ആഭരണം വാങ്ങാൻ കാത്തിരുന്നവർക്ക് മുട്ടൻ പണി, കുതിച്ചുയർന്ന് സ്വർണവില, ഇനിയും കാത്തിരിക്കണോ..?

ഓഗസ്റ്റ് 2-ആം തീയ്യതി 51,840 രൂപയായിരുന്നു സംസ്ഥാനത്ത് ഒരു പവൻ സ്വർണത്തിന്‍റെ വില. ഓഗസ്റ്റ് മാസം പവന് രേഖപ്പെടുത്തുന്ന ഏറ്റവും ഉയർന്ന വിലയാണിത്. എന്നാൽ പിന്നീടുള്ള ദിവസങ്ങളിൽ സ്വർണവില പതിയെ താഴേക്ക് വന്നത് ആഭരണപ്രേമികൾക്ക് വലിയ ആശ്വാസം നൽകി. 8-ആം തീയ്യതി ആകുമ്പോഴേക്കും പവന്‍റെ വില 50,800 രൂപയിലേക്കെത്തി. പക്ഷെ സ്വർണവില വീണ്ടും താഴേക്ക് വീഴുമെന്ന് ചിന്തിച്ച് കാത്തിരുന്നവർക്ക് ഇന്ന് മുട്ടൻപണിയാണ് കിട്ടിയത്.

ഇന്നത്തെ സ്വർണവില

പവന് 600 രൂപയും, ഗ്രാമിന് 75 രൂപയുമാണ് ഇന്ന് സ്വർണവിലയിലുണ്ടായ കുതിപ്പ്. അതോടെ ഒരു പവൻ സ്വർണ്ണത്തിന് 51,400 രൂപയും, ഗ്രാമിന് 6,425 രൂപയുമാണ് വില.

പവൻ വാങ്ങാൻ

പവന്‍റെ വില ഉയർന്നതോടെ വലിയ അളവിൽ സ്വർണം വാങ്ങുന്നവരുടെ കീശ കുറുമെന്ന കാര്യം ഉറപ്പാണ്. കാരണം സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാൾമാർക്കിംങ് നിരക്കുകൾ തുടങ്ങിയ കൂടി നൽകണം. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടുമ്പോൾ ഒരു പവൻ സ്വർണാഭരണം വാങ്ങാൻ ഏകദേശം 57,000 രൂപ നൽകേണ്ടി വരും.

നിലവിൽ സ്വർണ്ണ വില പൊതുവെ താഴ്ന്നു നിൽക്കുന്ന സാഹചര്യമെന്ന വിലയിരുത്തലിൽ ജ്വല്ലറികളിൽ വില്പന വർധിച്ചിട്ടുണ്ട്. നാളുകളായി വിലയിൽ 50,000 രൂപയുടെ താഴേക്ക് വില ഇറങ്ങിയിട്ടില്ല എന്നതും ഇതിനൊരു കാരണമായി വിലയിരുത്തപ്പെടുന്നു.

ആഗോള സ്വർണ്ണവില

അന്താരാഷ്ട്ര തലത്തിൽ, നേരിയ താഴ്ച്ചയിലാണ് വെള്ളിയാഴ്ച്ച രാവിലെ സ്വർണ്ണ വ്യാപാരം നടക്കുന്നത്. ട്രോയ് ഔൺസിന് 4.13 ഡോളർ (0.17%) താഴ്ന്ന് 2,420.71 ഡോളർ എന്നതാണ് നിരക്ക്.

അഡ്വാന്‍സ് ബുക്കിംഗ് നല്ലതാണ്

വരും ദിവസങ്ങളിലും വില കൂടിയാൽ അത് വലിയ അളവിൽ സ്വർണം വാങ്ങുന്നവർക്ക് വലിയ നഷ്ടത്തിന് കാരണമാകും. അതുകൊണ്ടു തന്നെ വലിയ അളവിൽ സ്വർണാഭരണം വാങ്ങാൻ ഉദ്ദേശിക്കുന്നവർ അഡ്വാന്‍സ് ബുക്കിംഗ് നടത്തുന്നതാണ് നല്ലത്. കാരണം പവന്‍റെ വിലയിൽ വർധനവുണ്ടായാൽ അതുവഴി ഉണ്ടാകുന്ന സാമ്പത്തിക നഷ്ടം കുറയ്ക്കാൻ അഡ്വാന്‍സ് ബുക്കിംഗ് സഹായിക്കും

സ്വർണ്ണത്തിൻ്റെ പരിശുദ്ധി

കാരറ്റ് എന്നത് സ്വർണ്ണത്തിൻ്റെ ശുദ്ധത അല്ലെങ്കിൽ ഉള്ളടക്കം അളക്കാൻ ഉപയോഗിക്കുന്ന പദമാണ്.14 കാരറ്റ്, 18 കാരറ്റ്, 22 കാരറ്റ്, 24 കാരറ്റ് എന്നിങ്ങനെ വിവിധ കാരറ്റ് സ്വർണം വിപണിയിൽ ലഭ്യമാണ്. 24 കാരറ്റ് സ്വർണ്ണം സ്വർണ്ണത്തിൻ്റെ ഏറ്റവും ശുദ്ധമായ രൂപമായി കണക്കാക്കപ്പെടുന്നു, മറ്റ് കാരറ്റുകളെ അപേക്ഷിച്ച് ഇതിന് വില കൂടുതലാണ്.

സർട്ടിഫിക്കേഷൻ

ഇന്ത്യയിൽ സ്വർണ്ണം സാക്ഷ്യപ്പെടുത്തുന്നതിനും ആധികാരികമാക്കുന്നതിനുമുള്ള ഏജൻസിയാണ് ബ്യൂറോ ഓഫ് ഇന്ത്യൻ സ്റ്റാൻഡേർഡ്‌(BIS). സ്വർണ്ണാഭരണങ്ങളുടെ പരിശുദ്ധി സംബന്ധിച്ച് ഉപഭോക്താവിന് കൂടുതൽ ആത്മവിശ്വാസം നൽകുന്നത് ബിഐഎസ് ഹാൾമാർക്ക് അടയാളമാണ്.

റെക്കോർഡ് വില മെയ് മാസത്തിൽ

സംസ്ഥാനത്തിന്‍റെ ചരിത്രത്തിൽ സ്വർണത്തിന് ഏറ്റവും ഉയർന്ന വില രേഖപ്പെടുത്തിയ മാസം മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില.

പവന്‍റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്‍റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്‍റെ വില അരലക്ഷം രൂപയും കടന്നു.