ഹൃസ്വകാലത്തേക്ക് 7.5% മുതൽ 7.75% വരെ പലിശ; ബോണസായി സർക്കാർ സുരക്ഷ; 2 നിക്ഷേപങ്ങളിതാ

സ്ഥിര നിക്ഷേപമാകുമ്പോൾ സുരക്ഷിതത്വം നിക്ഷേപകർ ആ​ഗ്രഹിക്കുന്നുണ്ട്. മറ്റു റിസ്കെടുക്കാൻ താല്പര്യമില്ലാത്തതിനാലാണ് പലരും സ്ഥിര നിക്ഷേപത്തിലേക്ക് തിരിയുന്നത്. ഇതിനാൽ നിക്ഷേപിക്കുന്നിടം സുരക്ഷിതമാകണം. ഇതിനൊപ്പം ഉയർന്ന പലിശയും വേണം. നിക്ഷേപത്തിൽ നിന്ന് പണപ്പെരുപ്പത്തെ മറികടക്കുന്ന ആദായമാണ് നിക്ഷേപകൻ തേടുക. ഈ മൂന്ന് ഘടകങ്ങളും ഒന്നിക്കുന്ന 2 നിക്ഷേപങ്ങളാണ് ചുവടെ വിശദീകരിക്കുന്നത്. സ്ഥിര നിക്ഷേപത്തിന് ഒരുങ്ങുന്നവർക്ക് അനുയോജ്യമാണിവ.

ട്രഷറി നിക്ഷേപം

സംസ്ഥാനത്തെ ട്രഷറിയിൽ സ്ഥിര നിക്ഷേപം നടത്താൻ സാധിക്കും. ഇതിനായി പൊതു ജനങ്ങൾ ട്രഷറിയിൽ സേവിംഗ് ബാങ്ക് അക്കൗണ്ടും ആരംഭിക്കണം. സംയുക്ത അക്കൗണ്ട് ആരംഭിക്കാനുള്ള സൗകര്യവും ട്രഷറി നൽകുന്നുണ്ട്. നിക്ഷേപങ്ങൾക്ക് പണപ്പെരുപ്പത്തെ മറികടക്കുന്ന പലിശ നിരക്ക് ട്രഷറി നൽകും. ജില്ലാ ആസ്ഥാനത്തും താലൂക്ക് ആസ്ഥാനങ്ങളിലും ട്രഷറികളും സബ്ട്രഷറികളുമുണ്ട്. ഇവിടെ നിന്ന് അക്കൗണ്ട് ആരംഭിക്കാം. ആധാര്‍ കാർഡ്, പാന്‍ കാർഡ്, പാസ്പോർട്ട് സൈസ് ഫോട്ടോ എന്നിവയാണ് ഇതിനാവശ്യം.

ട്രഷറി പലിശ നിരക്ക്

കേരള സംസ്ഥാന ട്രഷറിയിലെ പലിശ നിരക്ക് നോക്കാം. 46 ദിവസത്തേക്ക് ട്രഷറിയിൽ നിക്ഷേപം ആരംഭിക്കാം. 46 ദിവസം മുതല്‍ 90 ദിവസം വരെയുള്ള നിക്ഷേപങ്ങൾക്ക് ട്രഷറിയിൽ നിന്ന് 5.4 ശതമാനം പലിശ ലഭിക്കും. 91 ദിവസം മുതല്‍ 1 വര്‍ഷം വരെ കാലാവധിയുള്ള നിക്ഷേപങ്ങൾക്ക് 5.9 ശതമാനമാണ് പലിശ. 1 വര്‍ഷം മുതല്‍ 2 വര്‍ഷം വരെയുള്ള നിക്ഷേപങ്ങള്‍ക്ക് 6.4 ശതമാനം പലിശയാണ് ട്രഷറിയിൽ നിന്ന് ലഭിക്കുക.

