ടിക്കറ്റുള്ള യാത്രക്കാർക്ക് സ്വാഗതം; ഡോർമിറ്ററി മുതൽ എസി റൂം വരെ; കുറഞ്ഞ നിരക്കിൽ റെയിൽവേയുടെ താമസം റെഡി

കാലത്തിനൊത്ത മാറ്റം ഇന്ത്യൻ റെയിൽവെയിലുമുണ്ട്. യാത്രക്കാർക്കായി മികച്ച സൗകര്യങ്ങളും വേ​ഗതയുമുള്ള വന്ദേ ഭാരത് ട്രെയിനുകളടക്കം ഇന്ത്യൻ റെയിൽവെ അവതരിപ്പിക്കുന്നുണ്ട്. ഇത്തരം പ്രീമിയം സേവനങ്ങളോടൊപ്പം തന്നെ ചെലവ് ചുരുക്കിയുമുള്ള യാത്രയ്ക്കും ഏറ്റവും മിച്ച വഴി ഇന്ത്യൻ റെയിൽവെ തന്നെയാണ്. യാത്രയോടൊപ്പം താമസത്തിനുള്ള സൗകര്യങ്ങളും ഇന്ത്യൻ റെയിൽവെ ഒരുക്കുന്നുണ്ട്.

പലരും യാത്രക്കാർക്കുള്ള വിശ്രമ മുറികളെ താമസ സൗകര്യങ്ങളായി തെറ്റിദ്ധരിക്കാറുണ്ട്. ഇത് കൂടാതെ കുറഞ്ഞ ചെലവിൽ എല്ലാ സൗകര്യങ്ങളോടും കൂടിയ താമസ മുറികൾ റിട്ടയറിം​ഗ് റൂം എന്ന പേരിൽ ഐആർസിടിസി യാത്രക്കാർക്ക് നൽകുന്നുണ്ട്. റെയിൽവെയുടെ ഈ ചെലവ് ചുരുക്കിയുള്ള താമസ സൗകര്യത്തെ എങ്ങനെ പ്രയോജനപ്പെടുത്താമെന്ന് നോക്കാം.

ഐആർസിടിസി റിട്ടയറിം​ഗ് റൂം

റെയിൽവെ സ്റ്റേഷൻ കെട്ടിടത്തിൽ തന്നെ ഇന്ത്യൻ റെയിൽവെ അനുവദിക്കുന്ന താമസ സൗകര്യമാണ് റിട്ടയറിം​ഗ് റൂമുകൾ. രാജ്യത്തെ പ്രധാന റെയില്‍വെ സ്റ്റേഷനുകളിലെല്ലാം ഇന്ത്യന്‍ റെയില്‍വെ കാറ്ററിഗ് ആന്‍ഡ് ടൂറിസം കോര്‍പ്പറേഷന്‍ (ഐആര്‍സിടിസി) ഈ താമസ സൗകര്യം ഒരുക്കുന്നുണ്ട്. എസി, നോൺ എസി കോമ്പിനേഷനുള്ള സിംഗിൾ, ഡബിൾ റൂമുകൾ, ഡോർമിറ്ററി തരത്തിലുള്ള താമസ സൗകര്യം എന്നിവ റെയിൽവെ സ്റ്റേഷനുകളിലെ റിട്ടയറിം​ഗ് റൂമിൽ ലഭ്യമാണ്.

ടിക്കറ്റുള്ള യാത്രക്കാർക്ക് സ്വാ​ഗതം

കൺഫോം അല്ലെങ്കിൽ ആർഎസി റിസർവേഷനുള്ള ഏതൊരു യാത്രക്കാരനും റെയിൽവേ സ്റ്റേഷനുകളിലെ റിട്ടയറിം​ഗ് റൂമുകൾ ഉപയോഗിക്കാം. വെയ്റ്റ് ലിസ്റ്റിലുള്ള യാത്രക്കാർക്ക് മുറികൾ ബുക്ക് ചെയ്യാൻ അനുവദിക്കില്ല. കുറഞ്ഞത് 1 മണിക്കൂർ മുതൽ പരമാവധി 48 മണിക്കൂർ വരെ മുറികൾ ബുക്ക് ചെയ്യാം. ചില റെയിൽവെ സ്റ്റേഷനുകൾ മണിക്കൂർ അടിസ്ഥാനമാക്കിയുള്ള ബുക്കിംഗും ലഭ്യമാണ്. യാത്ര ആരംഭിക്കുന്ന സ്റ്റേഷനിലോ യാത്ര അവസാനിക്കുന്ന സ്റ്റേഷനിലോ ആണ് റിട്ടയറിം​ഗ് റൂം ബുക്ക് ചെയ്യാൻ സാധിക്കുക.

