തിരുവനന്തപുരം: പ്രവാസികളെയും കരുതലോടെ ചേര്ത്തു പിടിച്ചുകൊണ്ട് രണ്ടാം പിണറായി സര്ക്കാറിന്റെ ആദ്യ ബജറ്റ്്. ധനമന്ത്രി കെ.എന്.ബാലഗോപാല് അവതരിപ്പിച്ച ബജറ്റില് പ്രവാസി പുനരധിവാസത്തിനായി 1,000 കോടി രൂപയുടെ വായ്പാ പദ്ധതിയാണ് ഉള്പ്പെടുത്തിയിരിക്കുന്നത്. സാധാരണ വായ്പാ നിരക്കുകളെക്കാളും കുറഞ്ഞ പലിശ നിരക്ക് മാത്രമേ ഈ വായ്പകളില് നിന്നും ഈടാക്കുകയുള്ളൂ.
കോവിഡ് കാരണം തൊഴില് നഷ്ടപ്പെട്ട പ്രവാസികള്ക്ക് നാട്ടില് പുതുതായി സംരഭങ്ങളോ സ്വയം തൊഴിലോ ആരംഭിക്കുവാന് ഈ വായ്പാ പദ്ധതി സഹായകമാകും. കോവിഡ് സാഹചര്യത്തില് നാട്ടിലേക്ക് മടങ്ങേണ്ടി വന്ന ആയിരക്കണക്കിന് പ്രവാസികള്ക്ക് വായ്പാ പദ്ധതി ആശ്വാസകരമാകും. വായ്പയ്ക്കായുളള പലിശ ഇളവിനായി 25 കോടി വകയിരുത്തുമെന്നും ബജറ്റില് പറയുന്നു. കൂടാതെ പ്രവാസി ക്ഷേമത്തിനായുള്ള ബജറ്റ് വിഹിതം 170 കോടി രൂപയാക്കി ഉയര്തതുമെന്നും ധനമന്ത്രി ബജറ്റില് പറഞ്ഞു.
വായ്പ എടുത്ത വ്യക്തി മരണപ്പെട്ടാല് വായ്പയ്ക്ക് എന്ത് സംഭവിക്കും? തുടര്ന്നുള്ള തിരിച്ചടവ് എങ്ങനെ?
കോവിഡ് സൃഷ്ടിച്ച സാമ്പത്തിക ഞെരുക്കത്തില് നിന്നും കേരളത്തെ കരകയറ്റാനുള്ള പരിശ്രമങ്ങളാണ് രണ്ടാം പിണറായി സര്ക്കാര് നടത്തി വരുന്നത്. അതിനാല് തന്നെ ആരോഗ്യമേഖലയ്ക്കായിരുന്നു ഇത്തവണത്തെ ബജറ്റില് പ്രാമുഖ്യം നല്കിയിരുന്നതും. മതിയായ സംവിധാനങ്ങളോടെ ആരോഗ്യമേഖലയെ സുസജ്ജമാക്കുക എന്ന ലക്ഷ്യത്തിലേക്കാണ് ബജറ്റ് ഈന്നല് നല്കുന്നത്. 20,000 കോടി രൂപയുടെ സാമ്പത്തിക പാക്കേജാണ് സര്ക്കാര് ബജറ്റില് പ്രഖ്യാപിച്ചത്. കോവിഡ് മഹാമാരിയുടെ പശ്ചാത്തലത്തില് കന്നി ബജറ്റില് പുതിയ നികുതികളോ നികുതി വര്ധനവോ ധനമന്ത്രി അവതരിപ്പിച്ചിട്ടില്ല. നികുതിയില് ഒറ്റത്തവണയായുള്ള തീര്പ്പാക്കലും സര്ക്കാര് തുടരും
എന്നാല് കോവിഡ് സാഹചര്യത്തില് വ്യാപാരികളെ സമ്മര്ദത്തിലാക്കി സര്ക്കാര് നികുതി പിരിക്കുകയില്ല എന്നും ബജറ്റലൂടെ മന്ത്രി വ്യക്തമാക്കിയിട്ടുണ്ട്. അതേ സമയം കോവിഡ് വ്യാപനം ശമിക്കുകയും ജനജീവിതം സാധാരണനിലയിലേക്കാവുകയും ചെയ്യുമ്പോള് നികുതി, നികുതിയേതര വരുമാനം വര്ധിപ്പിക്കേണ്ടി വരുമെന്നും ധനമന്ത്രി വ്യക്തമാക്കിയിട്ടുണ്ട്.