9.60 ശതമാനം വരെ പലിശ ലഭിക്കും; പക്ഷെ, സ്ഥിര നിക്ഷേപമിടും മുന്‍പ് 8 കാര്യങ്ങള്‍ അറിയണം

ഇന്ത്യയില്‍ നിക്ഷേപത്തില്‍ പ്രഥമ പരിഗണന സ്ഥിര നിക്ഷേപത്തിനാണ്. ഭൂരിഭാഗം ഇന്ത്യക്കാരും തങ്ങളുടെ നിക്ഷേപം ബാങ്കുകളിലേക്ക് മാറ്റാനാണ് ആഗ്രഹിക്കുന്നത്. 2022 മേയ് മുതല്‍ പലിശ നിരക്ക് വര്‍ധനവ് തുടങ്ങിയതോടെ കൂടുതല്‍ പേരും സ്ഥിര നിക്ഷേപമിടുന്നുണ്ട്.

മികച്ച പലിശ നിരക്കും സുരക്ഷയും ലഭിക്കുമെങ്കിലും വലിയൊരു തുക സ്ഥിര നിക്ഷേപത്തിലേക്ക് മാറ്റുന്നതിന് മുന്‍പ് നിക്ഷേപത്തിന്റെ പോരായ്മകളും അറിഞ്ഞിരിക്കണം. ഇത് അനുസരിച്ച് വേണം നിക്ഷേപിക്കണമോ വേണ്ടയോ എന്നുള്ള തീരുമാനമെടുക്കാന്‍. സ്ഥിര നിക്ഷേപത്തിന്റെ 8 പ്രധാന പോരായ്മകള്‍ അറിയാം.

1. കുറഞ്ഞ റിട്ടേണ്‍

സ്ഥിര നിക്ഷേപത്തില്‍ കാലാവധിയോളം ഒരു സ്ഥിരമായ പലിശ നിരക്കാണ് ലഭിക്കുന്നത്. ഓഹരി, മ്യൂച്വല്‍ ഫണ്ട് എന്നിവയുമായി താരതമ്യം ചെയ്യുമ്പോള്‍ വളരെ കുറഞ്ഞ റിട്ടേണാണിത്.

2. സ്ഥിരമായ പലിശ നിരക്ക്

നിക്ഷേപം ആരംഭിച്ചാല്‍ കാലാവധിയോളം പലിശ നിരക്ക് സ്ഥിരമായി തുടരുന്നതാണ് സ്ഥിര നിക്ഷേപത്തിലെ രീതി. പലിശ നിരക്ക് കുറഞ്ഞ കാലത്ത് സ്ഥിര നിക്ഷേപമിടുന്നൊരാള്‍ക്ക് പലിശ കൂടുന്ന കാലത്തെ നേട്ടം ലഭിക്കില്ല.

3. ലോക്-ഇന്‍ പിരിയഡ്

നിക്ഷേപം ആരംഭിച്ച് കഴിച്ചാല്‍ കാലാവധി വരെ പണം ലോക് ചെയ്യുന്നതാണ് സ്ഥിര നിക്ഷേപത്തിന്റെ രീതി. കാലാവധിയോളം പണം ഉപയോഗിക്കാന്‍ സാധിക്കില്ല. കാലാവധിക്ക് മുന്‍പ് പിന്‍വലിച്ചാല്‍ പിഴ ഈടാക്കും. 

4. സ്രോതസില്‍ നിന്നുള്ള നികുതി

സ്ഥിര നിക്ഷേപത്തിലെ ആദായം നികുതി ബാധകമാണ്. സ്ഥിര നിക്ഷേപ പലിശയില്‍ നിന്ന് ബാങ്ക് സ്രോതസില്‍ നിന്നുള്ള നികുതി ഈടാക്കും. റെഗുലര്‍ നിക്ഷേപകരുടെ പലിശ 40,000 രൂപ കഴിഞ്ഞാലാണ് (മുതിര്‍ന്ന പൗരന്മാര്‍ക്ക് 50,000 രൂപ) സ്രോതസില്‍ നിന്നുള്ള നികുതി ഈടാക്കുക. പലിശ വരുമാനം ആകെ വരുമാനത്തിനൊപ്പം ചേര്‍ത്താണ് നികുതി കണക്കാക്കുക.