സിംഗിള്‍ റൂം, ഡബിള്‍ റൂം, ഡോര്‍മെറ്ററി എന്നി സൗകര്യങ്ങളാണ് റിട്ടയറിംഗ് റൂമില്‍ വരുന്നത്. എസി, നോണ്‍ എസി വിഭാ​ഗങ്ങളിൽ റൂം സൗകര്യം ലഭിക്കും. ഒറ്റ യാത്രക്കാരനാണെങ്കിൽ സിം​ഗിൽ റൂമോ ഡോർമെറ്ററി സൗകര്യമോ മാത്രമാണ് അനുവദിക്കുക. രണ്ട് യാത്രക്കാരുള്ള പിഎൻആർ നമ്പർ വഴി ബുക്ക് ചെയ്യുമ്പോൾ ഡബിൾ റൂമോ രണ്ട് ഡോർമെറ്ററിയോ ലഭിക്കും.

റിട്ടയറിം​ഗ് റൂം ഓൺലൈനിൽ ബുക്ക് ചെയ്യാം

ഐആർസിടിസി റിട്ടയറിം​ഗ് റൂമുകൾ ഓൺലൈനായും ഓഫ്‍ലൈനായും ബുക്ക് ചെയ്യാൻ സാധിക്കും. ഓൺലൈൻ ബുക്കിം​ഗ് സൗകര്യം നൽകുന്ന റെയിൽവെ സ്റ്റേഷനുകളിൽ https://www.rr.irctctourism.com/ എന്ന വെബ്സൈറ്റ് വഴി ബുക്ക് ചെയ്യാം. വെബ്സൈറ്റിൽ ലോഗിൻ ചെയ്ത ശേഷം താമസ സൗകര്യം ആവശ്യമുള്ള റെയിൽവെ സ്റ്റേഷൻ, ചെക്ക് ഇന്‍, ചെക്ക് ഔട്ട് തീയതികള്‍, ബെഡ് ടൈപ്പ്, യാത്രക്കാരുടെ എണ്ണം എന്നിവ തിരഞ്ഞെടുക്കുക. ശേഷം പേര്, മേൽവിലാസം, തിരിച്ചറിയൽ വിവരങ്ങൾ നൽകിയ ശേഷം പണമടച്ച് ബുക്കിം​ഗ് പൂർത്തിയാക്കാം.

ചാർജുകൾ എങ്ങനെ

ഐആർസിടിസി റിട്ടയറിം​ഗ് റൂമുകളുടെ നിരക്കുകൾ ഓരോ റെയിൽവെ സ്റ്റേഷൻ അനുസരിച്ചും വ്യത്യാസപ്പെട്ടിരിക്കും. 24 മണിക്കൂർ വരെ ബുക്കിംഗിനുള്ള റിട്ടയർ റൂമിന് ഐആർസിടിസി സർവീസ് ചാർജ് 20 രൂപയാണ്. ഡോർമിറ്ററി ആണെങ്കിൽ 10 രൂപ സർവീസ് ചാർജ് ഈടാക്കും. 24 മണിക്കൂർ മുതൽ 48 മണിക്കൂർ വരെ ബുക്കിംഗിന് റിട്ടയർ റൂമിന് 40 രൂപയും ഡോർമിറ്ററി ബെഡിന് 20 രൂപയും ഈടാക്കും.

ബുക്കിം​ഗ് റദ്ദാക്കൽ

ബുക്ക് ചെയ്ത റിട്ടയറിം​ഗ് റൂം റദ്ദാക്കാനും സാധിക്കും. യാത്രക്കാർ ചെക്ക്ഇൻ തീയതിക്ക് 2 ദിവസം മുൻപ് ബുക്കിം​ഗ് റദ്ദാക്കിയാൽ ബുക്കിംഗ് തുകയിൽ നിന്ന് 20 ശതമാനം കുറച്ച് ബാക്കി അനുവദിക്കും. ചെക്ക്ഇൻ തീയതിക്ക് ഒരു ദിവസം മുൻപ് റദ്ദാക്കിയാൽ 50 ശതമാനം കിഴിവോടെ തുക അനുവദിക്കും. അവസാന നിമിഷം ബുക്കിം​ഗ് റദ്ദാക്കിയാൽ തുക തിരികെ ലഭിക്കില്ല.