40-കാരന്റെ വിരമിക്കൽ പ്ലാനിം​ഗ് എങ്ങനെ; നാലം​ഗ കുടുംബത്തിന് വിരമിക്കൽ കാലത്ത് എത്ര രൂപ ആവശ്യമായി വരും

ഓരോ വ്യക്തിയുടെയും വിരമിക്കൽ കാല പ്ലാനിം​ഗ് എന്നത് അവരവരുടെ ജീവിത ശൈലിയെ ആശ്രയിച്ചിരിക്കും. ജീവിതശൈലി ചെലവുകളോടൊപ്പം താമസിക്കുന്ന സ്ഥലം, പണപ്പെരുപ്പ നിരക്ക്, റിട്ടയർമെന്റിന് ശേഷമുള്ള സാമ്പത്തിക ലക്ഷ്യങ്ങൾ, ബാധ്യതകൾ എന്നീ ഘടകങ്ങൾ വിരമിക്കൽ കാലത്ത് ആവശ്യമായ പണത്തിൽ വ്യത്യാസം വരും.

ഈ ചെലവുകൾ ഓരോ വ്യക്തിയിൽ നിന്നും വ്യത്യസ്തമായതിനാൽ വിരമിക്കൽ പ്ലാനിം​ഗ് വ്യത്യസ്തമാകുന്നത്. എന്നാൽ നാല് അംഗങ്ങളുള്ള ഒരു കുടുംബം നിലവിലെ സാമ്പത്തിക ആവശ്യങ്ങൾ അടിസ്ഥാനമാക്കി വിരമിക്കൽ കാല തുക കണ്ടെത്തുമ്പോൾ എന്തൊക്കെ ശ്രദ്ധിക്കണമെന്ന് നോക്കാം.

ജീവിതശൈലി ചെലവ് വിലയിരുത്തുക

നിലവിലെ ജീവിതശൈലിയിൽ മാസത്തിൽ എത്ര രൂപ ചെലവാക്കുന്നുണ്ടെന്ന് ആദ്യം മനസിലാക്കേണ്ടതുണ്ട്. ശേഷം വിരമിക്കലിന് എത്ര സമയമുണ്ടെന്ന് കൂടി നിർണയിച്ചാൽ വിരമിച്ചതിന് ശേഷം നിലവിലെ ജീവിതശൈലി നിലനിർത്താൻ ആവശ്യമായ ഏകദേശ ചെലവ് എത്രയെന്ന് കണ്ടെത്താനാകും. വിരമിക്കൽ സമയം വരെയുള്ള പണപ്പെരുപ്പം അടിസ്ഥാനമാക്കിയാണ് ഈ തുക കണ്ടെത്തേണ്ടത്. വിരമിച്ച ശേഷം വരുത്താവുന്ന ജീവിത ശൈലി മാറ്റങ്ങളിലെ ചെലവും ഇതോടൊപ്പം കണക്കാക്കാം.

വിരമിക്കലിന് ശേഷമുള്ള ചെലവുകൾ

റിട്ടയർമെന്റിന് ശേഷം ജീവിതം സുഖരമാക്കാൻ വിരമിക്കലിന് ശേഷം എന്തൊക്കെ ചെലവുകൾ വരുമെന്ന് പരിശോധിക്കണം. പങ്കാളിയും കുട്ടികളും ഉൾപ്പെടെ നാല് അംഗ കുടുംബമാണെങ്കിൽ അവരുമായി ബന്ധപ്പെട്ട ചെലവുകളും ഉൾപ്പെടുത്തണം.

വിരമിക്കൽ പ്ലാനിം​ഗ് നടത്തുന്ന വ്യക്തിയെ സാമ്പത്തികമായി ആശ്രയിക്കുമെന്നവരാണെങ്കിൽ വാടക, വൈദ്യുതി ബിൽ, ഭക്ഷണം, യാത്ര തുടങ്ങിയ എല്ലാ ചെലവുകളുടെ തുകയും സ്വയം കണ്ടെത്തണം. ഇവിടെയും പണപ്പെരുപ്പം കണക്കാക്കണം.

