ശമ്പളക്കാരൻ 5,000 രൂപ മാസത്തിൽ നിക്ഷേപിക്കാൻ തീരുമാനിച്ചു; മികച്ച നിക്ഷേപങ്ങൾ ഏതെല്ലാം

ജോലി കിട്ടിയ ഉടനെയുള്ള ചെലവാക്കലുകൾക്ക് ശേഷമുള്ള തിരിച്ചറിവുകളിലേക്ക് ഭാവിയിലേക്കൊരു നിക്ഷേപം ആവശ്യമാമെന്ന് പലരും തിരിച്ചറിയുന്നത്. ശമ്പളക്കാരായതിനാൽ മാസത്തിൽ ചിട്ടിയായ നിക്ഷേപം നടത്താൻ സാധിക്കുന്നവരാണെങ്കിലും പലരും നിക്ഷേപത്തെ പറ്റി മറക്കുന്നതാണ് പതിവ്.

പിന്നീട് നിക്ഷേപത്തിനായി തിരിയുമ്പോൾ തെറ്റായ നിക്ഷേപ തീരുമാനങ്ങളിൽപ്പെട്ട് സാമ്പത്തിക നഷ്ടവും ഉണ്ടാവും. മാസത്തിൽ 5,00 0 രൂപ നിക്ഷേപത്തിലേക്ക് മാറ്റിവെയ്ക്കാൻ തീരുമാനിച്ച വ്യക്തിക്ക് മുന്നിൽ ആവർത്തവ നിക്ഷേപവും എസ്ഐപി വഴി മ്യൂച്വൽ ഫണ്ടും മുന്നോട്ട് വെയ്ക്കുന്നു. രണ്ടിന്റെയും പ്രത്യേകതകൾ നോക്കി ഏതാണ് മികച്ചതെന്ന് നോക്കാം.

എസ്ഐപി

സിസ്റ്റമാറ്റിക്ക് ഇന്‍വസ്റ്റ്മെന്റ് പ്ലാന്‍ അഥവാ എസ്ഐപി എന്നത് ഒരു നിക്ഷേപ രീതിയാണ്. പ്രതിവാരമോ പ്രതിമാസമോ എന്ന കണക്കില്‍ നിശ്ചിത കാലയളവിലേക്ക് സമയ ബന്ധിതമായി ചെറിയ തുക നിക്ഷേപിക്കുന്ന രീതിയാണിത്. വിപണിയില്‍ അസ്ഥിരതയും ചാഞ്ചാട്ടവും പ്രകടമാകുമ്പോള്‍ ദീര്‍ഘകാലാടിസ്ഥാനത്തില്‍ തന്നെ ഏറ്റവും സുരക്ഷിതമെന്ന് തെളിയിക്കപ്പെട്ടിട്ടുള്ള നിക്ഷേപ സംവിധാനമാണിത്.  

ആവർത്തന നിക്ഷേപം

സമ്പാദ്യശീലം വളര്‍ത്താന്‍ സഹായിക്കുന്ന നിക്ഷേപ മാര്‍ഗങ്ങളിലൊന്നാണ് ആവര്‍ത്തന നിക്ഷേപം. ഒരു നിശ്ചിത കാലയളവില്‍ പതിവായി പണം മിച്ചം പിടിക്കാനും അതില്‍ നിന്നും പലിശ വരുമാനം നേടാനും ആഗ്രഹിക്കുന്നവര്‍ക്കുള്ള മികച്ച അവസരമാണിത്. കാലാവധി പൂര്‍ത്തിയാകുമ്പോള്‍ സ്വരൂപിച്ച തുകയും അതിന്മേലുള്ള പലിശയും ചേര്‍ത്ത് ബാങ്ക് മടക്കിനല്‍കും. ആവർത്തന നിക്ഷേപത്തിന്റെ ചുരുങ്ങിയ കാലാവധി 6 മാസവും പരമാവധി 10 വര്‍ഷവുമാണ്. 100 രൂപ മുതൽ നിക്ഷേപം തുടങ്ങാം.

