മാസത്തിൽ എത്ര മിച്ചം പിടിക്കും; നിക്ഷേപിച്ച് ലക്ഷങ്ങൾ സമ്പാദിക്കാം; മികച്ച പലിശ നൽകുന്ന നിക്ഷേപമിതാ

നിക്ഷേപം വലിയ തുകയുടെ കളിയാണെന്ന് ധരിച്ച് മാറി നിന്നാൽ കയ്യിൽ സമ്പാദ്യമുണ്ടാകില്ലെന്നതാണ് ഫലം. നേരെ മറിച്ച് കയ്യിലുള്ളത് സ്വന്തം അറിവ് പോലെ നിക്ഷേപിക്കുന്നൊരാൾക്ക് കയ്യിലൊരു സമ്പാദ്യമുണ്ടാകും. നിക്ഷേപം തിരഞ്ഞെടുക്കുമ്പോൾ ഓരോരുത്തർക്കും അനുയോജ്യമായവ കണ്ട് വേണം നിക്ഷേപങ്ങലെ പരി​ഗണിക്കാൻ. ശമ്പളക്കാരും കുറഞ്ഞ റിസ്കെടുക്കാൻ താൽപര്യപ്പെടുന്നവരുമാണെങ്കിൽ സമ്പാദ്യമുണ്ടാക്കാൻ തിരഞ്ഞെടുക്കേണ്ട നിക്ഷേപ ഉപകരണമാണ് ആവർത്തന നിക്ഷേപം.

ആവർത്തന നിക്ഷേപ പദ്ധതി വഴി ഒരു നിശ്ചിത കാലയളവിലേക്ക് സ്ഥിരമായ പ്രതിമാസ നിക്ഷേപം വഴി നല്ലൊരു സമ്പാദ്യം ഉണ്ടാക്കിയെടുക്കാനുള്ള അവസരമാണ്. ബാങ്കുകളും പോസ്റ്റ് ഓഫീസുമാണ് ആവർത്തന നിക്ഷേപത്തിന് സാധാരണയായി പരി​ഗണിക്കുന്ന നിക്ഷേപ ഇടങ്ങൾ. ഡിസംബർ പാദത്തിൽ മറ്റെല്ലാ ലഘു സമ്പാദ്യ പദ്ധതികളുടെയും നിരക്കുകൾ നിലനിർത്തിയെങ്കിലും അഞ്ച് വർഷത്തെ ആവ ർത്തന നിക്ഷേപത്തിന്റെ പലിശ നിരക്ക് ധനമന്ത്രാലയം വർധിപ്പിച്ചിട്ടുണ്ട്.

പോസ്റ്റ് ഓഫീസിലും രാജ്യത്തെ പ്രമുഖ ബാങ്കുകളായ എസ്ബിഐ എച്ച്‍ഡിഎഫ്സി എന്നിവിടങ്ങളിലെയും ആവർത്തന നിക്ഷേപ പലിശ നിരക്കുകൾ നോക്കാം.

പോസ്റ്റ് ഓഫീസ് ആവർത്തന നിക്ഷേപം

വെറും 100 രൂപ മുതൽ മാസത്തിൽ നിക്ഷേപിക്കാൻ സാധിക്കുന്ന പദ്ധതിയാണ് പോസ്റ്റ് ഓഫീസ് ആവർത്തന നിക്ഷേപം. ഡിസംബർ പാദത്തിൽ 20 അടിസ്ഥാന നിരക്കാണ് പോസ്റ്റ് ഓഫീസ് ആവർത്തന നിക്ഷേപത്തിന് വർധിപ്പിച്ചത്. 6.50 ശതമാനത്തിൽ നിന്ന് പലിശ നിരക്ക് 6.70 ശതമാനമായി ഉയർന്നു. 5 വർഷമാണ് പോസ്റ്റ് ഓഫീസ് ആവർത്തന നിക്ഷേപങ്ങളുടെ കാലാവധി. ചേരുന്ന സമയത്തെ പലിശ നിരക്ക് കാലാവധിയോളം ലഭിക്കും.

