5 ലക്ഷം നിക്ഷേപിച്ച് 7 ലക്ഷം നേടാം: ഈ പോസ്റ്റ്‌ ഓഫീസ് സ്കീമിനെ കുറിച്ച് തീർച്ചയായും അറിയേണ്ടതാണ്

മികച്ച വരുമാനവും സുരക്ഷിത നിക്ഷേപവുമാണ് പോസ്റ്റ് ഓഫീസ് സേവിംങ്‌സ് സ്കീമുകളെ ജനപ്രിയമാക്കുന്നത്. കുട്ടികൾക്ക് മുതൽ വയോധികർക്ക് വരെയുള്ള നിരവധി സമ്പാദ്യ പദ്ധതികൾ നിലവിൽ പ്രവർത്തിക്കുന്നുണ്ട്. ഈ പ്രത്യേക സ്കീമുകളിലൊന്ന് നിക്ഷേപകരെ പലിശയിലൂടെ മാത്രം തന്നെ ലക്ഷങ്ങൾ സമ്പാദിക്കാൻ സഹായിക്കുന്നു. പോസ്റ്റ് ഓഫീസ് ടൈം ഡെപ്പോസിറ്റ് സ്കീമിനെക്കുറിച്ചാണ് പറഞ്ഞു വരുന്നത്. ഈ അഞ്ച് വർഷത്തെ സ്കീമിൽ, പണം സുരക്ഷിതമായി നിക്ഷേപിക്കുന്നതിനൊപ്പം, വരുമാനവും ഉറപ്പാണ്. ഇക്കാരണംകൊണ്ട് തന്നെ ഇത് ജനപ്രിയ റിട്ടേൺ സ്കീമുകളിൽ ഒന്നാണ്.

ഹോം ലോൺ ഒരു മികച്ച സാമ്പത്തിക തീരുമാനമാണോ? നിർബന്ധമായും അറിഞ്ഞിരിക്കേണ്ട കാര്യങ്ങൾ

എല്ലാവരും അവരുടെ വരുമാനത്തിന്റെ ഒരു ഭാഗം ലാഭിക്കാനും ആ പണം സുരക്ഷിതമായ ഒരു സ്ഥലത്ത് നിക്ഷേപിക്കാനും അത് വഴി ഭാവിയിൽ മികച്ച വരുമാനം നേടാനും ആഗ്രഹിക്കുന്നവരാണ്. ഈ സാഹചര്യത്തിൽ, പോസ്റ്റ് ഓഫീസ് നടത്തുന്ന ചെറുകിട സമ്പാദ്യ പദ്ധതികൾ ഇപ്പോൾ വളരെ ജനപ്രീതി നേടിക്കൊണ്ടിരിക്കുകയാണ്. പോസ്റ്റ് ഓഫീസ് ടൈം ഡെപ്പോസിറ്റ് സ്കീമിനെക്കുറിച്ച് പറഞ്ഞാൽ, ഇത് ഉയർന്ന പലിശയും മികച്ച നേട്ടങ്ങളും വാഗ്ദാനം ചെയ്യുന്നു. ഈ പദ്ധതിയിൽ, നിക്ഷേപത്തിന് 7.5 ശതമാനം പലിശ ലഭിക്കും.

കഴിഞ്ഞ വർഷം, 2023 ഏപ്രിൽ 1 തൊട്ട് പോസ്റ്റ് ഓഫീസ് ടൈം ഡെപ്പോസിറ്റ് സ്കീമിന്റെ പലിശ പുതുക്കി. അഞ്ച് വർഷത്തേക്ക് ലഭ്യമായ പലിശ നിരക്ക് 7 ശതമാനത്തിൽ നിന്ന് ഒറ്റയടിക്ക് 7.5 ശതമാനമായി ഉയർത്തി. ഈ പലിശ നിരക്കിലുള്ള പോസ്റ്റ് ഓഫീസ് സ്കീം മികച്ച സമ്പാദ്യ പദ്ധതികളിലൊന്നാണ്. നിക്ഷേപകർക്ക് ഈ പോസ്റ്റ് ഓഫീസ് സേവിംഗ്സ് സ്കീമിൽ വിവിധ കാലയളവുകളിലായ് പണം നിക്ഷേപിക്കാം.

സ്കീം പ്രകാരം 1 വർഷം, 2 വർഷം, 3 വർഷം, 5 വർഷം എന്നിങ്ങനെ വ്യത്യസ്ത കാലാവധികളിൽ നിക്ഷേപിക്കാം. നിങ്ങൾ ഒരു വർഷത്തേക്ക് നിക്ഷേപിച്ചാൽ 6.9 ശതമാനം പലിശയും, 2 അല്ലെങ്കിൽ 3 വർഷത്തേക്ക് പണം നിക്ഷേപിച്ചാൽ 7 ശതമാനം പലിശയും, ഇനി 5 വർഷത്തേക്ക് ആണ് നിക്ഷേപിക്കുന്നതെങ്കിൽ അതിനു 7.5 ശതമാനം പലിശയും ലഭിക്കും. എന്നിരുന്നാലും, ഒരു ഉപഭോക്താവിന്റെ നിക്ഷേപം ഇരട്ടിയാകാൻ അഞ്ച് വർഷത്തിലധികം എടുക്കും.

ഉദാഹരണത്തിന് പോസ്റ്റ് ഓഫീസ് ടൈം ഡെപ്പോസിറ്റിലെ നിക്ഷേപകരുടെ പണം ഇരട്ടിയാക്കുന്നതിന്റെ കണക്ക് നോക്കുകയാണെങ്കിൽ, ഒരു ഉപഭോക്താവ് അഞ്ച് വർഷത്തേക്ക് 5 ലക്ഷം രൂപ നിക്ഷേപിക്കുകയും 7.5 ശതമാനം നിരക്കിൽ അയാൾക്ക് പലിശ ലഭിക്കുകയും ചെയ്യുന്നുവെന്ന് കരുതിയാൽ, ഈ കാലയളവിൽ അയാൾക്ക് 2 ലക്ഷം രൂപ പലിശയായി ലഭിക്കും. ഇതിൽ നിക്ഷേപിക്കുന്നതിലൂടെ നിങ്ങൾക്ക് ലക്ഷക്കണക്കിന് രൂപയുടെ വരുമാനം ഉറപ്പാക്കാം.

ഓൺലൈൻ തട്ടിപ്പ്: ഇരകളാകാതിരിക്കാൻ നിർബന്ധമായും അറിഞ്ഞിരിക്കേണ്ട കാര്യങ്ങൾ

ടൈം ഡെപ്പോസിറ്റ് സ്കീമിൽ, 1961 ലെ ആദായനികുതി വകുപ്പിന്റെ സെക്ഷൻ 80C പ്രകാരം ഉപഭോക്താവിന് നികുതി ഇളവിന്റെ ആനുകൂല്യവും നൽകിയിട്ടുണ്ട്. ഈ സേവിംഗ്സ് സ്കീമിൽ സിംഗിൾ അക്കൗണ്ടോ, ജോയിൻ്റ് അക്കൗണ്ടോ തുറക്കാവുന്നതാണ്. 10 വയസ്സിന് മുകളിലുള്ള കുട്ടിയുടെ അക്കൗണ്ട് ഒരു കുടുംബാംഗം മുഖേന തുടങ്ങാം. ഏറ്റവും കുറഞ്ഞത് 1000 രൂപയിൽ അക്കൗണ്ട് തുറക്കാം. ഇതിൽ പലിശ ചേർക്കുന്നത് വാർഷികാടിസ്ഥാനത്തിലാണ്.