മൾട്ടി ഡിവിഷനോ സാധാരണ ചിട്ടിയോ; എവിടെ കിട്ടും ഉയർന്ന ലാഭ വിഹിതം

കെഎസ്എഫ്ഇ ബ്രാ‍ഞ്ചുകളിൽ മൾട്ടി ഡിവിഷൻ ചിട്ടിയും സാധാരണ ചിട്ടിയും നടത്താറുണ്ട്. എന്താണ് ഇവ രണ്ടും തമ്മിലുള്ള വ്യത്യാസം. ഒരേ തുക മാസ അടവും കാലവധിയുമുള്ള സാധാരണ ചിട്ടിയിൽ ചേരുന്നതാണോ മൾട്ടിഡിവിഷൻ ചിട്ടിയിൽ ചേരുന്നതാണോ ലാഭകരം എന്ന് പലരുടെയും മനസിലുള്ള ചിന്തയാണ്.

ചിട്ടികളിലെ ആകർഷണീയത ലാഭ വിഹിതമാണ്. എവിടെ മികച്ച ലാഭ വിഹിതം കിട്ടുന്നോ അവിടെയാണ് നേട്ടം. മൾട്ടി ഡിവിഷൻ ചിട്ടിയിലെയും സാധാരണ ചിട്ടിയിലെയും ലാഭ വിഹിതം കണക്കാക്കുന്നത് എങ്ങനെയെന്ന് നോക്കാം.

സാധാരണ ചിട്ടിയിൽ

സാധരാണ ചിട്ടികളിൽ ലാഭ വിഹിതം കണക്കാക്കുന്നത് എങ്ങനെയാണെന്ന് നോക്കാം. ചിട്ടി കാലാവധി എത്ര മാസമാണോ അത്രയും അം​ഗങ്ങളാണ് സാധാരണ ചിട്ടിയിൽ ഉണ്ടാവുക. ഒരു മാസത്തില്‍ ഒരാള്‍ വീതമാണ് സാധാരണ ചിട്ടിയിൽ ലേലം വിളിക്കുന്നത്.

എത്ര രൂപ കിഴിവിലാണോ ചിട്ടി വിളിച്ചത്, ഇതിൽ നിന്ന് കെഎസ്എഫ്ഇ കമ്മീഷനും കുറച്ച് ബാക്കി വരുന്ന തുക ചിട്ടിയിലുള്ളവര്‍ക്ക് വീതിച്ചു നൽകുന്നതാണ് രീതി. മാസ അടവിൽ നിന്ന് ഈ വിഹിതം കുറച്ചാണ് മാസ അടവ് വരിക. ഒരു ഉദാഹരണം നോക്കാം.

10,000 രൂപ മാസ അടവുള്ള 50 മാസ കാലാവധിയുള്ള 5 ലക്ഷത്തിന്റെ ചിട്ടിയാണ് പരിശോധിക്കുന്നത്. പരമാവധി വിളിച്ചെടുക്കാൻ പറ്റുന്ന 30 ശതമാനം കിഴിവില്‍ ചിട്ടി പോയാൽ, 1.50 ലക്ഷം രൂപ കിഴിവ് വരും.

ഇതിനൊപ്പം ചിട്ടിത്തുകയുടെ 5 ശതമാനം കെഎസ്എഫ്ഇ കമ്മീഷൻ 25,000 രൂപ കുറച്ചാൽ 50 ചിറ്റാളന്മാർക്കായി 1,25,000 രൂപ ലാഭ വിഹിതം ലഭിക്കും. ഇത് 50 പേർക്ക് വീതിച്ചാൽ ഒരാൾക്ക് 2,500 രൂപ ലാഭ വിഹിതം ലഭിക്കും. ഇതുപ്രകാരം രണ്ടാം മാസം മുതൽ 7,500 രൂപ അടച്ചാൽ മതി.

