കുറഞ്ഞ പലിശയ്ക്ക് വായ്പ വേണോ? ഇക്കാര്യങ്ങളുണ്ടെങ്കിൽ എളുപ്പത്തിൽ നേടാം

പെട്ടെന്നുള്ള സാമ്പത്തിക അത്യാവശ്യങ്ങൾ നിറവേറ്റുന്നതിന് വായ്പകൾ എടുക്കുക എന്നുള്ളതാണ് എല്ലാവരും സാധാരണയായി ചെയ്യുന്ന രീതി. വ്യത്യസ്ത തരത്തിലുള്ള വായ്പ രീതികൾ വിപണിയിൽ ലഭ്യമാണ്. ഏറ്റവും അനുയോജ്യമായവ കണ്ടെത്തിയില്ല എങ്കിൽ വലിയ സാമ്പത്തിക ബാധ്യതകൾക്ക് കാരണമാകും. മ്യൂച്വൽ ഫണ്ടുകളിൽ നിക്ഷേപമുള്ളവർക്കും സ്ഥിര നിക്ഷേപമുള്ളവർക്കും വായ്പ ലഭിക്കാൻ എളുപ്പ വഴികളുണ്ട്. ഈ രണ്ടു വഴികളിലൂടെ വായ്പ സ്വീകരിക്കുമ്പോഴും വ്യക്തിഗത വായ്പയെക്കാൾ കുറഞ്ഞ പലിശയ്ക്ക് ലഭിക്കും എന്നുള്ളത് ഏറ്റവും വലിയ ഗുണമാണ്.

മ്യൂച്വൽ ഫണ്ടുകളിൻമേലുള്ള വായ്പ

ഏറ്റവും സുരക്ഷിതമായ വായ്പകളിൽ ഒന്നാണ് മ്യൂച്വൽ ഫണ്ടുകളിൻമേലുള്ള വായ്പ. അവിടെ വായ്പയെടുക്കുന്നവർ അവരുടെ മ്യൂച്വൽ ഫണ്ട് യൂണിറ്റുകൾ പണയം വെച്ച് ഫണ്ട് ലഭ്യമാക്കുന്നു. പണയം വെച്ച യൂണിറ്റുകളുടെ മൂല്യം അനുസരിച്ചാണ് ലോൺ തുക നിർണ്ണയിക്കുന്നത്, വായ്പ-മൂല്യ അനുപാതങ്ങൾ സാധാരണയായി 50% മുതൽ 75% വരെയാണ്. മ്യൂച്വൽ ഫണ്ടുകളിൻമേൽ വായ്പ എടുക്കുന്നത് ആവശ്യമായ തുക ലഭിക്കാൻ സഹായിക്കുന്നു. കൂടാതെ മ്യൂച്വൽ ഫണ്ട് നിക്ഷേപം തുടരാനും സാധിക്കുന്നു. ഈ നിക്ഷേപം പിന്നീട് റെഡീം ചെയ്തെടുക്കാം. ഈ തുക വീണ്ടും നിക്ഷേപിക്കുകയോ, ഭാവിയിലെ ആവശ്യങ്ങൾക്കായി മാറ്റി വെക്കുകയോ ചെയ്യാം.

പ്രധാന നേട്ടങ്ങൾ

1. നിക്ഷേപ പദ്ധതികളെ തടസ്സപ്പെടുത്താതെ ഫണ്ട് ലഭ്യമാക്കുന്നതിനുള്ള സൗകര്യം വാഗ്ദാനം ചെയ്യുന്നു.

2. വ്യക്തിഗത വായ്പകളെ അപേക്ഷിച്ച് താരതമ്യേന കുറഞ്ഞ പലിശനിരക്ക്.

3. വായ്പയെടുക്കുന്നയാൾ തിരിച്ചടയ്ക്കുന്നതിൽ പരാജയപ്പെട്ടാൽ മാത്രമേ മ്യൂച്വൽ ഫണ്ട് യൂണിറ്റുകളുടെ ലിക്വിഡേഷൻ.

പ്രധാന പോരായ്മകൾ

1. പണയം വെച്ച യൂണിറ്റുകളുടെ മൂല്യത്തിൽ ഏറ്റക്കുറച്ചിലുകൾ ഉണ്ടായേക്കാം.

