നിങ്ങളുടെ സിബിൽ സ്കോർ എത്രയാണ്? സ്കോർ കുറവാണെങ്കിൽ വായ്പ തള്ളിയേക്കും: എങ്ങനെ പരിശോധിക്കാം?

നിങ്ങളുടെ സാമ്പത്തിക ആരോ​ഗ്യം മനസിലാക്കുന്നതിനുള്ള പ്രധാന ഘടകമാണ് ക്രെഡിറ്റ് സ്കോർ. ഒരു ശക്തമായ ക്രെഡിറ്റ് സ്കോർ നിലനിർത്തേണ്ടത് അത്യാവശ്യമാണ്. കാരണം മികച്ച ക്രെഡിറ്റ് സ്കോറുണ്ടെങ്കിൽ മാത്രമേ കുറഞ്ഞ നിരക്കിൽ വായ്പകൾ, ക്രെഡിറ്റ് കാർഡുകൾ എന്നിവ നേടാൻ സാധിക്കുകയുള്ളൂ. അതിനാൽ തന്നെ നിങ്ങളുടെ ക്രെഡിറ്റ് സ്കോർ ഇടക്കിടെ പരിശോധിക്കുന്നത് നല്ലതാണ്.

ക്രെഡിറ്റ് ഇൻഫർമേഷൻ ബ്യൂറോ (ഇന്ത്യ) ലിമിറ്റഡ് നൽകുന്ന ഒരു സിബിൽ സ്കോർ, നിങ്ങളുടെ ക്രെഡിറ്റ് യോഗ്യതയെ പ്രതിഫലിപ്പിക്കുന്ന ഒരു മൂന്നക്ക സംഖ്യയാണ്. ഇത് പ്രധാനമായും നിങ്ങളുടെ സാമ്പത്തിക സ്ഥിതിയെ മനസിലാക്കാൻ വേണ്ടി ബാങ്കുകളും, ധനകാര്യ സ്ഥാപനങ്ങളും ഉപയോ​ഗിക്കുന്നു. ഒരു വായ്പക്കോ അല്ലെങ്കിൽ ക്രെഡിറ്റ് കാർഡിനോ വേണ്ടി സമീപിക്കുമ്പോൾ ഈ സിബിൽ സ്കോറിനെ കുറിച്ച് പരിശോധിക്കും. 700 ന് മുകളിലാണ് നിങ്ങളുടെ സിബിൽ സ്കോറുള്ളതെങ്കിൽ അത് നല്ലതാണ്.

നിങ്ങളുടെ സിബിൽ സ്കോർ സൗജന്യമായി പരിശോധിക്കുന്നത് എങ്ങനെ?

• ആദ്യം ഔദ്യോഗിക CIBIL വെബ്‌സൈറ്റ് സന്ദർശിക്കുക. അതിൽ "നിങ്ങളുടെ CIBIL സ്കോർ നേടുക" എന്ന വിഭാഗത്തിലേക്ക് എത്താം.
• ഇനി നിങ്ങളുടെ പേര്, കോൺടാക്റ്റ് നമ്പർ, ഇമെയിൽ വിലാസം തുടങ്ങിയ വിവരങ്ങൾ നൽകുന്ന ഒരു ഫോം പൂരിപ്പിക്കുക. തുടരുക" എന്ന ഓപ്ഷൻ ക്ലിക്കുചെയ്യുക.
• നിങ്ങളുടെ പാൻ നമ്പർ കൃത്യമായി നൽകുക.
• നിങ്ങളുടെ വായ്പകളെയും ക്രെഡിറ്റ് കാർഡുകളെയും കുറിച്ചുള്ള ചോദ്യങ്ങൾക്ക് മറുപടി നൽകുക.
• ഒറ്റത്തവണ സൗജന്യ റിപ്പോർട്ടിനായി തിരഞ്ഞെടുത്താൽ ഒരു സ്ഥിരീകരണ സന്ദേശം വരും.
• അതിനു ശേഷം സ്ഥിരീകരണത്തിനായി ഒരു ലിങ്ക് ലഭിക്കും. അതിൽ ക്ലിക്കുചെയ്യുക, ശേഷം ഒടിപി നൽകുക. ഇത്രയും ചെയ്താൽ നിങ്ങളുടെ പാസ്‌വേഡ് മാറ്റാം.
• അതിനു ശേഷം വീണ്ടും ലോഗിൻ ചെയ്യുക. നിങ്ങളുടെ സ്വകാര്യ വിവരങ്ങൾ ഓട്ടോമാറ്റിക്കലി ദൃശ്യമാവും. നിങ്ങളുടെ മൊബൈൽ നമ്പർ നൽകി "സബ്മിറ്റ്" എന്ന ഓപ്ഷനിൽ ക്ലിക്ക് ചെയ്യുക.
• നിങ്ങളുടെ ഡാഷ്‌ബോർഡിൽ നിങ്ങളുടെ സിബിൽ സ്കോറും ക്രെഡിറ്റ് റിപ്പോർട്ടും കാണാൻ സാധിക്കും. നിങ്ങളുടെ ക്രെഡിറ്റ് ഹിസ്റ്ററി വിശദമായി പരിശോധിക്കാൻ റിപ്പോർട്ട് ഡൗൺലോഡ് ചെയ്യുക.

