ഒറ്റത്തവണ നിക്ഷേപത്തിൽ മാസ വരുമാനം; 10 ലക്ഷം നിക്ഷേപിക്കാനുണ്ടോ? 20,000 രൂപ പെൻഷൻ ഉറപ്പിക്കാം; പദ്ധതിയിതാ

സ്വകാര്യ മേഖലയിലെ ജീവനക്കാർ വിരമിച്ചു കഴിയുമ്പോഴേക്കും ശേഷമുള്ള വരുമാന മാർ​ഗം കണ്ടെത്തണം. പിഎഫിൽ നിന്നും ​ഗ്രാറ്റുവിറ്റി ഇനത്തിലും വിരമിക്കുന്ന സമയത്ത് വലിയ തുക ലഭിക്കുന്നൊരാൾക്ക് ഇവ അനുയോജ്യമായ ഇടത്ത് നിക്ഷേപിച്ചാൽ തന്നെ വരുമാനം ഉണ്ടാക്കാം. ബിസിനസുകളിലേക്ക് നിക്ഷേപിക്കാനും ഓഹരികളിലേക്ക് നിക്ഷേപിക്കാനും വിവിധ പദ്ധതികളിൽ നിക്ഷേപിക്കാനുമായി വിവിധ തരം അഭിപ്രായങ്ങൾ ലഭിക്കാം.

സ്വന്തം റിസ്കും നിക്ഷേപിക്കുന്ന പദ്ധതിയെ കൃത്യമായി മനസിലാക്കിയും മാത്രമെ പണം വിനിയോ​ഗിക്കാൻ പാടുള്ളൂ. അധികം റിസ്കെടുക്കാതെ സുരക്ഷിത വരുമാനം ആ​ഗ്രഹിക്കുമ്പോൾ ഡെബ്റ്റ് നിക്ഷേപങ്ങൾ പരി​ഗണിക്കണം. റിസ്കില്ലാത്ത കേന്ദ്ര സർക്കാറിന്റെ ലഘു സമ്പാദ്യ പദ്ധതിയിൽ ഉൾപ്പെട്ട സീനിയര്‍ സിറ്റിസണ്‍ സേവിംഗ്‌സ് സ്‌കീം മുതിർന്ന പൗരന്മാർക്ക് അനുയോജ്യമാണ്.

സീനിയര്‍ സിറ്റിസണ്‍ സേവിംഗ്‌സ് സ്‌കീം

മുതിർന്ന പൗരന്മാർക്ക് സാമ്പത്തിക സുരക്ഷ ഒരുക്കുന്നതിന് കേന്ദ്ര സർക്കാർ നടപ്പിലാക്കുന്ന നിക്ഷേപമാണ് സീനിയര്‍ സിറ്റിസണ്‍ സേവിംഗ്‌സ് സ്‌കീം. 60 വയസ് കഴിഞ്ഞവര്‍ക്കാണ് സീനിയര്‍ സിറ്റിസണ്‍ സേവിംഗ്‌സ് സ്‌കീമില്‍ ചേരാന്‍ സാധിക്കുക. വൊളണ്ടറി റിട്ടയര്‍മെന്റ് എടുത്തവര്‍ക്ക് 55-ാം വയസിലും പദ്ധതിയില്‍ ചേരാം. ഒരാള്‍ക്ക് ഒന്നിലധികം അക്കൗണ്ട് ആരംഭിക്കാനാകും തടസങ്ങളില്ല. ഭാര്യയും ഭര്‍ത്താവും ചേര്‍ന്ന് സംയുക്ത അക്കൗണ്ടും ആരംഭിക്കാം.

30 ലക്ഷം വരെ നിക്ഷേപിക്കാം

സീനിയര്‍ സിറ്റിസണ്‍ സേവിംഗ്‌സ് സ്‌കീമില്‍ ചേരുന്നൊരാള്‍ക്ക് കുറഞ്ഞത് 1,000 രൂപ നിക്ഷേപിക്കണം. ആയിരത്തിന്റെ ഗുണിതങ്ങളായി 30 ലക്ഷം രൂപ വരെ പദ്ധതിയിൽ നിക്ഷപിക്കാം. നിക്ഷേപം ഒറ്റത്തവണയായാണ് നടത്തേണ്ടത്.

പോസ്റ്റ് ഓഫീസ് വഴിയോ ദേശസാൽകൃത ബാങ്കുകൾ വഴിയോ തിരഞ്ഞെടുത്ത സ്വകാര്യ ബാങ്കുകളിലോ സീനിയര്‍ സിറ്റിസണ്‍ സേവിംഗ്‌സ് സ്‌കീം അക്കൗണ്ട് ആരംഭിക്കാം. അക്കൗണ്ട് ആരംഭിക്കുന്ന സമയത്ത് നോമിനേഷന്‍ സൗകര്യമുണ്ട്. നിക്ഷേപിച്ച തുക പദ്ധതിയുടെ കാലാവധിയിൽ തിരികെ ലഭിക്കും.

