സ്വർണവിലയിൽ ഇടിവോടെ തുടങ്ങി ജൂൺ, വില ഇനിയും കുറയുമോ, ഇന്നത്തെ നിരക്കറിയാം

ജൂൺ മാസത്തിന്‍റെ ആരംഭമാണ് ഇന്ന്. ആഭരണ പ്രേമികളെ സംബന്ധിച്ചിടത്തോളം സന്തോഷിക്കാനുള്ള വകയുണ്ട്. കാരണം സ്വർണവിലയിൽ നേരിയ കുറവുണ്ടായിട്ടുണ്ട്. ജൂൺ മാസത്തിലെ വരും ദിവസങ്ങളിലും വില കുറഞ്ഞാൽ അത് സ്വർണം വാങ്ങാൻ കാത്തിരിക്കുന്നവർക്ക് നൽകുന്ന ആശ്വാസം വലുതായിരിക്കും.

ഇന്ന് കുറഞ്ഞത് 160 രൂപ

പവന് 53360 രൂപ എന്ന നിരക്കിലായിരുന്നു മെയ് 31 വെള്ളിയാഴ്ച സംസ്ഥാനത്ത് സ്വർണവ്യാപാരം നടന്നത്. എന്നാൽ ഇന്ന് 160 രൂപയുടെ കുറവുണ്ട്. ഒരു പവൻ സ്വർണ്ണത്തിന് 53,200 രൂപയും, ഗ്രാമിന് 6,650 രൂപയുമാണ് വില.

വില കുറയാൻ കാരണം

ഫെഡ് പലിശ നിരക്കുകൾ സംബന്ധിച്ച അവ്യക്തതകൾ തുടരുന്നത് പാശ്ചാത്യ നിക്ഷേപകർ സ്വർണ്ണത്തിൽ നിന്ന് വിട്ടു നിൽക്കാൻ കാരണമായിട്ടുണ്ട്. ഈ വർഷം നാല് തവണ പലിശ നിരക്കുകൾ കുറയ്ക്കുമെന്ന് വിലയിരുത്തലുകളുണ്ടായിരുന്നു. എന്നാൽ യു.എസിലെ പണപ്പെരുപ്പം താഴ്ന്നു നിൽക്കാത്ത സാഹചര്യമാണ് നിലവിലേത്. ഇതിനാൽ പലിശ നിരക്കുകൾ എപ്പോൾ കുറയ്ക്കുമെന്നതിനെ സംബന്ധിച്ച് കൃത്യതയില്ല. ചൈനയിലെ റീടെയിൽ നിക്ഷേപകരുടെ പങ്കാളിത്തം കുറഞ്ഞു നിൽക്കുന്നതും സ്വർണ്ണത്തിന്റെ വില താഴ്ത്തി നിർത്തുന്ന ഘടകങ്ങളിലൊന്നാണ്.

ആഗോള സ്വർണവില

അന്താരാഷ്ട്ര തലത്തിൽ സ്വർണ്ണം ശനിയാഴ്ച രാവിലെ നഷ്ടത്തിലാണ് വ്യാപാരം ക്ലോസ് ചെയ്തിരിക്കുന്നത്. ട്രോയ് ഔൺസിന് 16.57 ഡോളർ (0.71%) താഴ്ന്ന് 2,327.36 ഡോളർ എന്നതാണ് നിലവാരം.

പവൻ വാങ്ങാൻ 57,000 രൂപ നൽകണം

സ്വർണാഭരണം വാങ്ങുമ്പോൾ പവന്‍റെ വിലയോടൊപ്പം പണിക്കൂലി, നികുതി, ഹാള്‍മാര്‍ക്കിങ് നിരക്കുക ള്‍എന്നിവയെല്ലാം ചേര്‍ത്ത് വലിയൊരു തുക നൽകേണ്ടി വരും. ശരാശരി 5 ശതമാനമാണ് പണിക്കൂലി. 3 ശതമാനം ജിഎസ്ടിയും. അങ്ങനെ കണക്ക് കൂട്ടിയാൽ ഇന്നത്തെ വിലയിൽ 1 പവൻ സ്വർണാഭരണം വാങ്ങുമ്പോൾ ഏകദേശം 57,000 രൂപ നൽകേണ്ടി വരും.

റെക്കോർഡ് വില മെയ് മാസം

സംസ്ഥാനത്തിന് ചരിത്രത്തിലെ ഏറ്റവും ഉയർന്ന വില രേഖപ്പെടുത്തിയ മാസം മെയ് ആണ്. മെയ് 20-ആം തീയ്യതി ഒരു പവൻ സ്വർണ്ണത്തിന് 55,120 രൂപയും ഗ്രാമിന് 6,890 രൂപയുമായിരുന്നു വില. മെയ് ഒന്നാം തിയ്യതി പവന് 52,440 രൂപയും, ഗ്രാമിന് 6,555 രൂപയുമായിരുന്നു വില. 31-ആം തീയ്യതി 53,360 രൂപയായിരുന്നു ഒരു പവൻ സ്വർണത്തിന്‍റെ വില. ഒന്നാം തീയ്യതിയിലെ വിലയുമായി താരതമ്യപ്പെടുത്തുമ്പോൾ 920 രൂപയുടെ വർധനവ്

ഗോള്‍ഡ് അഡ്വാന്‍സ് ബുക്കിംഗ്

സ്വര്‍ണവില ഉയരുന്ന കാലത്ത് അധിക ഭാരം ഏറ്റെടുക്കാതെ സ്വര്‍ണം വാങ്ങാന്‍സാധാരണക്കാരെ സഹായിക്കുന്നൊരു മാര്‍ഗമാണ് ഗോള്‍ഡ് അഡ്വാന്‍സ് ബുക്കിംഗ് പ്ലാന്‍. വില ഇനിയും ഉയരുമെന്ന കണക്കുകൂട്ടലിൽ നിലവിലുള്ള വിലയില്‍സ്വര്‍ണം ബുക്ക് ചെയ്യാനുള്ള അവസരമാണ് അഡ്വാന്‍സ് ബുക്കിംഗിലൂടെ ലഭിക്കുന്നത്.

സ്വര്‍ണവിലയുടെ 10 ശതമാനം മുതല്‍അഡ്വാന്‍സ് നല്‍കി സ്വര്‍ണം ബുക്ക് ചെയ്യാം. സ്വര്‍ണ വില കൂടിയാല്‍ബുക്ക് ചെയ്ത വിലയിലും വില കുറഞ്ഞാല്‍കുറഞ്ഞ വിലയിലും സ്വര്‍ണം ലഭിക്കും എന്നതാണ് അഡ്വാൻസ് ബുക്കിം​ഗിന്റെ പ്രത്യേകത.

4 വർഷം കൊണ്ട് കൂടിയത് 25,000 രൂപ

പവന്‍റെ വില 25,000 കടക്കുന്നത് 2019 ലാണ്. 2020 ൽ വില 30,000 രൂപയ്ക്ക് മുകളിലെത്തി. രണ്ട് വർഷത്തിന് ശേഷം പവന്‍റെ വില 40,000 രൂപ കടന്നു. 2023-ൽ 45,000 രൂപയും 2024 മാർച്ച് 29-ന് പവന്‍റെ വില അരലക്ഷം രൂപയും കടന്നു.