സേവിം​ഗ്സ് അക്കൗണ്ടിന് 7.15%; സ്ഥിര നിക്ഷേപത്തിന് 8.07%; പലിശയിൽ ഞെട്ടിച്ച് മലയാളിയുടെ സ്വന്തം ബാങ്ക്

പലിശ നിരക്കിൽ മുൻനിരയിലുള്ളത് സ്വകാര്യ ബാങ്കുകളാണ്. റെ​ഗുലർ നിക്ഷേപകർക്കും മുതിർന്ന പൗരന്മാർക്കും 8 ശതമാനത്തിന് മുകളിൽ പലിശ നൽകുന്ന ബാങ്കുകളായി ഇന്ന് വിപണിയിലുള്ളത് സ്വകാര്യ ബാങ്കുകളാണ്. ഈകൂട്ടത്തിലേക്ക് കേരളത്തിൽ നിന്നുള്ള പ്രമുഖ സ്വകാര്യ ബാങ്കായ ഫെഡറൽ ബാങ്കിനും ഇനി സ്ഥാനമുണ്ട്.

പലിശ നിരക്ക് പുതുക്കിയതോടെ ഫെഡറൽ ബാങ്കിൽ നിന്ന് ഇനി മുതൽ ലഭിക്കുന്ന ഉയർന്ന നിരക്ക് 8.07 ശതമാനമായി ഉയർന്നു. അതോടൊപ്പം സേവിം​ഗ്സ് അക്കൗണ്ട് പലിശ നിരക്ക് 7.50 ശതമാനമാണ്.

റിപ്പോ നിരക്കുകൾ തൽസ്ഥിതി തുടരുന്ന ഘട്ടത്തിൽ സ്ഥിര നിക്ഷേപമിടാൻ ആ​ഗ്രഹിക്കുന്നവർക്ക് വേ​ഗത്തിൽ സ്ഥിര നിക്ഷേപമിടാമെന്നാണ് നിക്ഷേപ വിദ​ഗ്ധരുടെ അഭിപ്രായം. അടുത്ത 6-9 മാസത്തിനുള്ളില്‍ റിപ്പോ നിരക്ക് കുറയുമെന്നാണ് സാമ്പത്തിക വിദ​ഗ്ധരുടെ അനുമാനം. അതോടെ നിക്ഷേപ പലിശ നിരക്കുകളുടെ ആകർഷണവും കുറവും. ഉയര്‍ന്ന പലിശ ലഭിക്കുന്നതിനാല്‍ നിലവിലെ സാഹചര്യത്തില്‍ ദീര്‍ഘകാലത്തേക്ക് ഉയര്‍ന്ന പലിശ ലഭിക്കുന്ന സ്ഥിര നിക്ഷേപങ്ങളെ ഉപയോഗപ്പെടുത്തുന്നതാകും ബുദ്ധി. ഫെഡറൽ ബാങ്കിലെ നിക്ഷേപ പലിശ പരിശോധിക്കാം.

പലിശ പുതുക്കി

ഫെഡറൽ ബാങ്ക് 2 കോടി രൂപയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്ക് 77 അടിസ്ഥാന നിരക്കാണ് വർധിപ്പിച്ചത്. 13 മാസം കാലാവധിയുള്ള സ്ഥിര നിക്ഷേപത്തിന് റെ​ഗുലർ നിക്ഷേപകർക്ക് 7.30 ശതമാനവും മുതിർന്ന പൗരന്മാർക്ക് 8.07 ശതമാനവും പലിശ ലഭിക്കും.

പുതുക്കിയ പലിശ നിരക്കുകൾ പരിമിത കാലത്തേക്ക് മാത്രമേ ലഭ്യമാവുകയുള്ളൂ എന്നാണ് ഫെഡറൽ ബാങ്ക് അറിയിക്കുന്നത്. ഇതോടെ റെ​ഗുലർ നിക്ഷേപകർക്ക് 3-7.30 ശതമാനം പലിശയും മുതിർന്ന പൗരന്മാർക്ക് 3.50- 8.07 ശതമാനം പലിശയും ബാങ്കിൽ നിന്ന് ലഭിക്കും.

