സ്വർണവില മുകളിലേക്ക് തന്നെ, പവന് ഇന്ന് കൂടിയത് 160 രൂപ, വില വർധനവ് നേട്ടമാക്കാനും വഴിയുണ്ട്

ഒരു തരി പൊന്നെങ്കിലും അണിയണമെന്ന് ആഗ്രഹമില്ലാത്ത സ്ത്രീകൾ വളരെ കുറവായിരിക്കും. ആഘോഷ വേളകളിലെല്ലാം സ്വർണാഭരണങ്ങളണിഞ്ഞ് സുന്ദരിയായി പ്രത്യക്ഷപ്പെടാനാണ് ഭൂരിപക്ഷം സ്ത്രീകളും ആഗ്രഹിക്കുന്നത്. എന്നാൽ സ്വർണത്തിന്‍റെ വില കേട്ടാൽ ഹൃദയം തകരുന്ന അവസ്ഥയാണ്. നിലവിലെ വിലയിൽ ഒരു തരി പൊന്ന് വാങ്ങണമെങ്കിൽ പതിനായിരങ്ങൾ നൽകേണ്ട അവസ്ഥായാണ്. വരും ദിവസങ്ങളിലും സ്വർണവിലയിൽ വർധനവുണ്ടായാൽ അത് ആഭരണപ്രേമികൾക്കുണ്ടാക്കുന്ന ആശങ്ക ചില്ലറയായിരിക്കില്ല.

ഇന്നത്തെ സ്വർണവില

പവന് 52,680 രൂപ എന്ന നിരക്കിലായിരുന്നു സംസ്ഥാനത്ത് ഇന്നലെ സ്വർണവ്യാപാരം നടന്നത്. ഗ്രാമിന് 6585 രൂപ. എന്നാൽ ഇന്ന് വിലയിൽ നേരിയ വർധനവുണ്ട്. പവന് 160 രൂപയാണ് തിങ്കളാഴ്ച വർധിച്ചത്. അതോടെ സ്വർണവില 52,840 രൂപയിലേക്കെത്തി. ഗ്രാമിന് 6,605 രൂപ.

ഒരു പവൻ വാങ്ങാൻ എത്ര നൽകണം..?

സ്വർണവില വർധിച്ച സാഹചര്യത്തിൽ ആഭരണം വാങ്ങുമ്പോഴും ആനുപാതികമായ വർധനവുണ്ടാകും. കാരണം സ്വർണാഭരണം വാങ്ങുമ്പോൾ പവന്‍റെ വിലയ്ക്കൊപ്പം പണിക്കൂലിയും ജിഎസ്ടിയും നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടിയാൽ 1 പവൻ സ്വർണാഭരണം വാങ്ങുമ്പോൾ ഏകദേശം 57,500 രൂപയ്ക്ക് മുകളിൽ നൽകേണ്ടി വരും.

ആഗോള സ്വർണവില

അന്താരാഷ്ട്ര തലത്തിൽ സ്വർണ്ണവ്യാപാരം, തിങ്കളാഴ്ച്ച രാവിലെ നേട്ടത്തിലാണ് നടക്കുന്നത്. ട്രോയ് ഔൺസിന് 16.14 ഡോളർ (0.70%) ഉയർന്ന് 2310.03 ഡോളർ എന്നതാണ് നിലവാരം.

അഡ്വാൻസ് ബുക്കിം​ഗാണ് നല്ലത്

സ്വർണവിലയിലെ ചാഞ്ചാട്ടം തുടരുന്ന സാഹചര്യത്തിൽ വലിയ അളവിൽ സ്വർണം വാങ്ങാൻ ഉദ്ദേശിക്കുന്നവർ അഡ്വാൻസ് ബുക്കിം​ഗ് നടത്തുന്നതാണ് നല്ലത്. ഇന്നത്തെ കുറഞ്ഞ വിലയിൽ സ്വർണം ബുക്ക് ചെയ്യാനും ആവശ്യ വില ഉയർന്നാൽ കുറഞ്ഞ വിലയിൽ വാങ്ങാനും അഡ്വാൻസ് ബുക്കിം​ഗ് ഉപകരിക്കും. അതുവഴി സ്വർണവില ഉയരുമ്പോഴുള്ള സാമ്പത്തിക നഷ്ടം ഒഴിവാക്കാം.

മെയ് മാസത്തെ സ്വർണവില

മെയ് 1 - ഒരു പവന് സ്വർണത്തിന് 800 രൂപ കുറഞ്ഞു. വിപണി വില 52440 രൂപ
മെയ് 2 - ഒരു പവന് സ്വർണത്തിന് 560 രൂപ ഉയർന്നു. വിപണി വില 53000 രൂപ
മെയ് 3 - ഒരു പവന് സ്വർണത്തിന് 400 രൂപ കുറഞ്ഞു. വിപണി വില 52600 രൂപ
മെയ് 4 - ഒരു പവന് സ്വർണത്തിന് 80 രൂപ ഉയർന്നു. വിപണി വില 52680 രൂപ

 

റെക്കോർഡ് വില ഏപ്രിൽ മാസം

സ്വർണത്തിന് ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയത് കഴിഞ്ഞ മാസമാണ്. ഏപ്രിൽ 19- വെള്ളിയാഴ്ച രേഖപ്പെടുത്തിയ 54,520 രൂപയാണ് പവന്‍റെ ചരിത്രത്തിലെ ഏറ്റവും ഉയർന്ന വില. ഗ്രാമിന് 6815 രൂപയായിരുന്നു അന്ന് വില. ഏപ്രിൽ 20,21 തിയ്യതികളിലാണ് സംസ്ഥാനത്തെ രണ്ടാമത്തെ റെക്കോർഡ് ഉയരം സ്വർണ്ണവിലയിൽ രേഖപ്പെടുത്തിയിരിക്കുന്നത്. അന്ന് ഒരു പവൻ സ്വർണ്ണത്തിന് 54440 രൂപയും, ഗ്രാമിന് 6805 രൂപയുമായിരുന്നു വില.

വില വർധനവ് നേട്ടമാക്കാം

സ്വർണത്തിന്‍റെ വില വർധനവ് നേട്ടമാക്കാൻ ചില വഴികളുണ്ട്. അതിൽ ഏറ്റവും എളുപ്പമുള്ളത് സ്വർണം പണയം വെക്കുക എന്നതാണ്. പെട്ടെന്ന് തന്നെ ഉയർന്ന തുക കയ്യിൽ കിട്ടും. പണയം വെച്ച സ്വർണത്തിൻ്റെ ശുദ്ധതയും തൂക്കവും അടിസ്ഥാനമാക്കിയാണ് വായ്പയുടെ മൂല്യം നിശ്ചയിക്കുന്നത്. ഈ ലോണുകൾ സാധാരണഗതിയിൽ വേഗത്തിലുള്ള വിതരണവും, കുറഞ്ഞ ഡോക്യുമെൻ്റേഷൻ ആവശ്യകതകളും, സുരക്ഷിതമല്ലാത്ത ലോണുകളെ അപേക്ഷിച്ച് കുറഞ്ഞ പലിശ നിരക്കുകളും വാഗ്ദാനം ചെയ്യുന്നു.