ഈ ചിട്ടിയിൽ ചേർന്നാൽ നേടാം മാസ വരുമാനം; ചിട്ടിയിലെ തന്ത്രങ്ങളറിഞ്ഞാൽ ഞെട്ടും; നോക്കാം ഈ സുവർണാവസരം

മാസ വരുമാനം

ചിട്ടിയില്‍ ചേരുന്നൊരാള്‍ക്ക് മാസത്തില്‍ വരുമാനം ലഭിക്കാന്‍ സാധിക്കും. ഇതിനായി മാസ അടവ് സാധ്യമായൊരു ചിട്ടി തിരഞ്ഞെടുക്കുകയാണ് ആദ്യം വേണ്ടത്. ഇതിനായി സാധാരണ ചിട്ടിയോ മൾട്ടിഡിവിഷൻ ചിട്ടിയോ തിരഞ്ഞെടുക്കാം. സാധാരണ ചിട്ടിയാണെങ്കിൽ മാസത്തിൽ ലേലം വഴിയാണ് ചിട്ടി ലഭിക്കുന്നത്. ഫോർമാൻസ് കമ്മീഷൻ കിഴിച്ചുള്ള തുക ലഭിക്കാനായി ചിട്ടി കാലാവധിയോളം കാത്തിരിക്കണം.

എന്നാൽ മള്‍ട്ടി ഡിവിഷന്‍ ചിട്ടിയിൽ മാസത്തിൽ നറുക്കായി ഒരാൾക്ക് ഫോർമാൻസ് കമ്മീഷൻ കിഴിച്ചുള്ള തുകയും മൂന്ന് പേർക്ക് ലേലം വിളിയിലൂടെയും ചിട്ടി ലഭിക്കും. ഇതിനാൽ മൾട്ടി ഡിവിഷൻ ചിട്ടിയാണ് അനുയോജ്യം. 

ചിട്ടി തിരഞ്ഞെടുക്കുമ്പോൾ

എത്ര രൂപ മാസത്തില്‍ ലഭിക്കണം എന്നതിന് അനുസരിച്ച് വേണം ചിട്ടി തിരഞ്ഞെടുക്കാൻ 5 ലക്ഷത്തിന്റെ ചിട്ടിയില്‍ നിന്ന് 2300- 2700 രൂപ വരെ മാസ വരുമാനം ലഭിക്കും. 10 ലക്ഷത്തിന്റെ ചിട്ടിയിൽ നിന്ന് 4600- 5400 രൂപ വരെ മാസ വരുമാനം ലഭിക്കും. ഇതിനൊപ്പം ചിട്ടിയുടെ കാലാവധിയും പരിശോധിക്കണം.

ചിട്ടിതുക തുല്യമായ വ്യത്യസ്ത മാസ തവണകളുള്ള ചിട്ടികൾ ലഭ്യമാണ്. ഉദാഹരണമായി 25,000 രൂപ മാസ അടവുള്ള 40 മാസ ചിട്ടിയിൽ നിന്നും 20,000 രൂപ മാസ അടവുള്ള 50 മാസ ചിട്ടിയിൽ നിന്നും ലഭിക്കുന്നത്. 10 ലക്ഷം രൂപയാണ്. ഇവിടെ കാലാവധിയോളം മുടക്കമില്ലാതെ അടച്ചു തീർക്കാൻ സാധിക്കുന്ന ചിട്ടിയാണ് തിരഞ്ഞെടുക്കേണ്ടത്. 

