എങ്ങോട്ടാണ് ഈ പോക്ക്.. സ്വര്‍ണ വില വീണ്ടും വര്‍ധിച്ചു; ഉത്തരം കിട്ടാതെ ആഭരണ പ്രേമികള്‍

സ്വര്‍ണം വാങ്ങാനിരിക്കുന്നവര്‍ക്ക് വില സംബന്ധിച്ച് ഒരുപിടിയുമില്ല. കയ്യിലൊതുങ്ങുന്ന വിലയിലെത്തുമെന്ന് കൊതിപ്പിച്ച് സ്വര്‍ണ വില കടന്നു കളയുകയാണ്. രണ്ട് ദിവസത്തെ ഇടവേളയ്ക്ക് ശേഷം തിങ്കളാഴ്ച സ്വര്‍ണ വില തിങ്കളാഴ്ച വീണ്ടും വര്‍ധിക്കുകയാണ്.

പവന് 80 രൂപയാണ് തിങ്കളാഴ്ച വര്‍ധിച്ചത്. പവന് 45,920 രൂപയിലാണ് ഇന്നത്തെ വില. ഗ്രാമിന് 10 രൂപ വര്‍ധിച്ച് 5,740 രൂപയിലാണ് ഇന്നത്തെ വ്യാപാരം. ശനിയാഴ്ച പവന് 360 രൂപ ഇടിഞ്ഞിരുന്നു. ഞായറാഴ്ചയിൽ ഇതേ വില തുടർന്ന ശേഷമാണ് ഇന്നത്തെ വില വർധനവ്.

ആ​ഗോള വിപണിയിൽ

സ്വർണ വില അമേരിക്കൻ വിപണിയിൽ നേട്ടമുണ്ടാക്കുന്നുണ്ട്. വെള്ളിയാഴ്ച 2,019.7 ഡോളറിലാണ് വ്യാപാരം അവസാനിപ്പിച്ചത്. തിങ്കളാഴ്ച രാവിലെ വ്യാപരത്തിൽ സ്പോട്ട് ​ഗോൾഡ് 0.16 ശതമാനം ഉയർന്ന് ഔൺസിന് 2,022.92ഡോളറിലാണ് വ്യാപാരം നടക്കുന്നത്. കഴിഞ്ഞ ആഴ്‌ചയിലെ യുഎസ് പണനയ യോ​ഗ തീരുമാനത്തിന് ശേഷം ഫെഡറൽ റിസർവിന്റെ പലിശ നിരക്ക് പാതയെക്കുറിച്ച് കൂടുതൽ വ്യക്തത ലഭിക്കുന്ന യുഎസ് പണപ്പെരുപ്പ ഡാറ്റയ്ക്കുള്ള കാത്തിരിപ്പിലാണ് വിപണി.

ഫെഡറൽ കഴിഞ്ഞ ആഴ്‌ച പലിശ നിരക്കുകൾ സ്ഥിരമായി നിലനിർത്തുകയും കഴിഞ്ഞ രണ്ട് വർഷമായി തുടരുന്ന പലിശ നിരക്ക് കർശനമാക്കൽ അവസാനിച്ചിരിക്കുകയാണെന്നും 2024 ൽ പലിശ നിരക്ക് കുറയ്ക്കുമെന്നുമുള്ള സൂചന നൽകിയതിന് പിന്നാലെ സ്വർണം ആഴ്ചയിൽ നേട്ടമുണ്ടാക്കിയിരുന്നു. 0.8 ശതമാനത്തിന്റെ പ്രതിവാര നേട്ടമാണ് സ്വർണ വിലയിലുണ്ടായത്.

അതേസമയം ന്യൂയോർക്ക് ഫെഡ് പ്രസിഡന്റ് ജോൺ വില്യംസിന്റെ പ്രസ്താവന നിക്ഷേപകർക്ക് ആശങ്കയുണ്ടാക്കുന്നതാണ്. ഫെഡറൽ റിസർവ് പലിശ നിരക്ക് കുറയ്ക്കുന്നതിനെക്കുറിച്ചല്ല സംസാരിക്കുന്നതെന്നും ഈ തീരുമാനം അകാലമാണെന്നും അദ്ദേഹം പറഞ്ഞു. പലിശ നിരക്കുകൾ കുറയ്ക്കുന്നത് ഡോളറിനെയും ബോണ്ട് യീൽഡിനെയും അനാകർഷകമാക്കും. ഇത് സ്വർണത്തിനുള്ള ആവശ്യകത വർധിപ്പിക്കുകയും വില ഉയർത്തുകയും ചെയ്യും.

സ്വർണ വില എങ്ങോട്ട്

കഴിഞ്ഞ വാരം വലിയ ചാഞ്ചാട്ടമാണ് സ്വർണ വിലയിലുണ്ടായത്. സ്വർണ വില കുറഞ്ഞ് തുടങ്ങിയ ശേഷം ഒറ്റ ദിവസം കൊണ്ട് 800 രൂപ വർധിക്കുന്ന സാഹചര്യമുണ്ടായി. എന്നാൽ ഇതിന് പിന്നാലെ സ്വർണ വില ഇടിയുകയും ചെയ്യും.

പവന് 160 രൂപ കുറഞ്ഞ് 45,560 രൂപയിലാണ് ഡിസംബര്‍ 11 ന് സ്വര്‍ണം വ്യാപാരം ആരംഭിച്ചത്. ചൊവ്വാഴ്ചയും 160 രൂപ കുറഞ്ഞ് 45,400 രൂപയിലേക്ക് ഒരു പവന്റെ വിലയെത്തി. ബുധനാഴ്ച 80 രൂപ കുറഞ്ഞ് 45,320 രൂപയിലായിരുന്നു സ്വര്‍ണ വില. മാസത്തിലെ താഴ്ന്ന നിലവാരമാണിത്.

ഇവിടെ നിന്ന് വ്യാഴം, വെള്ളി ദിവസങ്ങളിലായി 880 രൂപ സ്വര്‍ണ വിലയില്‍ വര്‍ധനവുണ്ടായി. വ്യാഴാഴ്ച 800 രൂപ വര്‍ധിച്ച് 46,120 രൂപയിലേക്കും വെള്ളിയാഴ്ച 80 രൂപ വര്‍ധിച്ച് 46,200 രൂപയിലേക്കും സ്വര്‍ണ വില എത്തി. എന്നാൽ ശനിയാഴ്ച 320 രൂപ കുറഞ്ഞതോടെ വാരാന്ത്യത്തില്‍ 45,840 രൂപയിലാണ് സ്വർണം വ്യാപാരം അവസാനിച്ചത്. ഇത് കഴിഞ്ഞാഴ്ചയിലെ വർധനവ് 280 രൂപ മാത്രമാക്കി ചുരുക്കി.