തിരുവോണത്തിന് സ്വർണം അണിയാം, സ്വർണവിലയിൽ ഇന്നും മാറ്റമില്ല, വണ്ടി ജ്വല്ലറിയിലേക്ക് വിടുന്നോ..?

സംസ്ഥാനത്തെ സ്വർണവില വീണ്ടും നിശ്ചലമായിരിക്കുകയാണ്. കഴിഞ്ഞ നാലു ദിവസമായി പവന് 53,440 രൂപയിലും, ഗ്രാമിന് 6,680 രൂപയിലുമാണ് വ്യാപാരം പുരോഗമിക്കുന്നത്. ആഗോള സ്വർണവിലയിൽ കുറവുണ്ടാകുമ്പോഴും കേരളാ വിപണിയിൽ എന്ത് കൊണ്ട് മാറ്റം സംഭവിക്കുന്നില്ല എന്ന ചോദ്യം ഉയരുന്നുണ്ട്.

സെപ്തംബർ മാസത്തെ വില

53,560 ലാണ് സ്വര്‍ണം മാസം ആരംഭിച്ചത്. തൊട്ടടുത്ത ദിവസം വില മാസത്തെ ഏറ്റവും താഴ്ന്ന നിലവാരമായ 53,360 രൂപ രേഖപ്പെടുത്തി. തുടര്‍ന്നു നാലു ദിവസം അനങ്ങാതെ നിന്ന സ്വര്‍ണം, ആറിന് മാസത്തെ ഏറ്റവും ഉയര്‍ന്ന നിലവാരമായ 53,760 രൂപ രേഖപ്പെടുത്തി. ഏഴാം തീയതി വീണ്ടും 53,440 ലേയ്ക്ക് ഇടിയുകയായിരുന്നു. ഇന്നും ഇതേ വിലയില്‍ വ്യാപാരം പുരോഗമിക്കുന്നു.

ആഗോള സ്വർണവില

ആഗോള വിപണിയില്‍ സ്വര്‍ണവില തിരുത്തല്‍ തുടരുകയാണ്. നിലവില്‍ സ്വര്‍ണം ഔണ്‍സിന് 2,502.09 ഡോളറിലാണ് വ്യാപാരം പുരോഗമിക്കുന്നത്. 24 മണിക്കൂറിനിടെ ആഗോള സ്വര്‍ണ്ണവിയില്‍ 5 ഡോളറോളം കുറവുണ്ടായിട്ടുണ്ട്. കഴിഞ്ഞ 30 ദിവസത്തെ സ്വര്‍ണ്ണവിലയിലെ കയറ്റം 1.25 ശതമാനം (31.02 ഡോളര്‍) മാത്രമാണ്.

പവൻ വാങ്ങാൻ

സ്വർണവില മാറ്റമില്ലാതെ തുടരുന്ന സാഹചര്യത്തിൽ ഒരു പവൻ ആഭരണം വാങ്ങാൻ എത്ര രൂപ നൽകേണ്ടി വരും എന്ന് പരിശോധിക്കാം. സ്വർണാഭരണം വാങ്ങുമ്പോൾ പവന്റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 58,000 രൂപ നൽകേണ്ടി വരും.

വീട്ടിൽ സ്വർണ്ണം സൂക്ഷിക്കുന്നതിനുള്ള പരിധി

ഇന്ത്യാ ഗവൺമെൻ്റിൻ്റെ ആദായനികുതി ചട്ടങ്ങൾ പ്രകാരം, സ്വർണ്ണം വീട്ടിൽ സൂക്ഷിക്കുന്നതിന് ഒരു പരിധി നിശ്ചയിച്ചിട്ടുണ്ട്. എന്നാൽ ഈ പരിധി സ്ത്രീകൾക്കും പുരുഷന്മാർക്കും വ്യത്യസ്തമാണ്. മാത്രമല്ല, സെൻട്രൽ ബോർഡ് ഓഫ് ഡയറക്ട് ടാക്‌സസ് നിയമങ്ങൾ അനുസരിച്ച് ഒരു വ്യക്തിയുടെ കൈവശം എത്ര സ്വർണം ഉണ്ടെങ്കിലും അത് എങ്ങനെ ലഭിച്ചു എന്നതിൻ്റെ തെളിവ് കൂടി അയാളുടെ പക്കലുണ്ടാകണം.

സ്ത്രീകൾക്ക് എത്ര സ്വർണം സൂക്ഷിക്കാം..?

ആദായനികുതി നിയമപ്രകാരം വിവാഹിതരായ സ്ത്രീകൾക്ക് 500 ഗ്രാം സ്വർണം കൈവശം വയ്ക്കാം. അവിവാഹിതരായ സ്ത്രീകൾക്ക് ഈ പരിധി 250 ഗ്രാമായി നിലനിർത്തിയിട്ടുണ്ട്. അതേസമയം, പുരുഷന്മാർക്ക് 100 ഗ്രാം സ്വർണം മാത്രമേ സൂക്ഷിക്കാൻ അനുവാദമുള്ളൂ.

20 വർഷം കൂടിയത് അരലക്ഷം രൂപ

സംസ്ഥാനത്തിന്റെ ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയ മാസം 2024 മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില.

കഴിഞ്ഞ 2 പതിറ്റാണ്ടിനിടെ 50,000 രൂപയുടെ വർധനവാണ് സ്വർണ വിലയിലുണ്ടായത്. 2005 ഓക്ടോബർ മാസത്തെ പവന്റെ വില 5,040 രൂപയായിരുന്നു. മൂന്ന് വർഷങ്ങൾക്ക് ശേഷം 2008 ഒക്ടോബർ മാസം സ്വർണ വില 10,000 കടന്നു. 2010-ൽ വില 15,000 രൂപയും 2011 ഓഗസ്റ്റ് മാസത്തിൽ വില 20,000 രൂപയും കടന്നു.

പവന്റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്റെ വില അരലക്ഷം രൂപയും കടന്നു.