ആഭരണപ്രേമികൾക്ക്‌ ആശ്വാസവാർത്തയില്ല, വീണ്ടും കുതിച്ച് സ്വർണ്ണവില, ഈ മാസത്തെ ഏറ്റവും ഉയർന്ന നിരക്കിൽ

സ്വർണ്ണ വില റോക്കറ്റ് പോലെ കുതിക്കുകയാണ്. ഒക്ടോബർ മാസം ഒന്നാം തീയ്യതി 42080 രൂപായായിരുന്നു ഒരു പവൻ സ്വർണ്ണത്തിന്റെ വില. പിന്നീടുള്ള ദിവസങ്ങളിൽ അത് ഏറിയും കുറഞ്ഞും വന്നു. കഴിഞ്ഞ പന്ത്രണ്ടാം തീയ്യതിക്ക് ശേഷം സ്വർണ്ണത്തിന്റെ വില ഒരു തവണ മാത്രമാണ് കുറഞ്ഞത്. നാൽപ്പത്തിമുവ്വായിരവും കടന്ന് ഒരു പവൻ സ്വർണ്ണത്തിന്റെ വില ഇന്ന് നാൽപ്പത്തിഅയ്യായിരത്തിന് മുകളിലാണ്.

45120 രൂപയായിരുന്നു ഇന്നലെ ഒരു പവൻ സ്വർണ്ണത്തിന്റെ വില. അതായത് ഗ്രാമിന് 5,640 രൂപ. എന്നാൽ ഇന്ന് സ്വർണ്ണം ഗ്രാമിന് 20 രൂപയാണ് കൂടിയത്. അതായത് ഗ്രാമിന് 5,660 രൂപയും പവന് 45,280 രൂപയും. ഈ മാസത്തെ ഏറ്റവും ഉയർന്ന വിലയാണിത്. കഴിഞ്ഞ മാസത്തിലെ അവസാന ദിനങ്ങളുടെ തുടർച്ചയായി ഒക്ടോബറിന്റെ ആദ്യ ദിനങ്ങളിലും സ്വർണ വിലയില്‍ വലിയ ഇടിവായിരുന്നു രേഖപ്പെടുത്തിയത്.

ഒക്ടോബർ അഞ്ചാം തീയ്യതിയാണ് സ്വർണ്ണം ഈ മാസത്തെ ഏറ്റവും കുറഞ്ഞ നിരക്കിലെത്തിയത്. ഗ്രാമിന് 5,240 രൂപയും പവന് 41,920 രൂപയും. എന്നാൽ ആ വില 12 തീയ്യതിയാകുമ്പോഴേക്കും 43000ന് മുകളിലെത്തി. പവന് 1,120 രൂപയാണ് ശനിയാഴ്ച വര്‍ധിച്ചത്. അതോടെ സ്വർണ്ണ വില 44,320ലേക്കെത്തി.

ഇസ്രായേല്‍- ഹമാസ് യുദ്ധ സാഹചര്യത്തില്‍ സുരക്ഷിത നിക്ഷേപമെന്ന നിലയ്ക്ക് സ്വര്‍ണത്തിന് ആവശ്യക്കാര്‍ ഉയര്‍ന്നതാണ് വിലയിലുണ്ടായ കുതിപ്പിന് കാരണം. മുഴുവന്‍ സൈന്യത്തോടും ഗാസയിലേക്ക് എത്താന്‍ ഇസ്രായേല്‍ നിര്‍ദ്ദേശം നല്‍കിയതോടെ കരയുദ്ധത്തിനുള്ള സാധ്യതകളുയര്‍ന്നതാണ് സ്വര്‍ണം വാങ്ങി കൂട്ടുന്നതിന് കാരണമാണ്.