സിബിൽ സ്കോർ പരിശോധിക്കുന്നത് എന്തിന്?

നിങ്ങളുടെ സിബിൽ സ്കോർ ഓരോ മാസവും പരിശോധിക്കുന്നതാണ് കൂടുതൽ മികച്ചത്. ബാങ്കുകളും എൻബിഎഫ്സികളും ക്രെഡിറ്റ് വിവരങ്ങൾ പതിവായി അപ്ഡേറ്റ് ചെയ്യുന്നു, അതിനാൽ ചില അപകടങ്ങൾ ഒഴിവാക്കാൻ സാധിക്കുന്നു. അവ എന്തെല്ലാമെന്ന് അറിയാം;

• നിങ്ങളുടെ റിപ്പോർട്ടിലെ തെറ്റുകൾ കണ്ടെത്തി തിരിച്ചറിയുക.
• തിരിച്ചടവ് പാറ്റേണുകൾ ട്രാക്ക് ചെയ്ത് നിങ്ങളുടെ സ്കോർ മെച്ചപ്പെടുത്താൻ ശ്രമിക്കുക.
• നഷ്ടപ്പെട്ട പേയ്‌മെന്റുകൾ അല്ലെങ്കിൽ ഉയർന്ന ക്രെഡിറ്റ് ഉപയോഗം പോലുള്ള കാര്യങ്ങൾ തിരിച്ചറിയുക. ഇവയെല്ലാം നിങ്ങളുടെ ക്രെഡിറ്റ് ഹെൽത്തിനെ ബാധിക്കുന്നവയാണ്.

പുതിയ മാറ്റങ്ങളുമായി ഇപിഎഫ്ഒ: യുഎഎൻ എളുപ്പത്തിൽ വീട്ടിലിരുന്ന് കൊണ്ട് ജനറേറ്റ് ചെയ്യാം, കൂടുതൽ അറിയാം

മികച്ച സിബിൽ സ്കോർ നിലനിർത്തുന്നത് എങ്ങനെ?

1. ഇഎംഐകളും ക്രെഡിറ്റ് കാർഡ് ബില്ലുകളും കൃത്യസമയത്ത് അടയ്ക്കാൻ ശ്രമിക്കുക.

2. നിങ്ങളുടെ ലഭ്യമായ ക്രെഡിറ്റ് പരിധിയുടെ 30% ൽ താഴെ മാത്രം ഉപയോഗിക്കുക. ഇത് ഒരു പരിധി വരെ നിങ്ങൾക്ക് മെച്ചപ്പെട്ട സ്കോർ വാ​ഗ്ദാനം ചെയ്യും.

3. ഒരേ സമയം ഒന്നിലധികം വായ്പകൾ അപേക്ഷിക്കുന്നത് ഒഴിവാക്കുക.

4. ക്രെഡിറ്റ് റിപ്പോർട്ട് പരിശോധിച്ച് തെറ്റുകൾ ഇല്ലെന്ന് ഉറപ്പാക്കുക. പിശകുകൾ കണ്ടെത്തിയാൽ അത് റിപ്പോർട്ട് ചെയ്യുക.