എസ്ബിഐ ആവർത്തന നിക്ഷേപം

എസ്ബിഐ ഒരു വർഷം മുതൽ പത്ത് വർഷം വരെ കാലാവധിയിലാണ് ആവർത്തന നിക്ഷേപങ്ങൾ സ്വീകരിക്കുന്നത്. 5.75 ശതമാനം മുതൽ 7 ശതമാനം വരെയാണ് ആവർത്തന നിക്ഷേപത്തിന് എസ്ബിഐ നൽകുന്ന പലിശ നിരക്ക്. 2023 ഫെബ്രുവരി 15 മുതൽ ഈ നിരക്കുകൾ പ്രാബല്യത്തിലുണ്ട്.

എച്ച്ഡിഎഫ്സി ബാങ്ക് ആവർത്തന നിക്ഷേപം

എച്ച്ഡിഎഫ്സി ബാങ്കിൽ 1,000 രൂപയാണ് ആവർത്തന നിക്ഷേപത്തിന് വേണ്ട ഏറ്റവും കുറഞ്ഞ തുക. 100 രൂപയുടെ ​ഗുണിതങ്ങളായി 1,99,99,900 രൂപ വരെ നിക്ഷേപിക്കാം. എച്ച്‌ഡിഎഫ്‌സി ബാങ്ക് 6 മാസം മുതൽ 10 വർഷം വരെ കാലാവധിയുള്ള ആവർത്തന നിക്ഷേപങ്ങളാണ് സ്വീകരിക്കുന്നത്. ഇവയ്ക്ക് 4.50 ശതമാനം മുതൽ 7 ശതമാനം വരെ പലിശ നൽകും. 2023 ജനുവരി 24 മുതൽ പ്രാബല്യത്തിലുള്ള നിരക്കുകളാണിത്.

5 വർഷത്തേക്ക് മികച്ച നിരക്ക് നൽകുന്നതാണ്

5 വർഷത്തെ ആവർത്തന നിക്ഷേപം തിരഞ്ഞെടുക്കുന്നവർക്ക് മികച്ച റിട്ടേൺ ലഭിക്കും. ദീർഘകാലയളവിൽ പണം വളരാനുള്ള സാധ്യത തന്നെയാണ് ഇതിന് കാരണം. മാസത്തിൽ നിക്ഷേപിക്കുന്ന തുക വളരാനും പലിശ വളരാനും ദീർഘകാല നിക്ഷേപം ആവശ്യമാണ്. പോസ്റ്റ് ഓഫീസ് ആവർത്തന നിക്ഷേപം 5 വർഷത്തേക്ക് മാത്രമാണ് ലഭിക്കുന്നത്. ഇതിന് ഇന്നത്തെ സാഹചര്യത്തിൽ 6.70 ശതമാനം പലിശ ലഭിക്കും.

എസ്ബിഐ 5 വർഷത്തേക്ക് 6.50 ശതമാനം പലിശ നൽകുമ്പോൾ എച്ച്ഡിഎഫ്സി ബാങ്കിൽ 5 വർഷ ആവർത്തന നിക്ഷേപം ആരംഭിച്ചാൽ 7 ശതമാനം പലിശ നേടാം.

നികുതി ഇളവ്

നല്ലൊരു തുക സമ്പാദിക്കാൻ സാധിക്കുമെന്നത് ആവർത്തന നിക്ഷേപങ്ങളുടെ നേട്ടമാണ്. അതേസമയം നികുതി ആനുകൂല്യങ്ങളൊന്നും ആവർത്തന നിക്ഷേപം വഴി നേടാനാകില്ല. നിക്ഷേപിക്കുന്ന തുകയ്ക്ക് നികുതി ഇളവുകളില്ല. പലിശ വരുമാനം നിക്ഷേപകന്റെ മൊത്ത വരുമാനത്തിനൊപ്പം ചേർത്ത് നികുതി കണക്കാക്കുകയും ചെയ്യും.