റിസർവ് ചെയ്ത ടിക്കറ്റ് ഒരാളിൽ നിന്ന് മറ്റൊരാളിലേക്ക് ട്രാൻസ്ഫർ ചെയ്യാം; റദ്ദാക്കുന്നതിനുള്ള പിഴ ഒഴിവാക്കാം

യാത്രക്കാരുടെ ശ്രദ്ധയ്ക്ക്..... ഇത്തവണ യാത്ര മുടങ്ങുന്നത് തീവണ്ടി വൈകിയത് കൊണ്ടല്ല. വ്യക്തിപരമായ കാരണങ്ങൾ കൊണ്ടാണ്. പല കരാണങ്ങൾ കൊണ്ടും തീവണ്ടി യാത്രക്കാർക്ക് റിസർവ് ചെയ്ത ടിക്കറ്റിൽ യാത്ര ചെയ്യാനാവാത്ത സാഹചര്യം വന്നിട്ടുണ്ടാകും. ഇത്തരം സാഹചര്യങ്ങളിൽ ടിക്കറ്റ് റദ്ദാക്കുകയാണ് മിക്കവരും ചെയ്യുന്നത്.

ട്രെയിൻ പുറപ്പെടുന്നതിന് 48 മണിക്കൂർ മുമ്പ് സ്ഥിരീകരിച്ച ടിക്കറ്റ് റദ്ദാക്കുകയാണെങ്കിൽ എസി ഫസ്റ്റ് ക്ലാസ് ടിക്കറ്റിന് 240 രൂപ ഈടാക്കിയാണ് റെയിൽവെ പണം റീ ഫണ്ട് തരികെ. വലിയ തുക ഇത്തരത്തിൽ നഷ്ടപ്പെടുത്തേണ്ടി വരാം. ഇതിനാൽ റിസർവ് ചെയ്ത ടിക്കറ്റ് ഒരാളിൽ നിന്ന് മറ്റൊരാളിലേക്ക് എങ്ങനെ ട്രാൻസ്ഫർ ചെയ്യാം എന്നതിനെ പറ്റി അറിഞ്ഞിരിക്കുന്നത് നല്ലതാകും. 

ടിക്കറ്റ് മറ്റൊരാളിലേക്ക് മാറ്റാം

റെയിൽവെ യാത്രക്കാർക്കായി നൽകുന്നൊരു സംവിധാനമാണിത്. റിസർവേഷൻ സൗകര്യമുള്ള എല്ലാ റെയിൽവെ സ്റ്റേഷനിൽ നിന്നും ഇത്തരത്തിൽ ടിക്കറ്റ് ട്രാൻസ്ഫർ ചെയ്യാം. ഇതുവഴി ടിക്കറ്റ് റദ്ദാക്കുമ്പോഴഉുള്ള പിഴ ഒഴിവാക്കാനും പണം ലാഭിക്കാനും സാധിക്കും. എസി സെക്കന്റ് ക്ലാസ് ടിക്കറ്റ് റദ്ദാക്കുമ്പോൾ 200 രൂപയും എസി തേർഡ് ക്ലാസ് ടിക്കറ്റ് 180 രൂപയും സ്ലീപ്പർ ക്ലാസ് ടിക്കറ്റ് റദ്ദാക്കുമ്പോൾ 120 രൂപയും പിഴയായി ഈടാക്കും.

യാത്രക്കാരനായ ഒരാള്‍ക്ക് സ്വന്തം പേരില്‍ ബുക്ക് ചെയ്ത ടിക്കറ്റ് ഉപയോഗിച്ച് യാത്ര ചെയ്യാന്‍ സാധിക്കാതെ വന്നാല്‍ ഈ ടിക്കറ്റ് മറ്റൊരാളിലേക്ക് മാറ്റി നല്‍കാം. ഇത് കുടുംബക്കാരിൽ ഒരാളിലേക്കാണ് മാറ്റി നൽകേണ്ടത് എന്നാണ് റെയിൽവെ ചട്ടം. അച്ഛന്‍, അമ്മ, സഹോദരന്‍, സഹോദരി, മക്കള്‍, ഭാര്യ- ഭര്‍ത്താവ് എന്നിവര്‍ തമ്മില്‍ മാത്രമെ ടിക്കറ്റ് കൈമാറ്റം ചെയ്യാൻ സാധിക്കുകയുള്ളൂ. 