ആവശ്യമായ ചെലവ് കണ്ടെത്തിയ ശേഷം പണം എങ്ങനെ നിക്ഷേപിക്കണമെന്ന് തീരുമാനിക്കാം. റിസ്കെടുക്കാനുള്ള ശേഷി, നിക്ഷേപ കാലയളവ്, മറ്റ് സാമ്പത്തിക ലക്ഷ്യങ്ങൾ എന്നി ഘടകങ്ങൾ നിക്ഷേപത്തിൽ പരിഗണിക്കണം. ഇതിന് അനുസരിച്ചുള്ള നിക്ഷേപം തിരഞ്ഞെടുക്കാം. നിക്ഷേപ പുരോഗതി പതിവായി നിരീക്ഷിക്കുകയും ആവശ്യമായ മാറ്റങ്ങൾ വരുത്തുകയും വേണം.

ഇൻഷൂറൻസ് പ്രീമിയം ചെലവ്

വിരമിച്ചതിന് ശേഷം ആരോഗ്യ, ലൈഫ് ഇൻഷുറൻസുകൾക്ക് പ്രധാന്യം കൂടുകയാണ്. ശമ്പളം അവസാനിക്കുന്ന ഘട്ടത്തിൽ ആരോ​ഗ്യ ചെലവുകളെ നേരിടാൻ ആരോ​ഗ്യ ഇൻഷൂറൻസ് ആവശ്യമായണ്. പ്രായം ഏതായാലും ലൈഫ് ഇൻഷുറൻസ് പ്രീമിയം കാലാവധിയിലുടനീളം തുല്യമായി തുടരും. എന്നാൽ പ്രായത്തിനനുസരിച്ച് ആരോഗ്യ ഇൻഷുറൻസ് പ്രീമിയം വർധിക്കും.

നാലാം​ഗ കുടുംബമാണെങ്കിൽ കുടുംബാംഗങ്ങൾക്കും ആരോഗ്യ ഇൻഷുറൻസും ആവശ്യമാണ്. വിരമിക്കലിന് ശേഷമുള്ള പണത്തിന്റെ ആവശ്യകത നിർണയിക്കുമ്പോൾ ഇൻഷുറൻസുകൾക്ക് ആവശ്യമായ പണം മാറ്റിവെയ്ക്കണം. 

വിരമിക്കലിന് ശേഷമുള്ള സാമ്പത്തിക ലക്ഷ്യങ്ങൾ

സാധാരണ ​ഗതിയിൽ സ്ഥിര വരുമാനം ലഭിക്കുന്ന സമയത്ത് തന്നെ പല സാമ്പത്തിക ലക്ഷ്യങ്ങളും പൂർത്തിയാക്കേണ്ടതുണ്ട്. വിരമിക്കൽ കാലത്തേക്ക് ബാധ്യതകൾ കൊണ്ടു പോവാതിരിക്കുന്നതാണ് അനുയോജ്യം. എന്നാലും വിരമിക്കലിന് ശേഷവും നിരവധി സാമ്പത്തിക ലക്ഷ്യങ്ങൾ ബാക്കിയാകാം.

അവധികാല ആഘോഷം, മക്കളുടെ വിദ്യാഭ്യാസം, വിവാഹം എന്നീ ചെലവുകൾ വിരമിക്കലിന് ശേഷവും പ്രതീക്ഷിക്കാവുന്നതാണ്. ഇവ പട്ടികപ്പെടുത്തി ആവശ്യമായ പണം കരുതണം.

എമർജൻസി ഫണ്ട് ഉയർത്തുക

പണപ്പെരുപ്പം കാരണം വിരമിച്ചതിന് ശേഷം നിലവിലുള്ള എമർജൻസി ഫണ്ട് മതിയാകാതെ വരും. നാല് അംഗങ്ങളുടെ കുടുംബത്തിൽ റിട്ടയർമെന്റിന് ശേഷം ആവശ്യമായ തുക കണക്കാക്കണം. അധിക വരുമാന സ്രോതസുകളില്ലാത്തവരാണെങ്കിൽ നല്ലൊരു തുക എമർജനസി ഫണ്ടായി കരുതണം. അടിയന്തര ആശുപത്രിവാസം, പെട്ടെന്നുള്ള യാത്ര തുടങ്ങിയ അടിയന്തര ചെലവുകൾ നേരിടാൻ ഈ പണം സഹായിക്കും.