ഉയർന്ന പലിശയ്ക്കൊപ്പം ആദായ നികുതി ഇളവുകളും; നിക്ഷേപകരുടെ മനം നിറയ്ക്കുന്ന 5 പ​ദ്ധതികൾ

പലിശ വരുമാനം തേടി സാധാരണ നിക്ഷേപകർ മാത്രമല്ല പോസ്റ്റ് ഓഫീസ് നിക്ഷേപങ്ങളെ തിരഞ്ഞെടുക്കുന്നത്. ഉയർന്ന വരുമാനുള്ളവർക്ക് നികുതി ഇളവുകൾ നേടണമെങ്കിലും പോസ്റ്റ് ഓഫീസ് നിക്ഷേപ പദ്ധതികളെ ആശ്രയിക്കണം. എന്നാൽ നിക്ഷേപിക്കുന്ന പണത്തിൻ് ഉയർന്ന പലിശ നൽകുന്ന എന്നതാണ് ഇവയുടെ പ്രത്യേകത.

നിക്ഷേപിക്കുന്ന തുകയ്ക്ക് 1961 ലെ ആദായ നികുതി നിയമം സെക്ഷൻ 80സി പ്രകാരം 1.50 ലക്ഷം രൂപ വരെ നികുതി ഇളവ് ഈ പദ്ധതികൾ നൽകും. എല്ലാ നിക്ഷേപങ്ങൾക്കും 7 ശതമാനത്തിന് മുകളിൽ പലിശയും ലഭിക്കും. ഇവ ഓരോന്നും വിശദമായി നോക്കാം.

പബ്ലിക്ക് പ്രൊവിഡന്റ് ഫണ്ട്

പബ്ലിക്ക് പ്രൊവിഡന്റ് ഫണ്ട് പൂർണമായും നികുതി ഇളവ് ലഭിക്കുന്നൊരു നിക്ഷേപമാണ്. സാമ്പത്തിക വർഷത്തിൽ നിക്ഷേപിക്കാവുന്ന തുക മുഴുവനും ആദായ നികുതി നിയമത്തിലെ സെക്ഷൻ 80സിക്ക് കീഴിൽ വരും. മാസ തവണകളായോ ഒറ്റത്തവണയായോ നിക്ഷേപിക്കാം.

ജനുവരി- മാർച്ച് പാദത്തിൽ പബ്ലിക്ക് പ്രൊവിഡന്റ് ഫണ്ടിന് 7.1 ശതമാനം പലിശ വാ​ഗ്ദാനം ചെയ്യുന്നുണ്ട്. നിക്ഷേപം കാലാവധി പൂർത്തിയാകുമ്പോൾ ലഭിക്കുന്ന തുകയ്ക്കും പലിശ വരുമാനത്തിനും നികുതി നൽകേണ്ടതില്ല. 15 വർഷം കാലാവധിയുള്ള നിക്ഷേപമാണ്. കാലാവധിയിൽ ലഭിക്കുന്ന തുകയ്ക്കും നികുതി നൽകേണ്ടതില്ല. 

സുകന്യ സമൃദ്ധി യോജന

സുകന്യ സമൃദ്ധി യോജന പെൺകുട്ടികൾക്കായുള്ള നിക്ഷേപമാണ്. 7.60 ശതമാനം പലിശ ലഭിക്കുന്ന നിക്ഷേപമാണിത്. സാമ്പത്തിക വർഷത്തിൽ 250 രൂപ മുതൽ 1.50 ലക്ഷം രൂപ വരെ നിക്ഷേപിക്കാം. 80സി ആനുകൂല്യം ലഭിക്കുന്നതിനോടൊപ്പം പലിശയ്ക്കും കാലാവധിയിൽ ലഭിക്കുന്ന തുകയ്ക്കും നികുതി നൽകേണ്ടതില്ല. 21 വർഷമോ 18 വയസിന് ശേഷം പെൺകുട്ടിയുടെ വിവാഹം വരെയോ ആണ് കാലാവധിയായി കണക്കാക്കുന്നത്. 

5 വർഷ ടെെം ഡെപ്പോസിറ്റ്

ബാങ്കിലെ ടാക്സ് സേവിം​ഗ് സ്ഥിര നിക്ഷേപങ്ങൾക്ക് സമാനമായ നിക്ഷേപമാണ് 5 വർഷ ടൈം ഡെപ്പോസിറ്റ്. ഈ പദ്ധതിയിൽ സാമ്പത്തിക വർഷത്തിൽ നിക്ഷേപിക്കുന്ന 1.50 ലക്ഷം രൂപയ്ക്ക് നികുതി ഇളവുണ്ട്. പദ്ധതിയിൽ നിക്ഷേപിക്കാവുന്ന ഏറ്റവും കുറഞ്ഞ തുക 1,000 രൂപയാണ്. പരിധിയില്ലാതെ നിക്ഷേപിക്കാം. 7 ശതമാനം പലിശ 5 വർഷത്തെ ടൈം ഡെപ്പോസിറ്റിന് ലഭിക്കുന്നുണ്ട്. പലിശ വരുമാനം നിക്ഷേപന്റെ നികുതി സ്ലാബ് അനുസരിച്ച് നികുതി ബാധകമാണ്.

നാഷണൽ സേവിം​ഗ്സ് സർട്ടിഫിക്കറ്റ്

5 വർഷ ലോക് ഇൻ പിരിയഡുള്ളൊരു നിക്ഷേപമാണ് നാഷണൽ സേവിം​ഗ്സ് സർട്ടിഫിക്കറ്റ്. 1,000 രൂപ മുതൽ പരിധിയില്ലാതെ നിക്ഷേപിക്കാം. 7 ശതമാനം പലിശ ലഭിക്കും. സാമ്പത്തിക വർഷത്തിൽ നാഷണൽ സേവിം​ഗ്സ് സർട്ടിഫിക്കറ്റ് നിക്ഷേപങ്ങൾക്ക് 1.50 ലക്ഷം രൂപ വരെ നികുതി ഇളവ് ലഭിക്കും. 1000 രൂപ നിക്ഷേപിക്കുന്നൊരാൾക്ക് അഞ്ച് വർഷത്തിന് ശേഷം 1,403 രൂപ ലഭിക്കും. 

സീനിയർ സിറ്റിസൺ സേവിം​ഗ്സ് സ്കീം

60 വയസോ അതിൽ കൂടുതലോ പ്രായമുള്ള വ്യക്തിക്കാണ് സീനിയർ സിറ്റിസൺ സേവിം​ഗ്സ് സ്കീം അക്കൗണ്ട് തുറക്കാൻ സാധിക്കുക. ജനുവരി- മാർച്ച് പാദത്തിലെ പുതുക്കിയ പലിശ നിരക്ക് പ്രകാരം 8 ശതമാനമാണ് സീനിയർ സിറ്റിസൺ സേവിം​ഗ്സ് സ്കീമിന് ലഭിക്കുന്ന പലിശ.

5 വർഷത്തേക്ക് സ്ഥിര വരുമാനം ഉറപ്പു നൽകുന്ന പദ്ധതിയിൽ നിക്ഷേപിക്കുന്ന 1.50 ലക്ഷം രൂപയ്ക്ക് നികുതി ഇളവ് ലഭിക്കും. എന്നാൽ ലഭിക്കുന്ന പലിശ വരുമാനം നികുതി ബാധകമാണ്.