എങ്ങനെ മാസ വരുമാനം ലഭിക്കും

ചിട്ടിയിൽ ചേർന്നൊരാൾ ചിട്ടി ലഭിച്ചയുടനെ ചിട്ടി സ്ഥിര നിക്ഷേപമാക്കിയാൽ മാസ വരുമാനം ഉറപ്പിക്കാം. മൾട്ടി ഡിവിഷൻ ചിട്ടിയാണെങ്കിൽ നറുക്ക് ലഭിക്കുന്നൊരാൾക്ക് ചിട്ടിയിൽ നിന്ന് പരമാവധി ലാഭം ലഭിക്കും. 10 ലക്ഷത്തിന്റെ ചിട്ടി ആദ്യ മാസത്തിൽ നറുക്ക് ലഭിച്ചാൽ 9.50 ലക്ഷം
തൊട്ടടുത്ത മാസം മുതൽ ചിട്ടി സ്ഥിര നിക്ഷേപമിടാം.

ഇവിടെ ചുരുങ്ങിയത് 5,000 രൂപയോളം മാസത്തിൽ ലഭിക്കും ഇവിടെ 2 തരത്തിലാണ് പണം സ്ഥിര നിക്ഷേപമിടുക. ഭാവി ബാധ്യതയ്ക്കുള്ള തുകയ്ക്ക ഒരു പലിശയും ഇതുവരെ അടച്ച തുകയ്ക്ക് മറ്റൊരു പലിശയുമാണ് ലഭിക്കുക. 

പലിശ നിരക്ക്

കെഎസ്എഫ്ഇയുടെ പുതുക്കിയ പലിശ നിരക്ക് പ്രകാരം ഭാവി ബാധ്യതയ്ക്ക് ചിട്ടി സെക്യൂരിറ്റി ഡെപ്പോസിറ്റ് ഇൻ ട്രസ്റ്റ് അക്കൗണ്ടിൽ 7.5 ശതമാനവും ചിട്ടി പ്രൈസ് മണി നിക്ഷേപത്തിന് 7 ശതമാനവും പലിശ ലഭിക്കും. ചിട്ടി സ്ഥിര നിക്ഷേപമിട്ടൊരാൾ ഇതിനൊപ്പം സു​ഗമ അക്കൗണ്ട് കൂടി ആരംഭിക്കണം.

സ്ഥിര നിക്ഷേപത്തിന്റെ പലിശ വരുമാനം മാസത്തിൽ സു​ഗമ അക്കൗണ്ടിലേക്ക് മാറ്റാൻ അപേക്ഷ നൽകുകയുിം വേണം, സു​ഗമ അക്കൗണ്ടിന് നോമിനിയെ വെയ്ക്കാൻ സാധിക്കും. ചിട്ടി കാലാവധിക്ക് ശേഷവും സ്ഥിര നിക്ഷേപം തുടരുകയാണെങ്കിൽ മാസ വരുമാനം മുടങ്ങാതെ ലഭിക്കും.

നികുതി ശ്രദ്ധിക്കാം

ചിട്ടി നറുക്കിൽ ലഭിക്കാത്തൊരാൾ അനുയോജ്യമായ തുകയ്ക്ക് ചിട്ടി ലേലം വിളിച്ചെടുത്ത് സ്ഥിര നിക്ഷേപമിടുന്നതും അനുയോജ്യമാണ്. പരമാവധി ലേല കിഴിവിലേക്ക് പോകാതെ ലാഭത്തിൽ ലഭിക്കുന്ന സമയം നോക്കി ലേലം വിളിച്ചെടുക്കുന്നതാണ് സ്ഥിര നിക്ഷേപത്തിന് അനുയോജ്യം.

ചിട്ടി സ്ഥിര നിക്ഷേപമിടുമ്പോൾ നികുതി ബാധ്യത വരാതെ സൂക്ഷിക്കണം. വർഷത്തിൽ പലിശ വരുമാനം 5,000 രൂപയിൽ കൂടിയാൽ സ്രോതസിൽ നിന്നുള്ള നികുതി ഈടാക്കും. ചിട്ടിയിൽ ചേരുന്നൊരാൾ നികുതിദായകനല്ലെങ്കിൽ 15ജി, 15എച്ച് ഫോമുകൾ സമർപ്പിക്കാൻ മറക്കരുത്.