2 വര്‍ഷത്തിൽ കൂടുതല്‍ കാലാവധിയുള്ളതും 10 വർഷം വരെയുള്ളതുമായ സ്ഥിര നിക്ഷേപങ്ങള്‍ക്കാണ് ട്രഷറിയിൽ കൂടുതൽ പലിശ നിരക്ക്. 7.5 ശതമാനം പലിശയാണ് ഈ കാലാവധിയിൽ നൽകുന്നത്.

പലിശ കണക്കാക്കുന്നത്

പലിശ വരുമാനം മാസത്തിൽ സേവിം​ഗ്സ് അക്കൗണ്ടിലേക്ക് ക്രെഡിറ്റ് ചെയ്യപ്പെടും. ഇതിനാൽ ഉയർന്ന പലിശ ലഭിക്കുമ്പോഴും ​മൂലധന വർധന ആ​ഗ്രഹിക്കുന്നവർക്ക് ഈ നേട്ടം ലഭിക്കില്ല. മാസ വരുമാനം തേടി നിക്ഷേപിക്കുന്നവർക്ക് പറ്റിയ നിക്ഷേപമാണ് ട്രഷറി നിക്ഷേപങ്ങൾ. മാസത്തിൽ ഒന്നാം തീയതിയാണ് പലിശ സേവി​ഗം് അക്കൗണ്ടിലെത്തുക. തുക ചെക്ക് ഉപയോ​ഗിച്ച് പിൻവലിക്കുകയോ മറ്റ് ബാങ്ക് അകൗണ്ടുകളിലേക്ക് മാറ്റുകയോ ചെയ്യാം. ട്രഷറിയിൽ നിന്ന് മറ്റ് ബാങ്കുകളിലേക്ക് പണം ട്രാൻസ്ഫർ‍ ചെയ്യാനുള്ള സൗകര്യമുണ്ട്.

കേരള ഗ്രാമീണ്‍ ബാങ്ക് നിധി 222

കേരള ഗ്രാമീണ്‍ ബാങ്കിന്റെ കെജിബി നിധി 222 എന്ന നിക്ഷേപം ഉയര്‍ന്ന പലിശ നിരക്ക് നല്‍കുന്ന നിക്ഷേപമാണ്. 222 ദിവസമാണ് നിക്ഷേപ കാലാവധി. 7.25 ശതമാനം വാര്‍ഷിക പലിശ കേരള ഗ്രാമീണ്‍ ബാങ്ക് നല്‍കുന്നത്. 7.75 ശതമാനം പലിശ മുതിര്‍ന്ന പൗരന്മാര്‍ക്കും നല്‍കും. ബാങ്കിന്റെ ബ്രാഞ്ച് സന്ദര്‍ശിച്ച് നിക്ഷേപം ആരംഭിക്കാവുന്നതാണ്. സാധാരണ സ്ഥിക നിക്ഷേപങ്ങള്‍ക്ക് ബാധകമായ നിബന്ധനകള്‍ കെജിബി നിധി 222 നിക്ഷേപത്തിനും ബാധകമാണ്.

നികുതി

സാധാരണ നിക്ഷേപങ്ങളെ പോലെ പലിശ വരുമാനത്തിന് ആദായ നികുതിയുണ്ട്. പലിശ വരുമാനം 40,000 രൂപയിൽ കടന്നാൽ സ്രോതസിൽ നിന്നുള്ള നികുതി ഈടാക്കും. മുതിർന്ന പൗരന്മാർക്ക് 50,000 രൂപ കടന്നലാണ് സ്രോതസിൽ നിന്നുള്ള നികുതി പിടിക്കുക. വാർഷിക വരുമാനം ആദായ നികുതി പരിധി കടക്കാത്തവർ 15ജി, 15എച്ച് ഫോം സമർപ്പിച്ചാൽ നികുതിയിൽ നിന്ന് ഒഴിവാകാം.