കുറഞ്ഞ പലിശ നിരക്കിൽ കിസാൻ ക്രെഡിറ്റ് കാർഡ് ലഭിക്കും; ഓൺലൈനായി ആർക്കെല്ലാം അപേക്ഷിക്കാം?

ഇന്ത്യയിലെ കർഷകർക്കു വേണ്ടി സർക്കാർ വിവിധ പദ്ധതികൾ അവതരിപ്പിച്ചിട്ടുണ്ട്. കിസാൻ ക്രെഡിറ്റ് കാർഡ് (കെ.സി.സി) അത്തരത്തിലുള്ള ഒരു പദ്ധതിയാണ്. കർഷകരുടെ കാർഷിക ആവശ്യങ്ങൾ നിറവേറ്റുന്നതിനും കാർഷിക ഉൽപ്പന്നങ്ങൾ വാങ്ങുന്നതിനും വായ്പ നൽകുന്ന സ്കീമാണിത്. 1998ലാണ് കിസാൻ ക്രെഡിറ്റ് കാർഡ് പദ്ധതി അവതരിപ്പിച്ചത്. വളം, വിത്തുകൾ, കീടനാശിനികൾ തുടങ്ങിയ കാർഷിക ഉപകരണങ്ങൾ എളുപ്പത്തിൽ വാങ്ങുന്നതിനും ഉൽപാദന ആവശ്യങ്ങൾക്കായി പണം പിൻവലിക്കുന്നതിനും കർഷകർക്ക് കെ.സി.സി ഉപയോഗിക്കാം.

2004-ൽ, നിക്ഷേപ വായ്പയും മറ്റു കാര്യങ്ങളും ഉൾപ്പെടുത്തി ഈ പദ്ധതി വികസിപ്പിച്ചു. 2006-07-ൽ പലിശ സബ്‌വെൻഷൻ പദ്ധതി (ISS) ആരംഭിച്ചു, ഇതിലൂടെ 7% പലിശയ്ക്ക് കെ.സി.സി വായ്പകൾ വാഗ്ദാനം ചെയ്തു. നേരത്തെ 3 ലക്ഷം വരെയായിരുന്നു വായ്പ നൽകിയിരുന്നത്. എന്നാൽ 2025 കേന്ദ്ര ബജറ്റിലൂടെ കെ.സി.സി വായ്പാ പരിധി 5 ലക്ഷത്തിലേക്ക് ഉയർത്തി.

കിസാൻ ക്രെഡിറ്റ് കാർഡ് ആനുകൂല്യങ്ങൾ

കിസാൻ ക്രെഡിറ്റ് കാർഡ് പദ്ധതി പ്രകാരം അനുവദിക്കുന്ന വായ്പകൾ ഉപയോ​ഗിക്കുന്നത് എന്തിനെല്ലാം?

• സീസണൽ ഹോർട്ടികൾച്ചറൽ പച്ചക്കറി വിളകൾ ഉൾപ്പെടെയുള്ള വിളകൾ കൃഷി ചെയ്യുന്നതിനുള്ള ധനസഹായം ഉറപ്പാക്കാൻ.

• തോട്ടവിളകൾ, പഴങ്ങൾ, സുഗന്ധവ്യഞ്ജനങ്ങൾ, ഔഷധ സസ്യങ്ങൾ തുടങ്ങിയ ഇടത്തരം അല്ലെങ്കിൽ ദീർഘകാല വിളകളുടെ പ്രവർത്തന മൂലധന ആവശ്യങ്ങൾ നിറവേറ്റുന്നതിന്.

• വിളവെടുപ്പിനു ശേഷമുള്ള ചെലവുകൾ നിറവേറ്റുന്നതിനും ഇത്തരം വായ്പകൾ സഹായിക്കുന്നു.

• കർഷകരുടെ എല്ലാ ഉപഭോഗ ആവശ്യങ്ങളും നിറവേറ്റുന്നതിന്.

• കൃഷി, മത്സ്യബന്ധനം, പാൽ, കോഴി വളർത്തൽ, കൂൺ, സെറികൾച്ചർ, തേനീച്ച വളർത്തൽ തുടങ്ങിയ പരിപാലന പ്രവർത്തനങ്ങൾക്കുള്ള മൂലധന ആവശ്യകതകൾ നിറവേറ്റുന്നതിന്.

കിസാൻ ക്രെഡിറ്റ് കാർഡ് പലിശ നിരക്ക്

3 ലക്ഷം രൂപ വരെയുള്ള പലിശ നിരക്കുകൾ - പ്രതിവർഷം 7% വരെ പലിശ ഈടാക്കുന്നു. കൃത്യസമയത്ത് വായ്പ തിരിച്ചടയ്ക്കുന്ന കർഷകർക്ക് 3% പലിശ സബ്‌സിഡിയുടെ പ്രയോജനം ലഭിക്കും. അതായത് കർഷകർക്ക് 4% പലിശ നിരക്ക് ഉറപ്പാക്കാം.