അതേ സമയം നവംബർ പകുതിയോടെ സ്വർണവില ​ഗ്രാമിന് 7000 രൂപ കടക്കാൻ സാധ്യതയുണ്ടെന്നാണ് വിപണി വിദഗ്ധർ പറയുന്നത്. നിലവിലെ വിപണി വിലയിൽ നിന്ന് ഏകദേശം 5000 രൂപ വർധിച്ച് പവന് 49000 രൂപക്ക് അടുത്തെത്തും. ​ഗ്രാമിന് 600 രൂപയുടെ വർധനവുണ്ടാകും. ആഗോളതലത്തിലും ആഭ്യന്തര വിപണിയിലും ബുളീയന് (നിക്ഷേപമെന്ന നിലയിൽ സ്വർണം വാങ്ങൽ) അനുകൂലമായ അന്തരീക്ഷം നിലനിൽക്കുന്നതിന്റെ പശ്ചാത്തലത്തിലാണ് സ്വർണത്തിന്റെയും വെള്ളിയുടെയും വില ഉയരുമെന്ന പ്രതീക്ഷയെന്ന് വിശകലന വിദഗ്ധർ പറഞ്ഞു. നിലവിൽ ബുളീയന് അനുയോജ്യമായ അന്തരീക്ഷമാണ്. യുദ്ധം, യുഎസ് ഫെഡറൽ റിസർവിൽ നിന്നുള്ള പ്രതികൂലാവസ്ഥ, സെൻട്രൽ ബാങ്കുകളുടെ ആവശ്യകത, ഫിസിക്കൽ ഡിമാൻഡ് വർധന എന്നിവയെല്ലാം സ്വർണ വിലയിൽ വർധനവിന് കാരണമാകുന്ന ഘടകങ്ങളാണെന്നാണ് വിലയിരുത്തൽ.

ഏറ്റവും സുരക്ഷിതമായ നിക്ഷേപങ്ങളിൽ ഒന്നു കൂടിയാണ് സ്വർണ്ണം. പക്ഷെ കൃത്യമായ സമയത്ത് കൃത്യമായ രീതിയിൽ നിക്ഷേപിച്ചാൽ മാത്രമേ സ്വർണ്ണ നിക്ഷേപം ലാഭം നൽകുകയുള്ളു.കാണാനും തൊടാനും കഴിയുന്ന നിക്ഷേപങ്ങളിലൊന്നും സ്വർണ്ണം തന്നെ. റിയൽ എസ്റ്റേറ്റ് പോലുള്ള നിക്ഷേപങ്ങളിൽ ആസ്തികൾ വാങ്ങുന്നതിന് നിരവധി ഘടങ്ങളുണ്ട്. എന്നാൽ സ്വർണ്ണം എളുപ്പം വാങ്ങാം. അതോടൊപ്പം ഡിജിറ്റലായി നിക്ഷേപം സൂക്ഷിക്കുമ്പോളുണ്ടാകുന്ന സുരക്ഷാ പ്രശ്നങ്ങളും സ്വർണ്ണത്തിനില്ല.

പ്രധാനപ്പെട്ട ഗുണം വളരെ വേഗത്തിൽ സ്വർണ്ണം പണമാക്കാൻ എന്നതാണ്. സോവറിൻ ഗോൾഡ് ബോണ്ടുകൾ ഒഴികെ സ്വർണ്ണ നിക്ഷേപങ്ങളിൽ ലോക്ക്-ഇൻ കാലയളവ് ഇല്ല. ഫിസിക്കൽ സ്വർണ്ണത്തിന്റെ കാര്യത്തിൽ വീണ്ടെടുക്കൽ തുക (സ്വർണ്ണം വിൽക്കുമ്പോൾ നിങ്ങൾക്ക് ലഭിക്കുന്ന തുക) സ്വർണ്ണത്തിന്റെ പരിശുദ്ധി, മൂല്യം, വിപണി വില മുതലായവയെ ആശ്രയിച്ചിരിക്കും. നമുക്ക് ആവശ്യമുള്ള സമയത്ത് സ്വർണ്ണത്തിന്മേൽ വായ്പയെടുക്കാനും സാധിക്കും.അതായത് ശരീര സൗന്ദര്യത്തിനുള്ള ഒരു വസ്തു മാത്രമല്ല സ്വർണം. ഏറ്റവും സുരക്ഷിതവും എളുപ്പവുമായ നിക്ഷേപ മാർഗ്ഗമാണ്.