മുതിർന്ന പൗരന്മാർക്ക് എസ്ബിഐയേക്കാൾ പലിശ; എച്ച്ഡിഎഫ്സി ബാങ്കിന്റെ സ്ഥിര നിക്ഷേപം അറിയാം

മുതിർന്ന പൗരന്മാർ കൂടുതലും ഉപയോ​ഗപ്പെടുത്തുന്നത് സ്ഥിര നിക്ഷേപമാണ്. അതിനാൽ തന്നെ ബാങ്കുകൾ മുതിർന്ന പൗരന്മാർക്ക് വലിയ പ്രധാന്യം നിക്ഷേപങ്ങളിൽ നൽകുന്നു. പലിശ നിരക്കുകളിലെ 0.50 ശതമാനം പ്രീമിയം നിരക്ക് ഇതിന് ഉദാഹരണം. മുതിർന്ന പൗരന്മാർക്ക് എസ്ബിഐ വീകെയർ നിക്ഷേപത്തിന്റെ ഭാ​ഗമായി 5 വർഷം മുതൽ 10 വർഷത്തേക്ക് 7.50 ശതമാനം പലിശ എസ്ബിഐ നൽകുന്നുണ്ട്. പ്രീമിയം നിരക്കിനൊപ്പം 0.50 ശതമാനം അധിക നിരക്കാണ് എസ്ബിഐ നൽകുന്നത്.

സമാനമായ രീതിയിൽ മുതിർന്ന പൗരന്മാരെ പരി​ഗണിക്കുന്ന ബാങ്കാണ് എച്ച്ഡിഎഫ്സി ബാങ്ക്. എച്ച്‌ഡിഎഫ്‌സി ബാങ്കിന്റെ സീനിയർ സിറ്റിസൺ കെയർ എന്ന ഉയർന്ന പലിശ നിരക്കുള്ള പദ്ധതി പ്രകാരമാണ് മുതിർന്ന പൗരന്മാർക്ക് ബാങ്ക് അധിക നിരക്ക് നൽകുന്നത്. നിക്ഷേപകർക്ക് എസ്ബിഐയേക്കാൾ പലിശ നൽകുന്ന പദ്ധതി ജൂലായ് 7ന് അവസാനിക്കും. പദ്ധതിയുടെ വിശദാംശങ്ങൾ എന്തെല്ലാമെന്ന് നോക്കാം.

പലിശ നിരക്ക്

സീനിയർ സിറ്റിസൺ കെയർ സ്ഥിര നിക്ഷേപം പ്രകാരം മുതിർന്ന പൗരന്മാർക്ക് റെ​ഗുലർ നിക്ഷേപങ്ങളേക്കാൾ 0.75 ശതമാനം അധിക പലിശ നിരക്ക് ബാങ്ക് നൽകുന്നു. 5 വർഷം 1 ദിവസം മുതൽ 10 വർഷം വരെയുള്ള കാലാവധിയിലാണ് സീനിയർ സിറ്റിസൺ കെയർ സ്ഥിര നിക്ഷേപം ബാധകമാകുന്നത്. ഇതുപ്രകാരം നിക്ഷേപകർക്ക് 7.75 ശതമാനം പലിശ നേടാം. പുതിയ സ്ഥിര നിക്ഷേപത്തിനും പുതുക്കലിനും പലിശ നിരക്ക് ലഭിക്കും. പ്രവാസി ഇന്ത്യക്കാർക്ക് ഈ ഓഫർ ബാധകമല്ല.

മറ്റ് നിക്ഷേപ പലിശ

മുതിർന്ന പൗരന്മാർക്ക് 3.50 ശതമാനം മുതൽ 7.75 ശതമാനം പലിശയാണ് എച്ച്ഡിഎഫ്സി ബാങ്ക് നൽകുന്നത്. 7 മുതൽ 29 ദിവസം വരെ കാലാവധിയുള്ള നിക്ഷേപങ്ങൾക്ക് 3.50 ശതമാനം പലിശ ലഭിക്കും.

30 മുതൽ 45 ദിവസം കാലാവധിയിൽ 4 ശതമാനം പലിശയും 46 മുതൽ 6 മാസത്തിൽ താഴെയുള്ള നിക്ഷേപങ്ങൾക്ക് 5 ശതമാനം പലിശയും മുതിർന്ന പൗരന്മാർക്ക് എച്ച്ഡിഎഫ്സി ബാങ്കിൽ നിന്ന് ലഭിക്കും. 6 മാസം 1 ദിവസം മുതൽ 9 മാസത്തിൽ താഴെയുള്ള നിക്ഷേപങ്ങൾക്ക് 6.25 ശതമാനം പലിശ ലഭിക്കും. 

9 മാസം, 1 ദിവസം മുതൽ 1 വർഷം വരെ കാലാവധിയുള്ള സ്ഥിര നിക്ഷേപങ്ങൾക്ക് ബാങ്ക് 6.50 ശതമാനം പലിശ നൽകും. 1 വർഷം മുതൽ 15 മാസം വരെ കാലാവധിയുള്ള നിക്ഷേപങ്ങൾക്ക് 7.10 പലിശയാണ് എച്ച്ഡിഎഫ്‌സി ബാങ്ക് നൽകുന്ന പലിശ നിരക്ക്.

15 മാസത്തിനും 18 മാസത്തിനും ഇടയിൽ കാലാവധിയുള്ള നിക്ഷേപങ്ങൾക്ക് 7.60 ശതമാനവും 18 മാസം മുതൽ 4 വർഷം 7 മാസത്തിൽ താഴെയുള്ള നിക്ഷേപങ്ങൾക്ക് 7.50 ശതമാനം പലിശയും എച്ച്‌ഡിഎഫ്‌സി ബാങ്ക് നൽകുന്നു. 

ഉയർന്ന പലിശ

2 വർഷം 11 മാസം മുതൽ 35 മാസം വരെ കാലാവധിയുള്ള നിക്ഷേപങ്ങൾക്ക് എച്ച്ഡിഎഫ്സി ബാങ്കിൽ നിന്ന് 7.70 ശതമാനം പലിശ ലഭിക്കും. 4 വർഷം 7 മാസം മുതൽ 55 മാസം വരെയുള്ള കാലയളവിൽ ബാങ്ക് ഏറ്റവും ഉയർന്ന പലിശ നിരക്കായ 7.75 ശതമാനം പലിശ ലഭിക്കും.

സീനിയർ സിറ്റിസൺ കെയർ സ്ഥിര നിക്ഷേപം ബാധകമാകുന്ന 5 വർഷം 1 ദിവസം മുതൽ 10 വർഷം വരെയുള്ള കാലയളവിലും മുതിർന്ന പൗരന്മാർക്ക് 7.75 ശതമാനം പലിശ എച്ച്ഡിഎഫ്സി ബാങ്കിൽ നിന്ന് ലഭിക്കും.