2. വായ്പ തിരിച്ചടയ്ക്കാൻ യൂണിറ്റുകൾ വിറ്റാൽ, വായ്പക്കാർക്ക് മൂലധന നേട്ട നികുതി നൽകേണ്ടി വരും

വായ്പയ്ക്ക് എങ്ങനെ അപേക്ഷിക്കാം

1. ധനകാര്യ സ്ഥാപനത്തെ സമീപിക്കുക: ബാങ്കുകൾ, നോൺ-ബാങ്കിംഗ് ഫിനാൻഷ്യൽ കമ്പനികൾ ഓൺലൈൻ ലെൻഡർമാർ എന്നിവർ വായ്പ വാഗ്ദാനം ചെയ്യുന്നുണ്ട്.

2. മ്യൂച്വൽ ഫണ്ട് സ്കീം തിരഞ്ഞെടുക്കുക: കടം കൊടുക്കുന്നയാൾ നൽകുന്ന അംഗീകൃത ലിസ്റ്റിൽ നിന്ന് ഒരു സ്കീം തിരഞ്ഞെടുക്കുക.

3. മ്യൂച്വൽ ഫണ്ട് യൂണിറ്റുകൾ പണയം വെക്കുക: തിരഞ്ഞെടുത്ത യൂണിറ്റുകൾ ഈടായി പണയം വെക്കാൻ ആവശ്യമായ ഡോക്യുമെന്റേഷൻ സമർപ്പിക്കുക.

4. വായ്പ തുക സ്വീകരിക്കുക: അംഗീകാരത്തിന് ശേഷം, അക്കൗണ്ടിലേക്ക് ലോൺ തുക വിതരണം ചെയ്യപ്പെടും.

ഫിക്സഡ് ഡിപ്പോസിറ്റ് വായ്പ

കടം വാങ്ങുന്നവർ അവരുടെ സ്ഥിര നിക്ഷേപങ്ങൾ ഈടായി പണയം വയ്ക്കുന്ന സുരക്ഷിത വായ്പയാണ് ഫിക്സഡ് ഡിപ്പോസിറ്റ് വായ്പ. ലോൺ തുക സ്ഥിര നിക്ഷേപ മൂല്യത്തിന്റെ ഒരു നിശ്ചിത ശതമാനമായി പരിമിതപ്പെടുത്തിയിരിക്കുന്നു. സാധാരണയായി 75% മുതൽ 90% വരെ വായ്പ ലഭിക്കും

പ്രധാന നേട്ടങ്ങൾ

1. സ്ഥിരമായ പലിശ നിരക്ക് പ്രവചിക്കാവുന്ന തിരിച്ചടവ് ചെലവുകൾ ഉറപ്പാക്കുന്നു

2. കൊളാറ്ററൽ മൂല്യത്തിൽ ഏറ്റക്കുറച്ചിലുകൾക്ക് സാധ്യതയില്ല

3. സ്ഥിര നിക്ഷേപത്തിൽ നിന്ന് പലിശ ലഭിക്കുന്നത് തുടരും

പ്രധാന പോരായ്മകൾ

1. എഫ്ഡി അകാലത്തിൽ പിൻവലിക്കുന്നത് പെനാൽറ്റി ചാർജുകൾക്ക് കാരണമായേക്കാം

2. മ്യൂച്വൽ ഫണ്ടുകളിൻമേലുള്ള വായ്പയെ അപേക്ഷിച്ച് പലിശ നിരക്ക് സാധാരണയായി കൂടുതലാണ്

വായ്പയ്ക്ക് എങ്ങനെ അപേക്ഷിക്കാം

1. സ്ഥിര നിക്ഷേപമുള്ള ബാങ്കിനെ സമീപിക്കുക

2. സ്ഥിര നിക്ഷേത്തിന്റെ വിശദാംശങ്ങൾ നൽകുക

3. ലോൺ അപേക്ഷ പൂരിപ്പിക്കുക: ആവശ്യമായ അപേക്ഷാ ഫോം പൂരിപ്പിച്ച് അനുബന്ധ രേഖകൾ സമർപ്പിക്കുക.

4. ലോൺ തുക സ്വീകരിക്കുക: അംഗീകാരത്തിന് ശേഷം, ലോൺ തുക ലിങ്ക് ചെയ്ത അക്കൗണ്ടിലേക്ക് ക്രെഡിറ്റ് ചെയ്യപ്പെടും.

ഒരു കാര്യം പ്രത്യേകം ശ്രദ്ധിക്കണം. ഏതു വായ്പ സ്വീകരിച്ചാലും അതിന്റെ എല്ലാ വ്യവസ്ഥകളും കൃത്യമായി വായിച്ച് മനസ്സിലാക്കുക. ഭാവിയിൽ വരാൻ സാധ്യതയുള്ള പ്രശ്നങ്ങളെ കൃത്യമായി മുൻകൂട്ടി കാണുന്നതിന് ഇത് സഹായകരമാകും.