വയസ് 35 ൽ എത്തിയോ? നിക്ഷേപം തുടങ്ങാൻ പറ്റിയ സമയം; 25,000 രൂപയിൽ നിന്ന് 1 കോടി സമ്പാദിക്കാം

പ്രായമാകുന്തോറും കയ്യിൽ സാമ്പത്തികമില്ലെങ്കിൽ ആശങ്കയേറും. സാമ്പത്തിക സ്വാതന്ത്ര്യം തേടുന്നൊരാളാണെങ്കിൽ പറ്റുന്നത്രയും വേ​ഗം മികച്ച റിട്ടേൺ നൽകുന്ന നിക്ഷേപ മാർ​ഗം കണ്ടെത്തുക എന്നതാണ് ബുദ്ധി. ഓഹരികൾ, മ്യൂച്വൽ ഫണ്ട്, റിയൽ എസ്റ്റേറ്റ്, സ്വർണം, സ്ഥിര നിക്ഷേപം എന്നിങ്ങനെ നിരവധി നിക്ഷേപ സാധ്യതകളാണുള്ളത്. 35 വയസുാകാരന് ഇവയിൽ ഏത് നിക്ഷേപം അനുയോജ്യമാകും എന്നും എങ്ങനെ നിക്ഷേപിക്കാമെന്നും നോക്കാം.

35-ാം വയസിൽ നിക്ഷേപം

35-ാം വയസിൽ നിക്ഷേപം ആരംഭിക്കുക എന്നത് വെെകിയുള്ള തീരുമാനമല്ല. ജീവിതത്തിലും കരിയറിലെയും മുന്നോട്ടേക്കുള്ള യാത്രയിൽ സുപ്രധാന ഘട്ടമായ ഈ സമയം സാമ്പത്തിക സുരക്ഷയ്ക്ക് പ്രധാന്യം നൽകേണ്ടതുണ്ട്. അതിനാൽ ഭാവി അറിഞ്ഞുള്ള നിക്ഷേപങ്ങൾ നടത്തണം. പ്രതിമാസ സമ്പാദ്യത്തിൽ നിന്നൊരു തുക ഇക്വിറ്റി മ്യൂച്വൽ ഫണ്ടിലേക്ക് സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ വഴി നിക്ഷേപിക്കുന്നതാകും ഉചിതം.

വൈകല്ലേ, നേരത്തെ നിക്ഷേപിക്കാം

എസ്ഐപി നിക്ഷേപം തുടങ്ങാൻ ആ​ഗ്രഹിക്കുന്നവരാണെങ്കിൽ ഇനിയും വൈകരുത്. വൈകിയാൽ പ്രതിമാസം നൽകേണ്ട തുകയിൽ വർധനവ് ഉണ്ടാകും. ഉദാഹരണത്തിന് 30-ാം വയസിൽ നിക്ഷേപം ആരംഭിക്കുന്നൊരു വ്യക്തിക്ക് 60-ാം വയസിൽ 10 കോടിയിലേക്ക് പ്രതിമാസം 28,000 രൂപ നിക്ഷേപിക്കേണ്ടതായി വരും. അതേസമയം 10 വർഷം വൈകി 40-ാം വയസിലാണ് നിക്ഷേപം തുടങ്ങുന്നതെങ്കിൽ പ്രതിമാസം 1 ലക്ഷം രൂപയുടെ എസ്ഐപി ചെയ്താൽ മാത്രമെ 60-ാം വയസിൽ 10 കോടി രൂപ നേടൻ സാധിക്കുകയുള്ളൂ.

എത്ര രൂപ നിക്ഷേപിക്കണം

പ്രതിമാസ നിക്ഷേപത്തിന് തയ്യാറായാൽ സാധിക്കുന്ന പരമാവധി തുക നിക്ഷേപിക്കുക എന്നതാണ് അനുയോജ്യം. അതോടൊപ്പം എസ്ഐപി കാൽക്കുലേറ്റർ ഉപയോ​ഗിച്ച് നിശ്ചിത കാലയളവ് കൊണ്ട് ലക്ഷ്യത്തിലെത്താൻ എത്ര രൂപയുടെ നിക്ഷേപം ആവശ്യമാണെന്ന് കണക്കാക്കാം. വർഷത്തിൽ 13 ശതമാനം റിട്ടേൺ പ്രതീക്ഷിക്കുന്ന ഇക്വിറ്റി മ്യൂച്വൽ ഫണ്ടിൽ 13 വർഷം നിക്ഷേപിക്കാൻ തയ്യാറാണെങ്കിൽ മാസം 25,000 രൂപയാണ് നിക്ഷേപത്തിനായി കരുതേണ്ടത്. 48-ാം വയസിൽ നിക്ഷേപകന് ഒരു കോടി രൂപ നേടാം.

13 വർഷ കാലത്തെ നിക്ഷേപം 39 ലക്ഷം രൂപയായിരിക്കും. 63 ലക്ഷം രൂപ റിട്ടേണായി ലഭിക്കുമ്പോൾ കാലാവധിയിൽ 1 കോടി രൂപ സമാഹരിക്കാൻ സാധിക്കും. എസ്ഐപി കാൽക്കുലേറ്ററിൽ ഉപയോ​ഗിച്ച 13 ശതമാനം റിട്ടേൺ ഉദാഹരണമായി എടുക്കുന്നതാണ്. ഇക്വിറ്റിയിൽ നിന്നുള്ള വരുമാനം നേ‌ർരേഖയിലല്ലാത്തതിനാൽ വിപണിയിലെ ചാഞ്ചാട്ടങ്ങളെ ഇത് സ്വാധീനിക്കും.

കുറഞ്ഞ തുകയുടെ നിക്ഷേപം

മാസം 25,000 രൂപ നിക്ഷേപിക്കാൻ സാധിക്കാത്തവരാണെങ്കിൽ കുറഞ്ഞ തുകയിലും 1 കോടി എന്ന ലക്ഷ്യത്തിലേക്ക് എത്താം. അൽപം കാത്തിരുന്നാൽ മതി. 10,000 രൂപയുടെ പ്രതിമാസ എസ്‌ഐപി നിക്ഷേപത്തിൽ 12 ശതമാനം വാർഷിക വളർച്ച ലഭിച്ചാൽ 20 വർഷവും ഒരു മാസവും കൊണ്ട് 1 കോടി രൂപയിലെത്താം. അതായത് 35-ാം വയസിൽ നിക്ഷേപം ആരംഭിക്കുന്നൊരാൾക്ക് 55-ാം വയസിൽ വിരമിക്കൽ കാലത്തേക്കുള്ള ചെലവുകൾക്ക് ഈ നിക്ഷേപം ഉപകരിക്കും.

പ്രതിമാസ എസ്ഐപി തുക വർഷത്തിൽ 5 ശതമാനം വീതം വർധിപ്പിച്ചാൽ 17 വർഷവും 10 മാസവും കൊണ്ട് നിങ്ങൾ 1 കോടി രൂപയിലെത്തും. 15 വർഷത്തിനുള്ളിൽ ഒരു കോടി രൂപയിലെത്താൻ 20,000 രൂപയുടെ പ്രതിമാസ എസ്‌ഐപി മതിയാകും. അതേസമയം പ്രതിമാസ എസ്ഐപി തുകയിൽ 5 ശതമാനം വാർഷിക വർധനവോടെ 20,000 രൂപ നിക്ഷേപിച്ചാൽ 13 വർഷവും 5 മാസവും കൊണ്ട് നിങ്ങൾ 1 കോടി രൂപയിലെത്തും.

അറിയിപ്പ്

മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നല്‍കുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.