10ാം മാസത്തിന് ശേഷം 1,00,000 രൂപ കിഴിവില്‍ ചിട്ടി ലേലത്തിൽ പോയാൽ കമ്മീഷനും കഴിച്ച് 75,000 രൂപയാണ് ആകെ ലാഭ വിഹിതമുണ്ടാവുക. ഇത് 50 പേര്‍ക്ക് വീതിച്ചാൽ ഒരാൾക്ക് 1,500 രൂപ ലഭിച്ചു. തൊട്ടടുത്ത മാസം 8,500 രൂപയാണ് അടവ് വരിക.

20ാം മാസം ചിട്ടി 75,000 രൂപ കിഴിവില്‍ ലേലം വിളിച്ചാൽ 50,000 രൂപയാകും ആകെ ലാഭ വിഹിതം. ഇത് പ്രകാരം ഒരാൾക്ക് ലഭിക്കുന്ന ലാഭ വിഹിതം 1,000 രൂപയാകും. ചിട്ടികളിലെ ലാഭ വിഹിതം നേരത്തെ കണക്കാകാൻ സാധിക്കില്ല, മാസത്തിൽ ലേലം വിളിച്ചെടുക്കുന്നതിന് അനുസരിച്ചാണ് ലാഭ വിഹിതം ലഭിക്കുക.

മൾട്ടി ഡിവിഷൻ ചിട്ടി

മൾട്ടി ഡിവിഷൻ ചിട്ടയിൽ ലാഭ വിഹിതം കാണക്കാക്കുന്നതിൽ കുറച്ചു വ്യത്യാസങ്ങളുണ്ട്. സാധാരണ ചിട്ടിയുടെ നാല് ഡിവിഷനുകളാണ് പൊതുവെ മൾട്ടി ഡിവിഷൻ ചിട്ടിയുണ്ടാവുക. കാലാവധിയുടെ നാലിരട്ടി അം​ഗങ്ങൾ ചിട്ടിയിലുണ്ടാകും. മൾട്ടി ഡിവിഷൻ ചിട്ടിയിൽ 1 നറുക്കും 3 ലേലവുമാണ് മാസത്തിൽ നടക്കുക. ഈ നറുക്ക് ലഭിക്കുന്ന തുകയിൽ നിന്ന് ലാഭ വിഹിതത്തിലേക്ക് നീക്കിയിരിപ്പുണ്ടാകുന്നില്ല, എന്നാൽ നറുക്ക് ലഭിക്കുന്നയാൾക്ക് കൃത്യമായ ലാഭ വിഹിതം ലഭിക്കുകയും ചെയ്യും. ഒരു ഉദാഹരണം നോക്കാം.

10,000 രൂപ മാസ അടവുള്ള 50 മാസ കാലാവധിയുള്ള 5 ലക്ഷത്തിന്റെ മള്‍ട്ടിഡിവിഷന്‍ ചിട്ടി പരിശോധിക്കാം. 1 നറുക്ക് ലഭിക്കുന്നയാൾക്ക് 5 ശതമാനം കമ്മീഷന്‍ കഴിച്ച് മുഴുവന്‍ പണവും ലഭിക്കും. ഇവിടെ ഡിവിഡന്റിലേക്ക് നീക്കാൻ പണമില്ല. 30 ശതമാനം കിഴിച്ച് 1,50,000 രൂപ കുറച്ച് വിളിച്ചാല്‍ 25,000 രൂപ കമ്മീഷനും കുറച്ച് 1,25,000 രൂപ ഒരു ലേലത്തിൽ നിന്ന് ലാഭ വിഹിതമായി ലഭിക്കും.

ഇത്തരത്തിൽ മൂന്ന് ലേലങ്ങൾ മാസത്തിൽ നടക്കും. ഇത് അനുസരിച്ച് 3,75,000 രൂപ മാസത്തിൽ ലാഭ വിഹിതം ലഭിക്കും. ഇത് 200 (50*4) പേർക്ക് വീതിച്ചാൽ മാസത്തിൽ ഒരാൾക്ക് 1,875 രൂപ ലഭിക്കും. 30 ശതമാനം കിഴിവിൽ ചിട്ടി ലേലത്തിൽ പോകുന്ന മാസം 8,125 രൂപ അടയ്ക്കേണ്ടി വരും.