സ്വർണവില റെക്കോർഡിലേക്ക്, കയ്യിൽ എത്ര ഗ്രാം സൂക്ഷിക്കാം എന്നറിയണം, ഇല്ലെങ്കിൽ തടവും പിഴയും ഉറപ്പ്

ഭൂരിപക്ഷം ആളുകൾക്കും ധരിക്കാൻ ഇഷ്ടമുള്ള ആഭരണങ്ങളിലൊന്നാണ് സ്വർണം. കല്യാണത്തിനും വിശേഷ ദിവസങ്ങളിലും സ്ത്രീകൾ സ്വർണാഭരണങ്ങൾ ധരിക്കാറുണ്ട്. ലോകത്തുതന്നെ ഏറ്റവും കൂടുതൽ സ്വർണം ഇറക്കുമതി ചെയ്യുന്ന രാജ്യങ്ങളിലൊന്നാണ് സ്വർണം. ഇന്ന് സ്വർണം പവന് 1,24,680 രൂപയാണ് ഒരുപവൻ സ്വർണത്തിന്‍റെ വില. ഗ്രാമിന് 15,585 രൂപ. 5% പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നീ ചാർജുകൾ ഈടാക്കിയാൽ ഒരു പവൻ സ്വർണാഭരണം വാങ്ങാൻ ഏകദേശം 1,35,000 രൂപ നൽകേണ്ടി വരും.

സ്വർണ്ണ വിലയിൽ വൻ കുതിച്ചുചാട്ടം നടക്കുമ്പോൾ, സ്വർണ്ണ കൈവശം വയ്ക്കുന്നതുമായി ബന്ധപ്പെട്ട ആദായനികുതി വകുപ്പ് നിയമങ്ങൾ അറിഞ്ഞിവെക്കുന്നത് നല്ലതാണ്.

എത്ര സ്വർണം കയ്യിൽ കരുതാം..?

സ്വർണം കൈവശം വയ്ക്കാവുന്ന പരിധി നിയമപ്രകാരം നിശ്ചയിച്ചിട്ടില്ല. എന്നിരുന്നാലും, സെൻട്രൽ ബോർഡ് ഓഫ് ഡയറക്ട് ടാക്സസ് (CBDT) 11-05-1994 ലെ വളരെ പഴയ സർക്കുലർ പ്രകാരം ആദായനികുതി റെയ്ഡുകളിൽ ഒരു നിശ്ചിത പരിധി വരെ സ്വർണ്ണാഭരണങ്ങളും ആഭരണങ്ങളും പിടിച്ചെടുക്കരുതെന്ന് ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്. വിവാഹിതരായ പുരുഷന്മാർക്കും സ്ത്രീകൾക്കും സ്വർണ്ണാഭരണങ്ങൾക്ക് പ്രത്യേക പരിധികളുണ്ട്.

ഈ നിർദ്ദേശങ്ങൾ അനുസരിച്ച്, വിവാഹിതയായ സ്ത്രീയുടെ 500 ഗ്രാം വരെയുള്ള സ്വർണ്ണാഭരണങ്ങൾ പിടിച്ചെടുക്കുകയോ കൊണ്ടുപോകുകയോ ചെയ്യരുതെന്ന് ആദായനികുതി ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്. കുടുംബത്തിലെ അവിവാഹിതയായ സ്ത്രീക്ക് നിർദ്ദേശിച്ചിരിക്കുന്ന പരിധി 250 ഗ്രാമിൽ കുറവാണ്. എന്നിരുന്നാലും, പുരുഷന്മാർക്ക്, വിവാഹിതരോ അവിവാഹിതരോ ആകട്ടെ, ഒരാൾക്ക് 100 ഗ്രാം സ്വർണം കയ്യിൽ കരുതാം. ഉറവിടം വ്യക്തമാക്കാതെ കൈയില്‍ സൂക്ഷിക്കാവുന്ന സ്വർണത്തിന്‍റെ പരിധിയാണിത്.

