3 വര്‍ഷം കൊണ്ട് പത്ത് ലക്ഷം രൂപ പോക്കറ്റിലെത്തും; അറിയാം ഈ പോസ്റ്റ് ഓഫീസ് പദ്ധതി

നിക്ഷേപകർക്ക് മുന്നിൽ നിരവധി അവസരങ്ങളുണ്ടെങ്കിലും എല്ലാതരം നിക്ഷേപങ്ങളും എല്ലാവർക്കും അനുയോജ്യമാകണമെന്നില്ല. റിസ്കെടുക്കാനുള്ള ശേഷി നിക്ഷേപത്തിൽ പ്രധാനഘടകമാണ്. സ്റ്റോക്ക് മാർക്കറ്റ്, മ്യൂച്വൽ ഫണ്ട് തുടങ്ങിയ ഓഹരി അധിഷ്ഠിത നിക്ഷേപങ്ങൾ തിരഞ്ഞെടുക്കുന്നവർ വിപണി ഇടിയുമ്പോഴുണ്ടാകുന്ന നഷ്ട സാധ്യത കൂടി പരി​ഗണിക്കണം. റിസ്കെടുക്കാൻ സാധിക്കാത്തവർക്ക് പരമ്പരാ​ഗത നിക്ഷേപങ്ങളും പോസ്റ്റ് ഓഫീസ് പദ്ധതികളും തിരഞ്ഞെടുക്കാവുന്നതാണ്. 

പോസ്റ്റ് ഓഫീസ് ലഘു സമ്പാദ്യ പദ്ധതികളിൽ വ്യത്യസ്ത ലക്ഷങ്ങൾക്കുള്ള നിക്ഷേപങ്ങളുണ്ട്. ഇത്തരത്തിൽ പെട്ടന്ന് നല്ലൊരു തുക ആവശ്യമുള്ളൊരാൾക്ക് പോസ്റ്റ് ഓഫീസ് ടൈം ഡെപ്പോസിറ്റ് സ്‌കീം തീരഞ്ഞെടുക്കാം. ഈ പദ്ധതി പ്രകാരം പ്രകാരം നിക്ഷേപകന് 3 വര്‍ഷം കൊണ്ട് 10 ലക്ഷം രൂപ നേടാന്‍ സാധിക്കും. പദ്ധതിയുടെ വിശദാംശങ്ങളിലേക്ക് ആദ്യം കടക്കാം. 

പദ്ധതി വിശദാംശങ്ങൾ

രാജ്യത്ത് ഏത് പോസ്റ്റ് ഓഫീസ് വഴിയും ഏതൊരാൾക്കും ചേരാൻ പറ്റുന്ന പദ്ധതിയാണിത്. പ്രായ പരിധി വ്യത്യാസങ്ങളില്ല. 10 വയസിന് മുകളിൽ പ്രായമുള്ളവർക്ക് സ്വന്തം പേരിലും മറ്റുള്ളവർക്കായി രക്ഷിതാക്കൾക്കും അക്കൗണ്ട് ആരംഭിക്കാവുന്നതാണ്. ഒരാൾക്ക് ഒന്നിൽ കൂടുതൽ പോസ്റ്റ് ഓഫീസ് ടൈം ഡെപ്പോസിറ്റ് അക്കൗണ്ട് ആരംഭിക്കാനാകും.

1,000 രൂപ മാത്രമാണ് നിക്ഷേപം ആരംഭിക്കാൻ ആവശ്യമായ തുക. പരമാവധി നിക്ഷേപത്തിന് പരിധി നിശ്ചയിട്ടുമില്ല. 100 രൂപയുടെ ​ഗുണിതങ്ങളായി എത്ര തുക വേണമെങ്കിലും നിക്ഷേപം ഉയർത്താം. 

