ഗൂഗിള്‍ പേയില്‍ ഇനി വിസ കാര്‍ഡും ചേര്‍ക്കാം! എങ്ങനെയെന്ന് അറിയേണ്ടേ?

ഗൂഗിള്‍ പേ അഥവാ ജി പേ എന്നത് യുപിഐ (യൂനിഫൈഡ് പെയ്‌മെന്റ് ഇന്റര്‍ഫേസ്) ഇടപാടുകള്‍ക്കായുള്ള അപ്ലിക്കേഷനായാണ് ആദ്യം അവതരിപ്പിക്കപ്പെടുന്നത്. എന്നാല്‍ ഓരോ സമയത്തും പുതിയ അധിക പ്രത്യേകതകളും അപ്ലിക്കേഷനില്‍ ചേര്‍ത്തുകൊണ്ടിരിക്കുന്നു. ഇപ്പോള്‍ നിങ്ങളുടെ ഡെബിറ്റ്, ക്രെഡിറ്റ് കാര്‍ഡുകള്‍ ഇടപാടുകള്‍ നടത്തുന്നതിനായി ജി പേയില്‍ ചേര്‍ക്കുവാന്‍ സാധിക്കും.

ജി പേയില്‍ സ്വീകരിക്കപ്പെടുന്ന കാര്‍ഡുകള്‍

ഒട്ടുമിക്ക പ്രധാന കാര്‍ഡ് ഇഷ്യൂവേര്‍സിന്റെ കാര്‍ഡുകളെല്ലാം ജി പേയില്‍ പ്രവര്‍ത്തിക്കുമെങ്കിലും എല്ലാ കാര്‍ഡുകള്‍ക്കും ഈ പ്രത്യേകത ലഭ്യമായിട്ടില്ല. ആക്‌സിസ് വിസ കാര്‍ഡുകള്‍, കൊഡാക് വിസ കാര്‍ഡുകള്‍, എസ്ബിഐ വിസ കാര്‍ഡുകള്‍, ഇന്‍ഡസിന്‍ഡ് വിസ കാര്‍ഡുകള്‍, ഫെഡറല്‍ വിസ ഡെബിറ്റ് കാര്‍ഡ്, എച്ച്എസ്ബിസി വിസ ക്രെഡിറ്റ് എന്നിവയാണ് ജി പേയില്‍ സ്വീകരിക്കപ്പെടുന്ന കാര്‍ഡുകള്‍.

കാര്‍ഡ് എങ്ങിനെ അപ്ലിക്കേഷനില്‍ ചേര്‍ക്കാം

അതിനാല്‍ നിങ്ങള്‍ ഈ സേവനം ഉപയോഗപ്പെടുത്തതിന് മുമ്പായി തന്നെ നിങ്ങളുടെ പക്കലുള്ള ക്രെഡിറ്റ് അല്ലെങ്കില്‍ ഡെബിറ്റ് കാര്‍ഡ് ജി പേയില്‍ സ്വീകരിക്കപ്പെടുന്നവയാണോ എന്ന് പരിശോധിക്കേണ്ടതുണ്ട്. ഇനി നിങ്ങളുടെ പക്കലുള്ളത് ഗൂഗിള്‍ പേയില്‍ സ്വീകരിക്കപ്പെടുന്ന വിസ കാര്‍ഡ് ആണെങ്കില്‍ അതെങ്ങനെയാണ് അപ്ലിക്കേഷനില്‍ ചേര്‍ക്കുക എന്ന് നമുക്ക് നോക്കാം.