പാരമ്പര്യമായി ലഭിച്ച സ്വർണ്ണാഭരണങ്ങളുടെ കാര്യത്തിൽ

പാരമ്പര്യമായി ലഭിച്ച സ്വർണ്ണാഭരണങ്ങളുടെ കാര്യത്തിൽ ആദായനികുതി റിട്ടേണുകൾ പോലുള്ള രേഖാമൂലമുള്ള തെളിവുകൾ ഉപയോഗിച്ച് നിങ്ങൾക്ക് തെളിയിക്കാൻ കഴിയുമെങ്കിൽ പരിധി കവിഞ്ഞാലും ആദായനികുതി പ്രതിനിധികൾക്ക് പാരമ്പര്യമായി ലഭിച്ച ആഭരണങ്ങൾ പിടിച്ചെടുക്കാൻ പാടില്ല. അതുപോലെ, സമ്മാനങ്ങളുടെ കാര്യത്തിലും, സമാനമായ ദാതാവിന്റെ രേഖകൾ സൂക്ഷിക്കേണ്ടതുണ്ട്.

ഏത് വരുമാന സ്രോതസ് വഴിയാണ് സ്വര്‍ണം കൈവശപ്പെടുത്തിയതെന്ന് വ്യക്തമാക്കുകയാണെങ്കില്‍ ഒരാള്‍ക്ക് എത്ര സ്വര്‍ണം വേണമെങ്കിലും കൈവശം വയ്ക്കാമെന്ന് കേന്ദ്ര പ്രത്യക്ഷ നികുതി ബോര്‍ഡ് 2016 ഡിസംബറില്‍ പ്രസിദ്ധീകരിച്ച ഒരു വാര്‍ത്താക്കുറിപ്പില്‍ പറയുന്നു. ആദായ നികുതി നിയമത്തില്‍ ഒരാള്‍ക്ക് സ്വന്തമായി സൂക്ഷിക്കാവുന്ന സ്വര്‍ണത്തിന് പരിധി നിശ്ചയിച്ചിട്ടില്ല. പക്ഷേ നിശ്ചിത പരിധിക്കപ്പുറം സ്വര്‍ണം സൂക്ഷിക്കുന്നുണ്ടെങ്കില്‍ അതിനായുള്ള വരുമാന സ്രോതസ്സ് വ്യക്തമാക്കണമെന്ന് മാത്രം.

നികുതി അടച്ച പണത്തിൽ നിന്നാണ് നിങ്ങൾ ആഭരണം വാങ്ങിയതെങ്കിൽ, അത് വാങ്ങാൻ ഉപയോഗിച്ച പണത്തിന്റെ ഉറവിടം സ്ഥാപിക്കാൻ നിങ്ങൾക്ക് കഴിയുമോ എന്ന് വിഷമിക്കേണ്ട കാര്യമില്ല. എല്ലാ ബില്ലുകളും സൂക്ഷിച്ച് വെച്ചാൽ മതി. നിങ്ങൾ വാങ്ങിയ ആഭരണം മറ്റൊരു ആഭരണമായി മാറ്റിയിട്ടുണ്ടെങ്കിൽ, യഥാർത്ഥ വാങ്ങലിന്റെ ഇൻവോയ്‌സിനൊപ്പം ലേബർ ചാർജുകൾക്കുള്ള ഇൻവോയ്‌സുകളും സൂക്ഷിക്കുന്നതാണ് നല്ലത്.

നടപടികൾ എന്തെല്ലാം..?

നിയമപരമായ പരിധിക്ക് മുകളിൽ സ്വർണം സൂക്ഷിക്കുന്നവർ, അതിന്റെ ഉറവിടം തെളിയിക്കാൻ കഴിയുന്നില്ലെങ്കിൽ, ആദായനികുതി വകുപ്പിന്റെ നടപടികൾക്ക് വിധേയരാകാം. ഇത് ജപ്തി, പിഴ അല്ലെങ്കിൽ നിയമനടപടിയിലേക്കോ നയിച്ചേക്കാം. എന്നാൽ കല്യാണത്തിനോ മറ്റോ സമ്മാനമായി ലഭിച്ച സ്വർണമാണെങ്കിലും വാങ്ങിയ ബില്ലോ, അല്ലെങ്കിൽ ഉപഹാരം നൽകിയതിനുള്ള രേഖകളോ കൈമാറണം.