എച്ച്ഡിഎഫ്സി ബാങ്ക് ക്രെഡിറ്റ് കാർഡിൽ കാര്യമായ മാറ്റം; ലോഞ്ച് ആക്സസ് ലഭിക്കുക ഇനി കടുപ്പം; മാറ്റങ്ങളറിയാം

ക്രെഡിറ്റ് കാർഡ് ഉപഭോക്താക്കൾക്ക് ലഭിക്കുന്ന പ്രധാന നേട്ടങ്ങളിലൊന്നാണ് സൗജന്യ ലോഞ്ച് ആക്സസ്. മിക്ക ക്രെഡിറ്റ് കാർഡ് കമ്പനികളും ഉപഭോക്താക്കൾക്ക് കോംപ്ലിമെന്ററി ​ഗണത്തിൽപ്പെടുത്തി ലോഞ്ച് ആക്സസുകൾ നൽകാറുണ്ട്. വിമാന യാത്രക്കാർക്ക് വിമാനത്താവളങ്ങളിലെ ലോഞ്ചുകൾ ഉപയോ​ഗിക്കുന്നതിനുള്ള സൗജന്യ സൗകര്യമാണ് ഇതിലൂടെ ലഭിക്കുന്നത്.

ഇന്ത്യയിലെ പ്രമുഖ സ്വകാര്യമേഖലാ ബാങ്കുകളിൽ ഒന്നായ എച്ച്‌ഡിഎഫ്‌സി ബാങ്ക് ലോഞ്ച് ആക്‌സസ് പ്രോഗ്രാമിൽ കാര്യമായ മാറ്റങ്ങൾ പ്രഖ്യാപിച്ചിട്ടുണ്ട്. റെഗാലിയ ക്രെഡിറ്റ് കാർഡുകളിൽ 2023 ഡിസംബർ 1 മുതൽ ലോഞ്ച് ആക്‌സസ് ലഭിക്കുന്നതിന് ചെലവാക്കലിനെ അടിസ്ഥാനമാക്കി നിബന്ധനകൾ കൊണ്ടു വരികയാണ്.

റെഗാലിയ ക്രെഡിറ്റ് കാർഡ് ലോഞ്ച് ആക്സസ്

എച്ച്ഡിഎഫ്സി ബാങ്ക് റെഗാലിയ ക്രെഡിറ്റ് കാർഡ് പുതിയ ലോഞ്ച് ആക്സസ് പ്രോ​ഗ്രാം പ്രകാരം ഒരു കലണ്ടർ പാദത്തിൽ കുറഞ്ഞത് ഒരു ലക്ഷം രൂപയോ അതിൽ കൂടുതലോ ചെലവഴിക്കുന്നവർക്ക് മാത്രമാണ് ലോഞ്ച് അക്സസ് സൗകര്യം ലഭിക്കുന്നത്. ജനുവരി-മാർച്ച്, ഏപ്രിൽ-ജൂൺ, ജൂലായ്-സെപ്റ്റംബർ, ഒക്ടോബർ-ഡിസംബർ എന്നിങ്ങനെ നാലാ പാദങ്ങളിലും ഈ ചെലവ് മാനദണ്ഡങ്ങൾ പാലിക്കുന്ന ക്രെഡിറ്റ് കാർഡ് ഉടമകൾക്കാണ് ലോഞ്ച് ആനുകൂല്യങ്ങൾ ലഭിക്കുക.

ലോഞ്ച് ആക്സസിന് വൗച്ചർ

ലോഞ്ച് ആക്സസ് ലഭിക്കുന്നതിന് ക്രെഡിറ്റ് കാർഡ് സ്വൈപ്പ് ചെയ്യുന്നതിന് പകരം ലോഞ്ച് ആക്സസ് വൗച്ചറും ബാങ്ക് ആരംഭിച്ചിട്ടുണ്ട്. ഓരോ പാദത്തിലും 1 ലക്ഷം രൂപയോ അതിൽ കൂടുതലോ ചെലവക്കി കഴിഞ്ഞാൽ ലോഞ്ച് ആക്സസ് വൗച്ചർ നേടാം. കാർഡ് ഉടമകൾക്ക് റെഗാലിയ സ്മാർട്ട്ബൈ പേജും ബാങ്കിന്റെ വെബ്‌സൈറ്റിലെ ലോഞ്ച് ആനുകൂല്യങ്ങളും പേജും സന്ദർശിച്ച് ലോഞ്ച് ആക്‌സസ് വൗച്ചർ സ്വന്തമാക്കാം.