നിബന്ധനകൾ

ടിക്കറ്റ് മറ്റൊരാളിലേക്ക് മാറ്റാനായി തീവണ്ടി പുറപ്പെടുന്നതിന് 24 മണിക്കൂര്‍ മുന്‍പായി അപേക്ഷ നല്‍കണം. ഈ ഘട്ടത്തിൽ ശ്രദ്ധിക്കേണ്ട കാര്യം ഒരാള്‍ക്ക് ഒരു തവണ മാത്രമെ ഈ സൗകര്യം ഉപയോ​ഗിക്കാന്‍ സാധിക്കുകയുള്ളൂ. ഒരു തവണ ടിക്കറ്റ് കൈമാറ്റം ചെയ്‌തൊരാളാണെങ്കില്‍ അടുത്ത പ്രാവശ്യം അപേക്ഷിക്കാന്‍ സാധിക്കില്ല. ഇതിനായുള്ള നടപടി ക്രമങ്ങള്‍ പരിശോധിക്കാം. 

* ഓണ്‍ലൈനായി എടുത്ത ടിക്കറ്റ് ആണെങ്കില്‍ ആദ്യമായി ടിക്കറ്റിന്റെ പ്രിന്റ് ഔട്ട് എടുക്കുകയാണ് വേണ്ടത്. കൗണ്ടർ ടിക്കറ്റാണെങ്കിൽ അതു മതിയാകും.

* ആരുടെ പേരിലേക്കാണോ ടിക്കറ്റ് ട്രാന്‍സ്ഫര്‍ ചെയ്യാന്‍ ആഗ്രഹിക്കുന്നത് അവരുടെ ആധാര്‍ കാര്‍ഡ് അല്ലെങ്കില്‍ തിരഞ്ഞെടുപ്പ് തിരച്ചറിയല്‍ കാര്‍ഡ് എന്നിവയിലൊന്ന് കരുതുക.

* റിസര്‍വേഷന്‍ സൗകര്യമുള്ള തൊട്ടടുത്ത റെയില്‍വെ സ്റ്റേഷനിലേക്ക് എത്തണം.

* ഇവിടെ ടിക്കറ്റ് ട്രാന്‍സ്ഫറിനായി അപേക്ഷ സമര്‍പ്പിച്ചാൽ യോ​ഗ്യതയുള്ളവർക്ക് ടിക്കറ്റ് മാറ്റൊരാളിലേക്ക് മാറ്റി നൽകും.

 

സമയ ക്രമം

ഇന്ത്യന്‍ റെയില്‍വേയുടെ ചട്ടങ്ങൾ അനുസരിച്ച് തീവണ്ടി പുറപ്പെടുന്ന സമയത്തിന് 24 മണിക്കൂര്‍ മുൻപെങ്കിലും ടിക്കറ്റ് മാറ്റി നൽകാനുള്ളഅപേക്ഷ സമർപ്പിക്കണം. എന്നാൽ അപേക്ഷ സമർപ്പിക്കുന്ന യാത്രക്കാരനെ ആശ്രയിച്ച് സമയക്രമത്തിൽ വ്യത്യാസപ്പെടാം. അപേക്ഷ സമർപ്പിക്കുന്നത് സര്‍ക്കാര്‍ ജീവനക്കാരനാണെങ്കില്‍ തീവണ്ടി പുറപ്പെടുന്നതിന് 24 മണിക്കൂർ മുൻപ് അപേക്ഷ നൽകിയാൽ മതി.

ആഘോഷം, വിവാഹം, വ്യക്തിപരമായ കാരണങ്ങളാൽ എന്നിവ കാരണം ടിക്കറ്റ് മറ്റൊരാളിലേക്ക് മാറ്റുമ്പോൾ തീവണ്ടി പുറപ്പെടുന്നതിന് മുൻപ് 48 മണിക്കൂര്‍ മുൻപ് ടിക്കറ്റ് അപേക്ഷ സമർപ്പിക്കണം. എന്‍സിസി കാഡറ്റുകൾക്കും ഈ സേവനങ്ങൾ ഉപയോ​ഗിക്കാം. യാത്രക്കാരുടെ തിരിച്ചറിയൽ രേഖകൾ കരുതുന്നത് എളുപ്പത്തിൽ നടപടികൾ പൂർത്തിയാക്കാനാകും. ഇതിനായി പ്രത്യേക നിരക്കുകളൊന്നുമില്ല.