മുതിർന്ന പൗരന്മാർക്ക് വേറെ ഏത് ബാങ്ക് നൽകും ഇത്രയും പലിശ നിരക്ക്; ഉയർന്ന 4 പലിശ നിരക്കുകളറിയാം

റിസ്കെടുക്കാൻ താൽപര്യപ്പെടാത്ത നിക്ഷേപകർ സുരക്ഷിത താവളമായി ഇന്നും കണക്കാക്കുന്നത് സ്ഥിര നിക്ഷേപങ്ങളാണ്. ഇതിൽ മുതിർന്ന പൗരന്മാരാണ് നിക്ഷേപകരെങ്കിൽ ബാങ്കുകൾ സാധാരണയായി 0.50 ശതമാനം ഉയർന്ന പലിശ നൽകാറുണ്ട്. സ്ഥിര നിക്ഷേപങ്ങളിൽ ഉയർന്ന പലിശ നിരക്ക് നേടാൻ ആഗ്രഹിക്കുന്നവർ മാതാപിതാക്കളുടെ പേരിൽ നിക്ഷേപിച്ച് നേട്ടമുണ്ടാക്കാറുണ്ട്.

നിക്ഷേപിക്കുന്നത് മുതിർന്ന പൗരന്മാരുടെ പണമാണെങ്കിൽ പലരും മുൻനിര ബാങ്കുകളുടെ സുരക്ഷിതത്വം തേടാറുണ്ട്. ഭേദപ്പെട്ട പലിശയ്ക്കൊപ്പം ബാങ്കുകൾ നൽകുന്ന ഉയർന്ന സുരക്ഷിതത്വം കൂടിയാണ് ഇവിടെ പരി​ഗണിക്കപ്പെടുന്നത്. മുതിർന്ന പൗരന്മാർക്കായി നിക്ഷേപിക്കുമ്പോൾ രാജ്യത്തെ മുൻനിര ബാങ്കുകൾ എത്രത്തോളം ഉയർന്ന നിരക്ക് നൽകുന്നു എന്ന് നോക്കാം.

എച്ച്ഡിഎഫ്സി ബാങ്ക്

എച്ച്‌ഡിഎഫ്‌സി ബാങ്ക് മുതിർന്ന പൗരന്മാർക്ക് ഒരു വർഷം മുതൽ 15 മാസം വരെയുള്ള നിക്ഷേപങ്ങളിൽ 7.10 ശതമാനം പലിശ നൽകുന്നുണ്ട്. 15 മുതൽ 18 മാസം വരെയുള്ള എഫ്ഡികളുടെ പലിശ നിരക്ക് 7.60 ശതമാനമായി ഉയരും. 18 മാസം മുതൽ 2 വർഷം 11 മാസം വരെ കാലാവധിയുള്ള നിക്ഷേപത്തിന്റെ പലിശ നിരക്ക് 7.5 ശതമാനമാണ്.

ദീർഘകാലത്തേക്കാണ് എച്ച്ഡിഎഫ്സി ബാങ്ക് ഉയർന്ന പലിശ നൽകുന്നത്. 5-10 വർഷത്തെ കാലാവധിയുള്ള സ്ഥിര നിക്ഷേപത്തിന് ഏറ്റവും ഉയർന്ന നിരക്കായി 7.75 ശതമാനം പലിശ ലഭിക്കും. 4 വർഷം 7 മാസം മുതൽ 55 മാസം വരെയുള്ള കാലയളവിൽ 7.7 ശതമാനം പലിശ നേടാം.

ഐസിഐസിഐ ബാങ്ക്

ഐസിഐസിഐ ബാങ്കിൽ വിവിധ കാലാവധിയിൽ 7 ശതമാനം മുതൽ 7.25 ശതമാനം വരെയാണ് മുതിർന്ന പൗരന്മാർക്ക് ലഭിക്കുന്ന ഉയർന്ന പലിശ. ഒരു വർഷം മുതൽ 15 മാസം വരെ 7.25 ശതമാനം പലിശ ലഭിക്കും. 15 മാസം മുതൽ 2 വർഷം വരെയുള്ള കാലാവധിക്ക് 7.05 ശതമാനമാണ് പലിശ. ദീർഘകാല നിക്ഷേപങ്ങൾക്ക് 7 ശതമാനമാണ് പലിശ.

എസ്ബിഐ

എസ്ബിഐ മുതിർന്ന പൗരന്മാരുടെ സ്ഥിര നിക്ഷേപത്തിന് 7.30 ശതമാനം മുതൽ 7.50 ശതമാനം വരെ പലിശ നൽകുന്നുണ്ട്. ഒരു വർഷം മുതൽ രണ്ട് വർഷം വരെ 7.30 ശതമാനമാണ് പലിശ. 2-3 വർഷത്തേക്ക് 7.5 ശതമാനമാണ് പലിശ നിരക്ക്. 3 മുതൽ 5 വർഷത്തേക്കുള്ള സ്ഥിര നിക്ഷേപങ്ങൾക്ക് 7.25 ശതമാനമാണ് പലിശ നിരക്ക്.

5 വർഷത്തിൽ കൂടുതൽ കാലാവധിയുള്ള സ്ഥിര നിക്ഷേപങ്ങൾക്ക് 7.5 ശതമാനം പലിശ ലഭിക്കും. 400 ദിവസം കാലാവധിയുള്ള അമൃത് കലാഷ് പ്രത്യേക സ്ഥിര നിക്ഷേപ പദ്ധതിയിൽ മുതിർന്ന പൗരന്മാർക്ക് 7.6 ശതമാനം പലിശ നേടാം. പദ്ധതിയുടെ അവസാന തീയതി മാർച്ച് 31 ആണ്.

ബാങ്ക് ഓഫ് ബറോഡ

7.35 ശതമാനം മുതൽ 7.75 ശതമാനം വരെ പലിശ നിരക്കിലാണ് ബാങ്ക് ഓഫ് ബറോഡ മുതിർന്ന പൗരന്മാർക്ക് സ്ഥിര നിക്ഷേപം ഓഫർ ചെയ്യുന്നത്. ഒന്ന് മുതൽ രണ്ട് വർഷം വരെ മുതിർന്ന പൗരന്മാർക്ക് ബാങ്ക് 7.35 ശതമാനം പലിശയും കാലാവധി 2 മുതൽ 3 വർഷത്തേക്ക് 7.75 ശതമാനവുമാണ് പലിശ നിരക്ക്.

399 ദിവസത്തേക്കുള്ള ബറോഡ തിരംഗ പ്ലസ് ഡെപ്പോസിറ്റ് സ്കീം എന്ന പ്രത്യേക സ്ഥിര നിക്ഷേപ പദ്ധതിയിൽ നിന്ന് മുതിർന്ന പൗരന്മാർക്ക് 7.65 ശതമാനം പലിശ ലഭിക്കുന്നുണ്ട്.