നിങ്ങളുടെ ക്രെഡിറ്റ് റിപ്പോർട്ട് നോക്കുമ്പോൾ എന്താണ് ബാങ്കുകൾ സത്യത്തിൽ കാണുന്നത്? ഉത്തരം ഇതാ

ഒരു ലോണിനെ സംബന്ധിച്ചിടത്തോളം അതിനെ ബാധിക്കുന്ന ഏറ്റവും പ്രധാനപ്പെട്ട മൂലകാരണമാണ് ക്രെഡിറ്റ് റിപ്പോർട്ട്. അത് നെഗറ്റീവ് ആയാൽ പിന്നെ എല്ലാം നെഗറ്റീവ് ആയി. അതുകൊണ്ടുതന്നെ ലോണിന് അപേക്ഷിക്കുന്നവർ ഇപ്പോഴും നല്ലൊരു ക്രെഡിറ്റ് റിപ്പോർട്ട് നിലനിർത്താൻ ശ്രദ്ധിക്കണം.
നിങ്ങളുടെ ക്രെഡിറ്റ് ഹിസ്റ്ററി, അതായത് കടം തന്നാൽ നിങ്ങൾ തിരിച്ചു കൊടുക്കുന്നതിൽ കൃത്യത കാണിക്കുന്നുണ്ടോ എന്ന് നോക്കലാണ് ഇതിന്റെ യഥാർത്ഥ രൂപം.

ലെൻഡർമാർ നിങ്ങളുടെ ക്രെഡിറ്റ് റിപ്പോർട്ടിൽ എന്തെല്ലാം പരിശോധിക്കുന്നു, ക്രെഡിറ്റ് സ്കോർ മെച്ചപ്പെടുത്താൻ എന്തുചെയ്യണം, ക്രെഡിറ്റ് റിപ്പോർട്ട് കുറഞ്ഞത് കൊണ്ട് എന്ത് ദോഷം സംഭവിക്കാം എന്നിവയാണ് ഈ ലേഖനത്തിൽ വിശദീകരിക്കുന്നത്.

ലെൻഡർമാർ ക്രെഡിറ്റ് റിപ്പോർട്ടിൽ പരിശോധിക്കുന്ന കാര്യങ്ങൾ

നിങ്ങളുടെ വായ്പ അപ്രൂവ് ചെയ്യേണ്ടതുണ്ടോ എന്നത് തീരുമാനിക്കാൻ ലെൻഡർമാർ വിവിധ ഘടകങ്ങൾ വിലയിരുത്തും. പ്രധാനമായും അവർ ശ്രദ്ധിക്കുന്ന ചില കാര്യങ്ങൾ വ്യക്തമാക്കാം:

*ക്രെഡിറ്റ് ഉപയോഗ നിരക്ക്

നിങ്ങൾക്ക് ലഭ്യമായ ക്രെഡിറ്റിന്റെ എത്ര ശതമാനം ഉപയോഗിക്കുന്നു എന്നതിന്റെ അനുപാതമാണ് ക്രെഡിറ്റ് ഉപയോഗ നിരക്ക്.

30%-ൽ താഴെ ക്രെഡിറ്റ് ഉപയോഗം നല്ലതായി കണക്കാക്കപ്പെടുന്നു. ഉയർന്ന ക്രെഡിറ്റ് ഉപയോഗം നിങ്ങൾക്ക് സാമ്പത്തിക ബുദ്ധിമുട്ടുകൾ അനുഭവപ്പെടുന്നു എന്ന ആശയം നൽകാം.

*ക്രെഡിറ്റ് മിക്സ്

നിങ്ങൾക്ക് ഉള്ള വിവിധ തരത്തിലുള്ള വായ്പകളും ക്രെഡിറ്റ് അക്കൗണ്ടുകളും (ക്രെഡിറ്റ് കാർഡ്, പേഴ്സണൽ ലോൺ, ഹോം ലോൺ മുതലായവ) ലെൻഡർമാർ പരിശോധിക്കും. വിവിധതരം വായ്പകൾ കൈകാര്യം ചെയ്യുന്നവർക്ക് മികച്ച സ്കോർ ലഭിക്കാൻ സാധ്യത കൂടുതലാണ്.

*പേയ്മെന്റ് ഹിസ്റ്ററി

നിങ്ങളുടെ ലോൺ, ക്രെഡിറ്റ് കാർഡ് എന്നിവയുടെ പണമടച്ചതിന്റെ സമയബന്ധിതത്വം ലെൻഡർമാർ സൂക്ഷ്മമായി പരിശോധിക്കും. നേരത്തേ അടച്ചവര്ക്ക് നല്ല റിപോർട്ട് ലഭിക്കും, എന്നാൽ തടസ്സം, അല്ലെങ്കിൽ ഡിഫോൾട്ട് എന്നിവ ഉണ്ടായാൽ നിങ്ങളുടെ സ്കോറിന് അത് ദോഷം ചെയ്യും.

*പുതിയ വായ്പാ അപേക്ഷകൾ

അടുത്തിടെ നിങ്ങൾ ഇതര ബാങ്കുകൾക്കോ എൻബിഎഫ്സികൾക്കോ നൽകിയ വായ്പാ അന്വേഷണങ്ങൾ ലെൻഡർമാർ പരിശോധിക്കും.
അധികമായി വായ്പാ അപേക്ഷകൾ നൽകുന്നത് നിങ്ങൾക്ക് ഗുണം ചെയ്യില്ല.