കിസാൻ ക്രെഡിറ്റ് കാർഡിന് അർഹതയുള്ളവർ

• വായ്പ എടുക്കുന്നയാൾ കർഷകനായിരിക്കണം

• പാട്ട കർഷകർ, ജോയിന്റ് കൃഷിക്കാർ എന്നിവർക്കും അപേക്ഷിക്കാം

• കർഷകരുടെ സ്വയം സഹായ സംഘങ്ങൾ (SHGs), സംയുക്ത ബാധ്യതാ ഗ്രൂപ്പുകൾ (JLGs) എന്നിവർക്കും അപേക്ഷിക്കാം.

കിസാൻ ക്രെഡിറ്റ് കാർഡ് സ്കീമിന് ആവശ്യമായ രേഖകൾ

1. ആദ്യം രണ്ട് പാസ്‌പോർട്ട് സൈസ് ഫോട്ടോകൾ

2. ആധാർ കാർഡ്, ഡ്രൈവിംഗ് ലൈസൻസ്, വോട്ടർ ഐഡി, പാസ്‌പോർട്ട് പോലുള്ള തിരിച്ചറിയൽ രേഖകൾ

3. ആധാർ കാർഡ്, ഡ്രൈവിംഗ് ലൈസൻസ് പോലുള്ള മേൽവിലാസം തെളിയിക്കുന്ന രേഖകൾ

4. റവന്യൂ അധികാരികൾ സാക്ഷ്യപ്പെടുത്തിയ ഭൂവുടമസ്ഥതയുടെ തെളിവ്.

5. 3 ലക്ഷം രൂപയിൽ കൂടുതലുള്ള വായ്പാ പരിധിക്കുള്ള സുരക്ഷാ രേഖകൾ.

6. ആവശ്യമായ മറ്റേതെങ്കിലും രേഖ

കിസാൻ ക്രെഡിറ്റ് കാർഡിന് ഓൺലൈനായി അപേക്ഷിക്കാം

ബാങ്കിനെ ആശ്രയിച്ച് അപേക്ഷാ പ്രക്രിയ വ്യത്യാസപ്പെടുന്നു. ഓൺലൈനായി എങ്ങനെ അപേക്ഷിക്കാം?

• ആദ്യം അപേക്ഷിക്കാൻ ആഗ്രഹിക്കുന്ന ബാങ്കിന്റെ വെബ്‌സൈറ്റോ മൊബൈൽ ബാങ്കിംഗ് ആപ്പോ സന്ദർശിക്കുക.

• 'കാർഷിക വായ്പകൾ' വിഭാഗം തിരഞ്ഞെടുത്താൽ 'കിസാൻ ക്രെഡിറ്റ് കാർഡ്' എന്ന ഓപ്ഷൻ തിരഞ്ഞെടുക്കുക.

• 'അപേക്ഷിക്കുക' എന്ന ഓപ്ഷനിൽ ക്ലിക്ക് ചെയ്യുക അല്ലെങ്കിൽ 'അപേക്ഷാ ഫോം ഡൗൺലോഡ് ചെയ്യുക'.

• ആവശ്യമായ വിവരങ്ങൾ സഹിതം ഡൗൺലോഡ് ചെയ്ത അപേക്ഷാ ഫോം പൂരിപ്പിച്ച് 'സബ്മിറ്റ്' ബട്ടൺ ക്ലിക്ക് ചെയ്യുക അല്ലെങ്കിൽ നേരിട്ട് ബാങ്കിൽ സമർപ്പിക്കുക.

• നിങ്ങൾക്ക് ഒരു ആപ്ലിക്കേഷൻ റഫറൻസ് നമ്പർ ലഭിക്കും.

ഇത്രയും പൂർത്തിയായാൽ ബാക്കി പ്രക്രിയയുമായി മുന്നോട്ട് പോകുന്നതിന് 3-4 പ്രവൃത്തി ദിവസങ്ങൾക്കുള്ളിൽ നിങ്ങളെ ബാങ്കിൽ നിന്നും ബന്ധപ്പെടും. യോ​ഗ്യതകൾ ശരിയാണെന്ന് ബോധ്യപ്പെട്ടാൽ നിങ്ങൾക്ക് വായ്പ അനുവദിക്കും.

കിസാൻ ക്രെഡിറ്റ് കാർഡ് ഇടപാടുകൾ എങ്ങനെയെല്ലാം പൂർത്തിയാക്കാം...

1. എ.ടി.എമ്മുകൾ അല്ലെങ്കിൽ മൈക്രോ എ.ടി.എം വഴിയുള്ള പിൻവലിക്കൽ

2. സ്മാർട്ട് കാർഡുകൾ ഉപയോഗിച്ച് ബിസിനസ് കറസ്പോണ്ടന്റുകൾ (ബി.സി.) വഴി പണം പിൻവലിക്കൽ

3. IMPS ശേഷിയുള്ള മൊബൈൽ ബാങ്കിംഗ് അല്ലെങ്കിൽ IVR വഴി പണം പിൻവലിക്കാം.