പലിശ നിരക്ക് പരിശോധിക്കുകയാണെങ്കിൽ സ്ഥിര നിക്ഷേപ കാറ്റ​ഗറിയിൽ പൊതുമേഖലാ ബാങ്കുകളെക്കാൾ പലിശ നൽകുന്നുണ്ട്. 1, 2, 3, 5 വർഷങ്ങളിലായാണ് നിക്ഷേപം സ്വീകരിക്കുക. 1,2,3 വർഷ കാലാവധിയുള്ള നിക്ഷേപങ്ങൾക്ക് 5.50 ശതമാനവും 5 വർഷത്തെ നിക്ഷേപത്തിന് 6.70 ശതമാനവും പലിശ ലഭിക്കും. മുതിർന്ന പൗരന്മാർക്കും ഇതേ നിരക്കാണ് ലഭിക്കുക.

5 വർഷ കാലാവധിയിൽ പോസ്റ്റ് ഓഫീസ് ടെെം ഡെപ്പോസിറ്റിൽ നിക്ഷേപിച്ചാൽ ആദായ നികുതി നിയമത്തിലെ സെക്ഷൻ 80സി പ്രകാരമുള്ള നികുതിയിളവ് ലഭിക്കും. 

കാൽക്കുലേറ്റർ

ഇതിനായി പോസ്റ്റ് ഓഫീസില്‍ ഒരു ടൈം ഡെപ്പോസിറ്റ് അക്കൗണ്ട് എടുക്കണം. ഒറ്റത്തവണയാണ് പദ്ധതിയില്‍ നിക്ഷേപിക്കാന്‍ സാധിക്കുക. അക്കൗണ്ടില്‍ 8.50 ലക്ഷം രൂപയാണ് നിക്ഷേപിക്കേണ്ടത്. മൂന്ന വര്‍ഷത്തേക്ക് 5.5 ലക്ഷം രൂപയാണ് പലിശ നിരക്ക് വാഗ്ദാനം ചെയ്യുന്നത്. ഇതുപ്രകാരം മൂന്ന് വര്‍ഷ കാലാവധിക്ക് ശേഷം 10,01,358 രൂപ ലഭിക്കും. 1,51,358 രൂപയാണ് പലിശയായി ലഭിക്കുന്നത്.

നിക്ഷേപം 5 വര്‍ഷം നീട്ടിയാല്‍ 11,16,957 രൂപ ലഭിക്കും. 5 വർഷമാണ് നിക്ഷേപത്തിന്റെ കാലാവധിയെങ്കിലും 18 മാസത്തേക്ക് നീട്ടാൻ സാധിക്കും. ഇതുപ്രകാരം 6 വര്‍ഷത്തേക്ക് നീട്ടിയാല്‍ 11,76,668 രൂപ ലഭിക്കും. 3,29,668 രൂപയാണ് പലിശ ഇനത്തില്‍ ലഭിക്കുന്നത്.

നേരത്തെ പിൻവലിക്കൽ

നിക്ഷേപം ആരംഭിച്ച് 6 മാസത്തിന് ശേഷം മാത്രമെ പിൻവലിക്കാൻ സാധിക്കുകയുള്ളൂ. 6 മാസത്തിനും 1 വർഷത്തിനും ഇടയിൽ പിൻവലിച്ചാൽ സേവിം​ഗ്സ് അക്കൗണ്ട് പലിശ മാത്രമാണ് നിക്ഷേപകന് ലഭിക്കുക. നിലവിൽ 4 ശതമാനമാണ് സേവിം​ഗ്സ് ബാങ്ക് പലിശയായി പോസ്റ്റ് ഓഫീസ് നൽകുന്നത്. 2,3,5 വർഷത്തേക്കുള്ള ടൈം ഡെപ്പോസിറ്റ് 1 വർഷത്തിന് ശേഷം പിൻവലിച്ചാൽ പലിശയിൽ 2 ശതമാനം കുറവ് വരുത്തും. കാലാവധി നീട്ടിയ നിക്ഷേപമാണെങ്കിൽ നിബന്ധനകളില്ലാതെ എപ്പോൾ വേണമെങ്കിലും പിൻവലിക്കാം.