നവംബറിൽ സ്ഥിര നിക്ഷേപം ഒരു ബംപർ തന്നെ; 2 ബാങ്കുകൾ നിരക്കുയർത്തി; പലിശ 8.25% വരെ

സ്ഥിര നിക്ഷേപങ്ങളുടെ പലിശ നിരക്ക് മികച്ച നിലയിലാണുള്ളത്. റിസർവ് ബാങ്കിൻെറ റിപ്പോ നിരക്കിന് ചുവട് പിടിച്ചാണ് പലിശ നിരക്ക് വർധനവ് വന്നത്. റിപ്പോ നിരക്കിൽ ആർബിഐ തൽസ്ഥിതി തുടരുന്നതാണ് നിലവിലെ സ്ഥിതി. പല ബാങ്കുകളും പലിശ നിരക്ക് കുറയ്ക്കുന്നതിന് ഇത് കാരണമായിട്ടുണ്ട്.

ഇതിനിടെ ചില ബാങ്കുകൾ സ്ഥിര നിക്ഷേപങ്ങളുടെ പലിശ നിരക്ക് വർധിപ്പിക്കുന്നുണ്ട്. അതിനാൽ തന്നെ ഇവ നിക്ഷേപകനെ സംബന്ധിച്ച് ലോട്ടറിയാണെന്ന് പറയാം. നവംബറിൽ നിക്ഷേപ പലിശ നിരക്കുയർത്തിയത് 2 ബാങ്കുകളാണ്. ഇവ രണ്ടും 8 ശതമാനത്തിന് മുകളിൽ പലിശ നൽകുന്നുമുണ്ട്.

ഐഡിഎഫ്സി ഫസ്റ്റ് ബാങ്ക്

ഐഡിഎഫ്സി ഫസ്റ്റ് ബാങ്ക് 2 കോടി രൂപയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്കുകൾ ഈയിടെ പുതുക്കിയിരുന്നു. നിരക്ക് വർധനവോടെ 7 ദിവസം മുതൽ 10 വർഷം വരെ കാലാവധിയുള്ള സ്ഥിര നിക്ഷേപങ്ങൾക്ക് 3 ശതമാനം മുതൽ 7.75 ശതമാനം വരെ പലിശ ലഭിക്കും. മുതിർന്ന പൗരന്മാർക്ക് 3.50 ശതമാനം മുതൽ 8.25 ശതമാനം വരെയാണ് പലിശ നിരക്ക്.

നിരക്കുകൾ

പലിശ നിരക്ക് വർധനവിന് ശേഷം 549 ദിവസം മുതൽ 2 വർഷത്തേക്കുള്ള കാലാവധിയിൽ പൂർത്തിയാകുന്ന നിക്ഷേപങ്ങൾക്ക് റെ​ഗുലർ നിക്ഷേപകർക്ക് 7.75 ശതമാനം പലിശ ലഭിക്കും. മുതിർന്ന പൗരന്മാർക്ക് 8.25 ശതമാനം പലിശയും ലഭിക്കും. ബാങ്കിൽ ലഭിക്കുന്ന ഉയർന്ന പലിശ നിരക്കാണിത്. പുതുക്കിയ നിരക്കുകൾ നവംബർ 2 മുതൽ പ്രാബല്യത്തിൽ വന്നു.

7 ദിവസം മുതല്‍ 45 ദിവസത്തേക്ക് 3 ശതമാനവും 46 ദിവസം മുതല്‍ 180 ദിവസത്തേക്ക് 4.50 ശതമാനവും പലിശ ലഭിക്കും. 1 വര്‍ഷത്തേക്ക് 6.50 ശതമാനമാണ് പലിശ. 1 വര്‍ഷം 1 ദിവസം മുതല്‍ 548 ദിവസത്തേക്ക് നിക്ഷേപിച്ചാല്‍ 7.50 ശതമാനം പലിശ ലഭിക്കും.

2 വര്‍ഷം 1 ദിവസം മുതല്‍ 3 വര്‍ഷത്തേക്ക് 7.25 ശതമാനം പലിശയും 3 വര്‍ഷം 1 ദിവസം മുതല്‍ 10 വര്‍ഷത്തേക്ക് 7 ശതമാനം പലിശയും ലഭിക്കും. ഐഡിഎഫ്സി ഫസ്റ്റ് ബാങ്കിൽ നിക്ഷേപങ്ങൾ കാലാവധിക്ക് മുൻപ് പിൻവലിച്ചാൽ പിഴയോടൊപ്പം ബാങ്കിൽ തുടരുന്ന കാലയളവിലുള്ള പലിശ നിരക്ക് മാത്രമാണ് നിക്ഷേപകന് ലഭിക്കുക. മുതിർന്ന പൗരന്മാരാണെങ്കിൽ പിഴ ബാധകമാകില്ല.

പഞ്ചാബ് നാഷണൽ ബാങ്ക്

2 കോടി രൂപയിൽ താഴെയുള്ള സ്ഥിര നിക്ഷേപങ്ങൾക്ക് പൊതുമേഖലാ ബാങ്കായ പഞ്ചാബ് നാഷണൽ ബാങ്ക് 0.50 ശതമാനം പലിശ നിരക്കുയർത്തി. പുതുക്കിയ നിരക്കുകൾ പ്രകാരം 444 ദിവസത്തെ നിക്ഷേപത്തിന് റെ​ഗുലർ നിക്ഷേപകർക്ക് 7.25 ശതമാനവും മുതിർന്ന പൗരന്മാർക്ക് 7.75 ശതമാനവും സൂപ്പർ സീനിയർ സിറ്റിസൺസിന് 8.05 ശതമാനവും പലിശ ലഭിക്കും. പുതുക്കിയ നിരക്കുകൾ നവംബർ 1 മുതൽ നിലവിൽ വന്നു.

7 മുതൽ 45 ദിവസ കാലാവധിയുള്ള സ്ഥിര നിക്ഷേപങ്ങൾക്ക് ബാങ്ക് 3.50 ശതമാനവും 46 മുതൽ 179 ദിവസ കാലാവധിയിൽ 4.50 ശതമാനവും പലിശ ലഭിക്കും. 180 മുതൽ 270 ദിവസത്തേക്ക് വരെയുള്ള നിക്ഷേപങ്ങളുടെ പലിശ നിരക്ക് അര ശതമാനം വർധിപ്പിച്ചു.

6 ശതമാനം പലിശ ലഭിക്കും. 271 ദിവസം മുതൽ 1 വർഷം വരെ കാലാവധിയുള്ള നിക്ഷേപങ്ങളുടെ പലിശ നിരക്ക് 0.45 ശതമാനം ഉയർത്തിയതോടെ 6.25 ശതമാനം പലിശ ലഭിക്കും. ഒരു വർഷത്തിനുള്ളിൽ കാലാവധി പൂർത്തിയാകുന്ന നിക്ഷേപങ്ങൾക്ക് 6.75 ശതമാനം പലിശ തുടർന്നു ലഭിക്കും.

60 വയസോ അതിൽ കൂടുതലോ പ്രായമുള്ളവരും 80 വയസ്സ് വരെ പ്രായമുള്ളവരുമായ മുതിർന്ന പൗരന്മാർക്ക് 0.50 ശതമാനം അധിക പലിശ നിരക്ക് ലഭിക്കും. 80 വയസിന് മുകളിൽ പ്രായമുള്ള നിക്ഷേപകർക്ക് 0.80 ശതമാനം അധിക നിരക്കും ലഭിക്കും.