മറ്റു പലിശ നിരക്കുകൾ

7 മുതൽ 29 ദിവസങ്ങൾക്കുള്ളിൽ കാലാവധി പൂർത്തിയാകുന്ന നിക്ഷേപങ്ങൾക്ക് 3 ശതമാനം പലിശയാണ് റെ​ഗുലർ നിക്ഷേപകർക്ക് നൽകുന്നത്. 30 മുതൽ 45 ദിവസം വരെ കാലാവധി പൂർത്തിയാകുന്ന നിക്ഷേപങ്ങൾക്ക് 3.25 ശതമാനവും 46 ദിവസം മുതൽ 60 ദിവസം വരെ 4 ശതമാനവും 61 ദിവസം മുതൽ 90 ദിവസം വരെ 4.75 ശതമാനവും 91 മുതൽ 119 ദിവസ കാലാവധിയുള്ള നിക്ഷേപങ്ങൾക്ക് 4.75 ശതമാനവും പലിശ ലഭിക്കും.

120 മുതൽ 180 ദിവസ കാലാവധിയിൽ 5 ശതമാനാണ് പലിശ നിരക്ക്. 181 ദിവസം മുതൽ 270 ദിവസം വരെയുള്ള നിക്ഷേപങ്ങൾക്ക് 5.75 ശതമാനവും 271 ദിവസം മുതൽ ഒരു വർഷത്തിൽ താഴെ 6 ശതമാനവും പലിശ ലഭിക്കും.

1 വർഷം മുതൽ 15 മാസത്തിൽ താഴെ കാലാവധിയുള്ള സ്ഥിര നിക്ഷേപങ്ങൾക്ക് 6.80 ശതമാനവും 15 മാസം മുതൽ 2 വർഷം വരെ കാലാവധിയുള്ള നിക്ഷേപങ്ങൾക്ക് 7.25 ശതമാനവുമാണ് റെ​ഗുലർ നിക്ഷേപകർക്കുള്ള പലിശ നിരക്ക്.

രണ്ട് വർഷത്തിൽ കൂടുതലും മുതൽ മൂന്ന് വർഷത്തിൽ താഴെ വരെ കാലാവധിയുള്ള നിക്ഷേപങ്ങൾക്ക് 6.75 ശതമാനമാണ് പലിശ. മൂന്ന് വർഷം മുതൽ 10 വർഷത്തേക്ക് 6.60 ശതമാനമാണ് പലിശ നിരക്ക്. 5 വർഷത്തിന് മുകളിൽ മുതിർന്ന പൗരന്മാർക്ക് 7.25 ശതമാനം പലിശ ലഭിക്കും.

സേവിം​ഗ്സ് അക്കൗണ്ടിൽ 7.15 ശതമാനം

ഫെഡറൽ ബാങ്കിന്റെ സേവിംഗ്സ് ബാങ്ക് അക്കൗണ്ടുകൾക്ക് 7.15 ശതമാനം വരെ പലിശ ലഭിക്കുന്നുണ്ട്. ഫെഡറൽ ബാങ്ക് സേവിം​ഗ്സ് അക്കൗണ്ട് പലിശ നിരക്കുകൾ റിപ്പോ നിരക്കുകളുമായി ബന്ധിപ്പിച്ചിരിക്കുന്നവയാണ്. T+1 അടിസ്ഥാനത്തിൽ റിസർവ് ബാങ്ക് റിപ്പോ നിരക്ക് പരിഷ്കരിക്കുമ്പോൾ പലിശ നിരക്കുകൾ മാറും.

റസിഡന്റ്/എൻആർഇ/ഒഎൻആർ സേവിംഗ്‌സ് ബാങ്ക് അക്കൗണ്ടുകളിൽ ഈ പലിശ ലഭിക്കും. ദിവസാവസാനം ബാലൻസ് കണക്കാക്കി ത്രൈമാസ അടിസ്ഥാനത്തിൽ പലിശ അക്കൗണ്ടുകളിലേക്ക് ക്രെഡിറ്റ് ചെയ്യപ്പെടുകയാണ് ചെയ്യുക.