പലിശ നിരക്ക്

പോസ്റ്റ് ഓഫീസ് ലഘു സമ്പാദ്യ പദ്ധതിയുടെ ഭാ​ഗമായതിനാൽ ത്രൈമാസത്തിൽ പലിശ അവലോകനം നടക്കും. നിലവിൽ ജൂലായ്- സെപ്റ്റംബർ പാദത്തിൽ 8.2 ശതമാനം പലിശ ലഭിക്കുന്നുണ്ട്. നിക്ഷേപിക്കുന്ന സമയത്തെ പലിശയാണ് കാലാവധി വരെ ലഭിക്കുക. ത്രൈമാസത്തിലാണ് പദ്ധതിയിൽ നിന്ന് പലിശ വരുമാനം ലഭിക്കുക. വർഷത്തിൽ മാര്‍ച്ച് 31, ജൂണ്‍ 30, സെപ്റ്റംബര്‍ 30, ഡിസംബര്‍ 31 എന്നീ തീയതികളിൽ പലിശ നൽകും.

കാലാവധി

സീനിയർ സിറ്റിസൺ സേവിം​ഗ്സ് സ്കീമിന്റെ കാലാവധി 5 വര്‍ഷമാണ്. 3 വര്‍ഷത്തേക്ക് കാലാവധി നീട്ടാം. കാലാവധിക്ക് മുന്‍പ് പിന്‍വലിച്ചാല്‍ പിഴ ഈടാക്കും. അക്കൗണ്ട് ആരംഭിച്ച് 1 വർഷം പൂർത്തിയാകുന്നതിന് മുൻപ് അക്കൗണ്ട് പിൻവലിച്ചാൽ പലിശ ലഭിക്കില്ല.

1 വര്‍ഷത്തിന് ശേഷം പിന്‍വലിച്ചാല്‍ മുതലിൽ നിന്ന് 1.5 ശതമാനവും 2 വര്‍ഷത്തിന് ശേഷം പിന്‍വലിച്ചാല്‍ 1 ശതമാനം തുകയും കുറച്ച് മാത്രമെ അനുവദിക്കുകയുള്ളൂ. കാലാവധി നീട്ടിയ അക്കൗണ്ട് 1 വർഷം പൂർത്തിയായ ശേഷം പിഴയില്ലാതെ പിൻവലിക്കാം.

പലിശ വരുമാനം

പരമാവധി നിക്ഷേപമായ 30 ലക്ഷം രൂപ നിക്ഷേപിക്കുമ്പോള്‍ 5 വര്‍ഷത്തേക്ക് ത്രൈമാസത്തില്‍ (മൂന്ന് മാസത്തിലൊരിക്കല്‍) 61,500 രൂപ ലഭിക്കും. 20 ലക്ഷം രൂപയാണ് നിക്ഷേപിക്കാന്‍ സാധിക്കുന്നതെങ്കില്‍ വരുമാനം ത്രൈമാസത്തില്‍ 41,000 രൂപയാണ്. 15 ലക്ഷം രൂപ നിക്ഷേപിച്ചാല്‍ ത്രൈമാസത്തില്‍ 30,750 രൂപ പലിശയായി വാങ്ങാം.

പത്ത് ലക്ഷം നിക്ഷേപിക്കാന്‍ സാധിച്ചാല്‍ ത്രൈമാസത്തില്‍ 20,500 രൂപ ലഭിക്കും. 5 ലക്ഷം രൂപയാണ് നിക്ഷേപിക്കുന്നതെങ്കില്‍ 10,250 രൂപയും 1 ലക്ഷം രൂപ നിക്ഷേപിച്ചാല്‍ 2,050 രൂപയും ലഭിക്കും.

നികുതി ഇളവ്

സീനിയര്‍ സിറ്റിസണ്‍ സേവിംഗ്‌സ് സ്‌കീമിലെ നിക്ഷേപത്തിന് ആദായ നികുതി നിയമത്തിലെ സെക്ഷന്‍ 80സി പ്രകാരം 1.5 ലക്ഷം രൂപ നികുതി ഇളവ് ലഭിക്കും. പലിശയ്ക്ക് നികുതി ബാധകമാണ്. സാമ്പത്തിക വര്‍ഷത്തില്‍ പലിശ 50,000 രൂപ കടക്കുകയാണെങ്കില്‍ 10 ശതമാനം സ്രോതസില്‍ നിന്നുള്ള നികുതി ഈടാക്കും. നികുതി ബാധകമായ വരുമാനം ഉള്ളവർ ടാക്സ് സ്ലാബ് അനുസരിച്ച് നികുതി നൽകണം.