2. നിങ്ങളുടെ ക്രെഡിറ്റ് റിപ്പോർട്ട് എങ്ങനെ സൗജന്യമായി പരിശോധിക്കാം?

റിസർവ് ബാങ്ക് ഓഫ് ഇന്ത്യയുടെ നിർദ്ദേശപ്രകാരം, എല്ലാ ഇന്ത്യക്കാർക്കും ഒരു വർഷത്തിൽ ഒരിക്കൽ ഒരു സൗജന്യ ക്രെഡിറ്റ് റിപ്പോർട്ട് ലഭിക്കാനുള്ള അവകാശമുണ്ട്. ഇത് എല്ലാ ക്രെഡിറ്റ് ഇൻഫർമേഷൻ കമ്പനികൾക്കും ബാധകമാണ്.

സൗജന്യമായി ക്രെഡിറ്റ് റിപ്പോർട്ട് നേടാൻ:

* സിബിൽ, എക്സ്പീരിയൻ, ഇക്വിഫാക്സ്, സി ആർ ഐ എഫ്, ഹൈമാർക്ക് പോലുള്ള അംഗീകൃത ക്രെഡിറ്റ് ബ്യൂറോകളുടെ ഔദ്യോഗിക വെബ്സൈറ്റിൽ അപേക്ഷിക്കുക.

* നിങ്ങളുടെ പാൻ കാർഡ്, ആധാർ, മൊബൈൽ നമ്പർ എന്നിവ നൽകുക.

* നിങ്ങളുടെ ക്രെഡിറ്റ് സ്കോറും, പണമടച്ച ചരിത്രവും പരിശോധിക്കാം

3. കുറഞ്ഞ ക്രെഡിറ്റ് സ്കോർ എങ്ങനെ വർദ്ധിപ്പിക്കാം?

കുറഞ്ഞ ക്രെഡിറ്റ് സ്കോർ വായ്പാ അപ്രൂവലിനെയും പലിശനിരക്കിനെയും പ്രതികൂലമായി ബാധിക്കും. നിങ്ങളുടെ ക്രെഡിറ്റ് സ്കോർ മെച്ചപ്പെടുത്താൻ ശ്രദ്ധിക്കേണ്ട പ്രധാന മാർഗങ്ങൾ:

*സമയത്തിന് പണമടയ്ക്കുക:

ഇ എം ഐകളും ക്രെഡിറ്റ് കാർഡ് പെയ്മെന്റുകളും ടൈംലിയായി അടയ്ക്കുക.

*വായ്പാ അന്വേഷണങ്ങൾ കുറയ്ക്കുക:

ആവശ്യമില്ലാത്ത പുതിയ വായ്പകൾക്കും ക്രെഡിറ്റ് കാർഡുകൾക്കും അപേക്ഷിക്കുന്നത് ഒഴിവാക്കുക.

*ക്രെഡിറ്റ് ഉപയോഗം നിയന്ത്രിക്കുക:

30% - 40%-നു താഴെ ക്രെഡിറ്റ് ഉപയോഗം നിലനിർത്തുക.

*വിവിധതരം ക്രെഡിറ്റ് കൈകാര്യം ചെയ്യുക:

ലോണുകളും ക്രെഡിറ്റ് കാർഡുകളും മാറിമാറി ഉപയോഗിക്കുക.

ഇനി എന്തൊക്കെ ചെയ്താലും നിങ്ങളുടെ ക്രെഡിറ്റ് സ്കോർ വർദ്ധിക്കാൻ ഒരു വർഷം വരെ എടുക്കാം. അതുകൊണ്ട് സ്ഥിരതയോടെയും ഉത്തരവാദിത്വത്തോടെയും പെരുമാറുക.

4. കോ- സിഗ്‌നർ എന്ന വയ്യാവേലി

നിങ്ങൾ നിങ്ങളുടെ സഹപ്രവർത്തകർ, സഹോദരങ്ങൾ, അല്ലെങ്കിൽ സുഹൃത്തുക്കൾ എന്നിവരുടെ വായ്പയ്ക്ക് ഗ്യാരണ്ടി ആയി നിന്നാൽ, അത്തരം വായ്പയും നിങ്ങളുടെ ക്രെഡിറ്റ് റിപ്പോർട്ടിൽ പ്രതിഫലിക്കും. ഇതിന്റെ പ്രധാന

ഗുണവും ദോഷവും:

അവർ ലോണുകൾ നേരത്തേ അടച്ചാൽ നിങ്ങളുടെ ക്രെഡിറ്റ് സ്കോർ മെച്ചപ്പെടും. എന്നാൽ വിപരീതമായി, പണമടയ്ക്കുന്നതിൽ തടസ്സം വരുത്തിയാൽ നിങ്ങളുടെ സ്കോറിനും ദോഷം ചെയ്യും.

ലോണിന് അപേക്ഷിക്കുമ്പോൾ ലെൻഡർമാർ നിങ്ങളുടെ ക്രെഡിറ്റ് റിപ്പോർട്ട് വിശദമായി പരിശോധിക്കുന്നു. നിങ്ങളുടെ വായ്പാ അപ്രൂവൽ അനായാസമാക്കാൻ പണങ്ങൾ ടൈംലിയായി അടയ്ക്കുക, കുറഞ്ഞ ക്രെഡിറ്റ് ഉപയോഗം പാലിക്കുക, വായ്പാ അന്വേഷണങ്ങൾ കുറയ്ക്കുക എന്നിവ പ്രത്യേകം ശ്രദ്ധിക്കുക.