സമാനതകൾ

രണ്ട് നിക്ഷേപങ്ങളും നിശ്ചിത ഇടവേളകളിൽ നിക്ഷേപിക്കേണ്ടതാണ്. എസ്ഐപിയും ആവർത്തന നിക്ഷേപവും നിക്ഷേപകന്റെ താൽപര്യം അനുസരിച്ച് പിൻവലിക്കാം. മ്യൂച്വൽ ഫണ്ടിൽ സാധാരണയായി 365 ദിവസത്തിനുള്ളിൽ നിക്ഷേപം പിൻവലിച്ചാൽ 1 ശതമാനം എക്സിറ്റ് ലോഡ് (പിഴ) ഉണ്ടാകും. ആവർത്തന നിക്ഷേപത്തിൽ പിഴയും നേരിടണം. നിക്ഷേപം മുടങ്ങിയാൽ രണ്ട് നിക്ഷേപങ്ങളും റദ്ദാവും.

വ്യത്യാസങ്ങൾ

ആവർത്തന നിക്ഷേപം ഉറപ്പുള്ള വരുമാനം നൽകുന്നതാണ്. നിക്ഷേപകരുടെ അപകടസാധ്യതയെ ആശ്രയിച്ച് മ്യൂച്വൽ ഫണ്ട് നിക്ഷേപം ഡെബ്റ്റിലോ ഇക്വിറ്റിയിലോ ആയിരിക്കാം. ആവർത്തന നിക്ഷേപ പദ്ധതിക്ക് പലിശ നിരക്ക് നിശ്ചയിച്ചിരിക്കുന്നതിനാൽ നിക്ഷേപകർക്ക് കാലാവധി അവസാനിക്കുമ്പോൾ എന്ത് തുക ലഭിക്കുമെന്ന് അറിയാം. മറുവശത്ത്, എസ്‌ഐ‌പികളിൽ നിന്നുള്ള വരുമാനം വിപണിയുമായി ബന്ധപ്പെട്ടിരിക്കുന്നു. വിപണികൾ ഉയരുമ്പോൾ കൂടുതൽ പണം നേടാൻ സാധിക്കും. വിപണി ഇടിയുമ്പോൾ നേരെ തിരിച്ചാകും ഫലം. 

കാൽക്കുലേറ്റർ

മാസത്തിൽ 5,000 രൂപ 5 വർഷത്തേക്ക് ആവർത്തന നിക്ഷേപത്തിലേക്ക് മാറ്റുമ്പോൾ ലഭിക്കുന്ന റിട്ടേൺ നോക്കാം. നിലവിൽ മിക്ക ബാങ്കുകളും 7 ശതമാന പലിശ വർഷത്തേക്ക് നൽകുന്നു. 5,000 രൂപ 7 ശതമാനം പലിശ നിരക്കിൽ ആവർത്ത നിക്ഷേപമിട്ടാൽ 5 വർഷത്തിന് ശേഷം 3,59,663.95 രൂപ ലഭിക്കും. നിക്ഷേപ തുക 3 ലക്ഷം രൂപയാണ്. പലിശ വരുമാനമായി ‌59,663.95 രൂപ ലഭിക്കും.
‌
എസ്ഐപിയിൽ ശരാശരി വരുമാനം 12 ശതമാനമെന്ന് പ്രതീക്ഷിക്കാം. പ്രതിമാസം 5,000 രൂപയുടെ എസ്ഐപി നടത്തിയാൽ നിക്ഷേപ തുക 3 ലക്ഷം രൂപയാണ്. ഇതിൽ നിന്നുള്ള ആദായം 1,12,432 രൂപയായിരിക്കും. കാലാവധിയിൽ 4,12,432 രൂപ ലഭിക്കും.

മികച്ചത് എസ്ഐപി

ആര്‍ഡി നിക്ഷേപങ്ങളില്‍ എന്നപോലെ എസ്‌ഐപി രീതിയിലും ചുരുങ്ങിയത് 100 രൂപയില്‍ നിക്ഷേപം ആരംഭിക്കാനാകും. ഉയര്‍ന്ന ആദായത്തിനുള്ള സാധ്യത എസ്‌ഐപി അധിഷ്ഠിത പദ്ധതികളില്‍ കൂടുതലായതിനാല്‍ മേല്‍ക്കൈ ലഭിക്കുന്നു. മുന്‍കാല ചരിത്രം നോക്കിയാല്‍ 5 വര്‍ഷ കാലയളവില്‍ ശരാശരി 5.8 ശതമാനം പലിശയാണ് ആര്‍ഡി നിക്ഷേപങ്ങളില്‍ നിന്നും ലഭിക്കുന്നത്. ദീർഘകാലത്തേക്ക് 12 ശതമാനം റിട്ടേൺ മ്യൂച്വൽ ഫണ്ടിലെ എസ്ഐപി നിക്ഷേപകർക്ക് ലഭിച്ചിട്ടുണ്ട്.