ഈ രീതിയില്‍ ചെയ്യാം

• ജി പേ അപ്ലിക്കേഷന്‍ തുറന്നതിന് ശേഷം പ്രൊഫൈല്‍ പിക്ചറില്‍ തൊടുക. സെറ്റ് അപ്പ് പെയ്‌മെന്റ് മെത്തേഡ്‌സ് എന്നൊരു ഓപ്ഷന്‍ അവിടെ നിങ്ങള്‍ക്ക് കാണുവാന്‍ സാധിക്കും.
• പെയ്‌മെന്റ് മെത്തേഡുകള്‍ക്ക് കീഴില്‍ ആഡ് ബാങ്ക് അക്കൗണ്ട്, ഡെബിറ്റ് / ക്രെഡിറ്റ് കാര്‍ഡ് എന്ന് കാണാം.
• അതില്‍ ഡെബിറ്റ് / ക്രെഡിറ്റ് കാര്‍ഡ് ഓപ്ഷന്‍ തെരഞ്ഞെടുക്കുക.
• കാര്‍ഡ് നമ്പര്‍, കാലാവധി തീയ്യതി, സിവിവി, പേര്, ബില്ലിംഗ് അഡ്രസ് എന്നിവ നല്‍കിയതിന് ശേഷം വിവരങ്ങള്‍ സേവ് ചെയ്യുക
• നിങ്ങളുടെ കാര്‍ഡ് വെരിഫൈ ചെയ്യുന്നതിനായി ഗൂഗിള്‍ പേ ബാങ്കുമായി ബന്ധപ്പെടും. വെരിഫിക്കേഷന്‍ ഏത് രീതിയില്‍ വേണമെന്ന് നിങ്ങള്‍ക്ക് തെരഞ്ഞടുക്കാം. ഒടിപി നമ്പറിലൂടെയും ആധികാരികത ഉറപ്പിക്കും.

കാര്‍ഡ് രജിസ്റ്റര്‍ ചെയ്ത ഉടനെ സേവനം ഉപയോഗിക്കാം

പ്രക്രിയ പൂര്‍ത്തിയായി കഴിഞ്ഞാല്‍ ആക്ടിവേറ്റ് എന്ന ഓപ്ഷന്‍ തെരഞ്ഞെടുത്ത് നിങ്ങളുടെ ഒടിപി നമ്പര്‍ നല്‍കാവുന്നതാണ്. ഈ സേവനം ഉപയോഗപ്പെടുത്തിക്കഴിഞ്ഞാല്‍ കടകളിലെ ക്യൂആര്‍ കോഡ് പെയ്‌മെന്റുകളിലും എന്‍എഫ്‌സി സംവിധാനമുള്ള ടാപ് ആന്റ് പേ ഇടങ്ങളിലും നിങ്ങള്‍ക്ക് ജി പേ വഴി പണം നല്‍കാം. കാര്‍ഡ് രജിസ്റ്റര്‍ ചെയ്ത ഉടനെ തന്നെ നിങ്ങള്‍ക്ക് സേവനം ഉപയോഗിച്ചു തുടങ്ങാം.

സുരക്ഷയും ഉറപ്പുവരുത്താം

ആന്‍ഡ്രോയിഡ് ഫോണുകളിലാണ് നിങ്ങളീ സേവനം ഉപയോഗപ്പെടുത്തുന്നത് എങ്കില്‍ നിങ്ങള്‍ ഫോണില്‍ ഡിവൈസ് മാനേജര്‍ ആക്ടിവേറ്റ് ചെയ്തിട്ടുണ്ട് എന്നുറപ്പ് വരുത്തണം. ഏതെങ്കിലും സാഹചര്യത്തില്‍ ഫോണ്‍ നഷ്ടപ്പെട്ടാല്‍ ആന്‍ഡ്രോയിഡ് ഡിവൈസ് മാനേജര്‍ വഴി ഫോണ്‍ ലോക്ക് ചെയ്യുവാന്‍ നിങ്ങള്‍ക്ക് സാധിക്കും. അത് നിങ്ങളുടെ കാര്‍ഡിനെ ഡീ ആക്ടിവേറ്റ് ചെയ്യുകയും ചെയ്യും. ഇനി ഫോണ്‍ നഷ്ടപ്പെടുന്ന സമയത്ത് ഡിവൈസ് മാനേജര്‍ ആക്ടിവേറ്റ് ചെയ്തിട്ടില്ല എങ്കില്‍ ബാങ്കുമായി ബന്ധപ്പെട്ട് ഗൂഗിള്‍ പേയില്‍ കാര്‍ഡ് അസാധുവാക്കാന്‍ ആവശ്യപ്പെടാം.