സ്വർണത്തിന് 160 രൂപ കുറഞ്ഞു. വിപണി വില 53200 രൂപ

ജൂൺ 2 - സ്വർണവിലയിൽ മാറ്റമില്ല. വിപണി വില 53200 രൂപ

ജൂൺ 3 - ഒരു പവന് സ്വർണത്തിന് 320 രൂപ കുറഞ്ഞു. വിപണി വില 52880 രൂപ

ജൂൺ 4 - ഒരു പവന് സ്വർണത്തിന് 560 രൂപ ഉയർന്നു. വിപണി വില 53440 രൂപ.

ജൂൺ 5- ഒരു പവന് സ്വർണത്തിന് 160 രൂപ കുറഞ്ഞു. വിപണി വില 53280 രൂപ.

ഒരു പവൻ വാങ്ങാൻ 58,000 രൂപ നൽകണം

സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാള്‍മാര്‍ക്കിങ് നിരക്കുക ള്‍എന്നിവയെല്ലാം ചേര്‍ത്ത് വലിയൊരു തുക നൽകേണ്ടി വരും. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടിയാൽ ഇന്നത്തെ വിലയിൽ 1 പവൻ സ്വർണാഭരണം വാങ്ങുമ്പോൾ ഏകദേശം 58000 രൂപ നൽകേണ്ടി വരും.

ആഗോള സ്വർണ്ണവില

അന്താരാഷ്ട്ര തലത്തിൽ സ്വർണ്ണം വ്യാഴാഴ്ച്ച രാവിലെ നേട്ടത്തിലാണ് വ്യാപാരം നടത്തുന്നത്. ട്രോയ് ഔൺസിന് 12.55 ഡോളർ (0.53%) ഉയർന്ന് 2,367.66 ഡോളർ എന്നതാണ് നിലവാരം.

ഈ വർഷം വരാനിരിക്കുന്ന യു.എസ് പ്രസിഡന്റ് തെരഞ്ഞെടുപ്പ്, ഫെഡ് യോഗ തീരുമാനങ്ങൾ തുടങ്ങിയവ വരുന്ന മാസങ്ങളിൽ സ്വർണ്ണത്തിന്റെ ദിശ തീരുമാനിക്കുന്ന ഘടകങ്ങളായി മാറും. ആഗോള തലത്തിൽ ഒന്നിനു പുറകെ മറ്റൊന്നായി സംഘർഷ സാഹചര്യങ്ങൾ ഉണ്ടായിക്കൊണ്ടിരിക്കുന്നത് സ്വർണ്ണത്തിന്റെ ഡിമാൻഡ് നിലവിൽ ഉയർത്തി നിർത്തുന്ന പ്രധാന ഘടകമാണ്.

റെക്കോർഡ് വില മെയ് മാസം

സംസ്ഥാനത്തിന് ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയ മാസം മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില. മെയ് ഒന്നാം തിയ്യതി പവന് 52,440 രൂപയും, ഗ്രാമിന് 6,555 രൂപയുമായിരുന്നു വില. 31-ആം തീയ്യതി 53,360 രൂപയായിരുന്നു ഒരു പവൻ സ്വർണത്തിന്‍റെ വില. ഒന്നാം തീയ്യതിയിലെ വിലയുമായി താരതമ്യപ്പെടുത്തുമ്പോൾ 920 രൂപയുടെ വർധനവ്

4 വർഷം കൊണ്ട് കൂടിയത് 25,000 രൂപ

പവന്‍റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്റെ വില അരലക്ഷം രൂപയും കടന്നു.