100 വയസ് വരെ 1.60 ലക്ഷം രൂപ വാർഷിക വരുമാനം നേടാം; ദിവസം കരുതേണ്ടത് 219 രൂപ മാത്രം

വിരമിക്കലിന് ശേഷമോ മുൻപോ നല്ലൊരു തുക സ്ഥിര വരുമാനം ആ​ഗ്രഹിക്കുന്നവരാണെങ്കിൽ തിരഞ്ഞെടുക്കാവുന്നൊരു നിക്ഷേപമാണ് എൽഐസി ജീവൻ ഉമാം​ഗ്. 100 വർഷകാലം പോളിസി ഉടമയ്ക്ക് ഇൻഷൂറൻസും വരുമാനവും നൽകുന്നൊരു പോളിസായാണിത്. 100 വർഷം പോളിസി കാലയളവുള്ള ഒരു മുഴുവൻ സമയ ലൈഫ് ഇൻഷൂറൻസ് പ്ലാനാണ് എൽഐസി ജീവൻ ഉമാം​ഗ്. നോൺ- ലിങ്ക്ഡ്, പാർട്ടിസിപേറ്റിം​ഗ് വ്യക്തി​ഗത ഇൻഷൂറൻസ് പ്ലാനിൽ കുടുംബത്തിന് സാമ്പത്തിക ഭദ്രതയും സ്ഥിര വരുമാനവും ഉറപ്പു വരുത്തുന്നു. വിശദാംശങ്ങൾ നോക്കാം.

പ്രായ പരിധി

90 ദിവസം പ്രായമുള്ള കുഞ്ഞിന് മുതൽ 55 വയസ് വരെ ഏതൊരാൾക്കും പോളിസിയിൽ ചേരാം. 100 വർഷത്തെ കവറേജാണ് പോളിസി നൽകുന്നത്. അതായത് 35 വയസില്‍ പോളിസി വാങ്ങുന്നൊരാള്‍ക്ക് തുടർന്നുള്ള 65 വര്‍ഷം പോളിസിയുടെ ​ഗുണം ലഭിക്കും. ഇന്‍ഷൂറന്‍സ് കവറേജിനൊപ്പം 15, 20, 25, 30 വര്‍ഷ കാലയളവിലേക്ക് വ്യത്യസ്ത പ്രീമിയം നിക്ഷേപകന് തിരഞ്ഞെടുക്കാം. മാസത്തിലോ ത്രൈമാസത്തിലോ അര്‍ധ വര്‍ഷത്തിലോ വര്‍ഷത്തിലോ പോളിസി പ്രീമിയം അടയ്ക്കാം. 

സം അഷ്വേഡ്

എല്‍ഐസി ജീവന്‍ ഉമാംഗ് പോളിസിലെ ഏറ്റവും ചുരുങ്ങിയ അഷ്വേര്‍ഡ് തുക 2 ലക്ഷം രൂപയാണ്. സം അഷ്വേഡിന് ഉയർന്ന പരിധിയില്ല. നിക്ഷേപ കാലാവധി കഴിഞ്ഞാല്‍ പെന്‍ഷന്‍ ലഭ്യമാകും. കുട്ടികളുടെ പേരില്‍ ആണ് നിക്ഷേപം എങ്കില്‍ അവര്‍ക്ക് നേട്ടം ലഭിയ്ക്കാന്‍ 30 വയസ് പൂര്‍ത്തിയാകണം.

അത്യാവശ്യം വന്നാല്‍ വായ്പ എടുക്കാനുള്ള സൗകര്യവും പോളിസി ഉടമയ്ക്ക് ലഭിക്കും. മൂന്ന് വര്‍ഷം തുടർച്ചയായി പോളിസി പ്രീമിയം അടച്ച വ്യക്തിക്ക് പോളിസി സറണ്ടര്‍ ചെയ്യന്‍ സാധിക്കും. 

മരണാനന്തര ആനുകൂല്യം

പ്രീമിയം അടവ് കാലയളവില്‍ പോളിസി ഉടമ മരണപ്പെട്ടാല്‍ വാര്‍ഷിക പ്രീമിയത്തിന്റെ പത്തിരട്ടിയായിരിക്കും മരണാനന്തര ആനുകൂല്യം. പോളിസി ഉടമ പ്രീമിയം കാലയളവ് എല്ലാ മാസ തവണകളും അടച്ച് പൂര്‍ത്തിയാക്കിയാല്‍ സം അഷ്വേഡ് തുകയുടെ 8 ശതമാനം സര്‍വൈവല്‍ ബെനഫിറ്റായി എല്ലാ വര്‍ഷവും പോളിസി ഉടമയ്ക്ക് ലഭിക്കും.

പോളിസി പ്രീമിയം കാലായളവ് കഴിഞ്ഞാലുടന്‍ ഈ തുക ലഭിക്കാന്‍ തുടങ്ങും. പോളിസി ഉടമ 100 വയസിനിടെ മരണപ്പെട്ടാൽ നോമിനിക്ക് തുക ലഭിക്കും. ഇത് തവണകളായോ ഒറ്റതവണയായോ പിൻവലിക്കാൻ സാധിക്കും. 

പോളിസി കാൽക്കുലേറ്റർ

35 വയസുകാരൻ 20 ലക്ഷം രൂപ സം അഷ്വേഡുള്ള ജീവൻ ഉമാം​ഗ് പോളിസി 25 വർഷ പ്രീമിയം അടവ് കാലാവധിയിൽ വാങ്ങുകയാണെങ്കിലുള്ള ഉദാ​ഹരണമെടുക്കാം. 100 വയസ് വരെ, അതായത് 65 വര്‍ഷക്കാലമാണ് പോളിസി കാലാവധി.

ഇതില്‍ 20 വര്‍ഷത്തേക്കാണ് പ്രീമിയം അടയ്‌ക്കേണ്ടി വരുന്നത്. വാർഷിക പ്രീമിയമായി ആദ്യ വർഷത്തിൽ 80,114 രൂപയാണ് (നികുതി അടക്കം) വരുന്നത്. മാസത്തിൽ 6819 രൂപയാണ് അടയ്ക്കേണ്ടത്. വാർഷിക പ്രീമിയം അടവ് തിരഞ്ഞെടുത്താൽ ദിവസം കരുതേണ്ടത് 219 രൂപയാണ്.

രണ്ടാം വർഷം മുതൽ വാർഷിക പ്രീമിയം 78,389 രൂപയായി കുറയും. ഈ സമയത്ത് ദിവസത്തിൽ 214 രൂപ കരുതിയാൽ മതി. 25 വർഷ പ്രീമിയം അടവിന് ശേഷം 60-ാം വയസ് മുതൽ പോളിസി ഉടമയ്ക്ക് വർഷത്തിൽ 1.60 ലക്ഷം രൂപ ലഭിക്കും.

പോളിസി പ്രീമിയം അടവ് കാലാവധി പൂര്‍ത്തിയാക്കിയാല്‍ എല്ലാ വര്‍ഷവും സം അഷ്വേഡ് തുകയുടെ 8 ശതമാനം വര്‍ഷത്തില്‍ ലഭിക്കും. ഇതുപ്രകാരമാണ് 20 ലക്ഷം രൂപയുടെ 8 ശതമാനമായ 1,60,000 രൂപ പോളിസി ഉടമയ്ക്ക് വര്‍ഷത്തില്‍ ലഭിക്കുന്നത്.