5. പണപ്പെരുപ്പത്തെ മറികടക്കുക

നികുതി കിഴിച്ച ശേഷമുള്ള നിക്ഷേപത്തിലെ ആദായം പണപ്പെരുപ്പ നിരക്കിനേക്കാള്‍ മുകളില്‍ നില്‍ക്കേണ്ടതുണ്ട്. സ്ഥിര നിക്ഷേപ പലിശയ്ക്ക് ഇത് പലപ്പോഴും സാധിക്കുന്നില്ല. ഇത്തരത്തില്‍ പണപ്പെരുപ്പ നിരക്കിനേക്കാള്‍ താഴുമ്പോള്‍ നിക്ഷേപത്തിലെ ആദായം വഴി ജീവിത ചെലവ് മറികടക്കാന്‍ സാധിക്കാതെ വരും. 

6. ലിക്വിഡിറ്റി

സ്ഥിര നിക്ഷേപങ്ങള്‍ കുറഞ്ഞ ലിക്വിഡിറ്റിയുള്ളവയാണ്. വേണ്ട സമയത്ത് പണം ലഭിക്കാനുള്ള സാധ്യത സ്ഥിര നിക്ഷേപത്തില്‍ കുറവാണ്.

7. ബാങ്ക് പാപ്പരാകാം

ബാങ്ക് സ്ഥിര നിക്ഷേപത്തിന്റെ സുരക്ഷിതത്വം ബാങ്ക് പാപ്പരാകുന്നത് വരെ മാത്രമെയുള്ളൂ. ഇത്തരത്തില്‍ സംഭവിച്ചാല്‍ 5 ലക്ഷം രൂപ വരെയുള്ള സ്ഥിര നിക്ഷേപങ്ങള്‍ക്ക് പരിരക്ഷ ലഭിക്കും. ബാക്കി തുക നഷ്ടമാകും.

8. നേരത്തെ പിന്‍വലിച്ചാല്‍ പിഴ

സ്ഥിര നിക്ഷേപം കാലാവധിക്ക് മുന്‍പ് പിന്‍വലിക്കാന്‍ ബാങ്ക് അവസരം നല്‍കുന്നുണ്ട്. നിക്ഷേപം നേരത്തെ പിന്‍വലിച്ചാല്‍ ബാങ്ക് പിഴ ഈടാക്കും. 1 ശതമാനം മുതല്‍ 3ശതമാനം വരെ പലിശ നിരക്ക് കുറവ് വരുത്താന്‍ സാധ്യതയുണ്ട.്

ബാങ്ക് പലിശ നിരക്ക്

ഇന്ന് ഏറ്റവും മികച്ച പലിശ നല്‍കുന്നത് സൂര്യോദയ് സമോള്‍ ഫിനാന്‍സ് ബാങ്കാണ്. 5 വര്‍ഷത്തേക്ക് റെഗുലര്‍ നിക്ഷേപകര്‍ക്ക് 9.10 ശതമാനവും മുതിര്‍ന്ന പൗരന്മാര്‍ക്ക് 9.60 ശതമാനവും പലിശ ലഭിക്കും. 999 ദിവസത്തേക്ക് 9 ശതമാനവും മുതിർന്ന പൗരന്മാർക്ക് 9.50 ശതമാനം പലിശയും ലഭിക്കും. രാജ്യത്തെ മുൻനിര ബാങ്കുകൾ റെ​ഗുലർ നിക്ഷേപകർക്ക് നൽകുന്ന നിക്ഷേപ പലിശ നോക്കാം. മുതിർന്ന പൗരന്മാർക്ക് 0.50 ശതമാനം അധിക നിരക്ക് ലഭിക്കും.

എസ്ബിഐ- 3% മുതല്‍ 7.10%

എച്ച്ഡിഎഫ്‌സി ബാങ്ക്- 3% മുതല്‍ 7.10%

ഐസിഐസിഐ ബാങ്ക് 3% മുതല്‍ 7.10%

പഞ്ചാബ് നാഷണല്‍ ബാങ്ക്- 3% മുതല്‍ 7.25%

ആക്‌സിസ് ബാങ്ക്- 3% മുതല്‍ 7.45%