ഓരോ പാദത്തിലും 2 ലോഞ്ച് ആക്സസ്

റെഗാലിയ ക്രെഡിറ്റ് കാർഡ് ഉടമകൾക്ക് ലഭ്യമായ കോംപ്ലിമെന്ററി ലോഞ്ച് ആക്സസ് വൗച്ചറുകളുടെ എണ്ണത്തിലും എച്ച്ഡിഎഫ്സി ബാങ്ക് പരിഷ്കരണമുണ്ട്. ത്രൈമാസത്തിൽ ആവശ്യമായ ചെലവാക്കൽ നടത്തുന്ന ഉപഭോക്താക്കൾക്ക് രണ്ട് കോംപ്ലിമെന്ററി ലോഞ്ച് ആക്‌സസ് വൗച്ചറുകൾ വരെ ലഭിക്കും. ഈ രണ്ട് വൗച്ചറുകൾക്കപ്പുറം ഒരു പാദത്തിൽ എയർപോർട്ട് ലോഞ്ച് ഉപയോ​ഗിച്ചാൽ ചെലവ് ക്രെഡിറ്റ് കാർഡിൽ നിന്ന് ഈടക്കും.

ഇന്ത്യയ്‌ക്ക് പുറത്തുള്ള ലോഞ്ച് ആക്‌സസ്സിനായി റെഗാലിയ ക്രെഡിറ്റ് കാർഡ് ഉടമക കുറഞ്ഞത് നാല് റീട്ടെയിൽ ഇടപാടുകളെങ്കിലും പൂർത്തിയാക്കണം. ശേഷം മുൻഗണനാ പാസിന് അപേക്ഷിച്ചാൽ ഒരു കലണ്ടർ വർഷത്തിൽ ആറ് കോംപ്ലിമെന്ററി ലോഞ്ച് ആക്‌സസ് വരെ ലഭിക്കും.

എങ്ങനെ ലോഞ്ച് വൗച്ചർ സ്വന്തമാക്കാം

ജനുവരി-മാർച്ച്, ഏപ്രിൽ-ജൂൺ, ജൂലായ്-സെപ്തംബർ, ഒക്‌ടോബർ- ഡിസംബർ എന്നിങ്ങനെയുള്ള കലണ്ടർ പാദത്തിൽ 1 ലക്ഷം രൂപയോ അതിൽ കൂടുതലോ ചെലവഴിക്കുക എന്നതാണ് ലോഞ്ച് ആക്സസ് ലഭിക്കാനുള്ള പ്രാഥമിക യോ​ഗ്യത. ചെലവാക്കൽ മാനദണ്ഡം പാലിച്ചാൽ റെ​ഗാലിയ സ്മാർട്ട്ബൈ പേജിൽ ലോഞ്ച് ആനുകൂല്യങ്ങൾ- ലോഞ്ച് ആക്‌സസ് വൗച്ചർ എന്ന ഭാ​ഗം സന്ദർശിക്കണം.

എസ്എംഎസ്/ഇ-മെയിൽ വഴി വൗച്ചർ ലഭിക്കാൻ "ജനറേറ്റ് വൗച്ചർ" ക്ലിക്ക് ചെയ്യുക. എസ്എംഎസ്/ ഇ-മെയിലായി ലഭിച്ച ഇ-വൗച്ചർ PDF ഫോർമാറ്റിൽ തുറക്കാൻ ലഭിച്ച ലിങ്കിൽ ക്ലിക്ക് ചെയ്യണം. ഇതിൽ ഒരു ക്യുആർ കോഡ് ലഭിക്കും. അത് ലോഞ്ച് ടെർമിനലിൽ സ്കാൻ ചെയ്ത് ലോഞ്ച് സൗകര്യം ഉപയോ​ഗിക്കാം.

എവിടെ സ്വീകരിക്കും

എച്ച്ഡിഎഫ്‌സി ബാങ്ക് റെഗാലിയ ക്രെഡിറ്റ് കാര്‍ഡ് ഡല്‍ഹി വിമാനത്താവളത്തിലെ എന്‍രാം ലോഞ്ചില്‍ സ്വീകരിക്കും. ആഭ്യന്തര ടെര്‍മിനല്‍ 3, അന്താരാഷ്ടച്ര ടെര്‍മിനല്‍ 2, ആഭ്യന്തര ടെര്‍മിനല്‍ 2 എന്നിവിടങ്ങളില്‍ സൗകര്യം ഉപയോഗപ്പെടുത്താം. കൊച്ചി അന്താരാഷ്ട്ര വിമാനത്താവളത്തില്‍ ആഭ്യന്തര ടെര്‍മിനനല്‍ 1 ലെ എര്‍ത്ത് ലോഞ്ചില്‍ കാര്‍ഡ് ഉപയോഗിക്കാം.

ബംഗളുരു വിമാനത്താവളത്തിലെ അന്താരാഷ്ട്ര ടെര്‍മിനനല്‍ 1 ല്‍ എച്ച്ഡിഎഫ്‌സി ബാങ്ക് റെഗാലിയ ക്രെഡിറ്റ് കാര്‍ഡ് ഉപയോഗിക്കാം.ആഭ്യന്തര ടെര്‍മിനനല്‍ 1 ലെയും രണ്ടിലെയും ലോഞ്ചുകളിലും സൗകര്യം ഉപയോഗിക്കാം. പൂനെ, മുംബൈ, ചെന്നൈ, കൊൽക്കത്ത, ഹൈദരാബാദ് വിമാനത്താവളങ്ങളിലും ലോഞ്ച് സൗകര്യം ഉപയോ​ഗിക്കാം.