വിരമിക്കൽ കാലത്തേക്ക് ഉപയോ​ഗിക്കാൻ 15 ലക്ഷം; ഏത് റിട്ടയർമെന്റ് പ്ലാനാണ് നല്ലത്; റിട്ടേൺ എങ്ങനെ

മുതിർന്ന പൗരന്മാർക്ക് വിരമിക്കൽ കാലത്തേക്കുള്ള ഏറ്റവും സുരക്ഷിതമായ നിക്ഷേപ മാർഗങ്ങളിലൊന്നാണ് സീനിയർ സിറ്റിസൺ സേവിം​ഗ്സ് സ്കീം. അതേസമയം, മ്യൂച്വൽ ഫണ്ട് ഹൗസുകൾ നൽകുന്ന റിട്ടയർമെന്റ് ഫണ്ടുകളും ഉപയോ​ഗപ്പെടുത്താവുന്നവയാണ്.

അൽപം അപകട സാധ്യത നിലനിൽക്കുന്നതിനാൽ പലരും ഡെബ്റ്റ് നിക്ഷേപമായ സീനിയർ സിറ്റിസൺ സേവിം​ഗ്സ് സ്കീമിനെയാണ് പരി​ഗണിക്കുന്നത്. കഴിഞ്ഞ അഞ്ച് വർഷം കാലത്തെ റിട്ടേൺ പരിശോധിച്ചാൽ സീനിയർ സിറ്റിസൺ സേവിം​ഗ്സ് സ്കീമിനേക്കാൾ റിട്ടേൺ റിട്ടയർമെന്റ് മ്യൂച്വൽ ഫണ്ട് സ്കീമുകൾ നൽകിയിട്ടുണ്ട്. രണ്ട് നിക്ഷേപ മാർ​ഗങ്ങളും തമ്മിലുള്ള റിട്ടേൺ നോക്കാം.

സീനിയർ സിറ്റിസൺ സേവിം​ഗ്സ് സ്കീം

അഞ്ച് വർഷം മുൻപ് സീനിയർ സിറ്റിസൺ സേവിം​ഗ്സ് സ്കീമിൽ നിക്ഷേപിക്കാൻ സാധിക്കുന്ന പരമാവധി നിക്ഷേപ പരിധി 15 ലക്ഷം രൂപയായിരുന്നു. 2023-34 സാമ്പത്തിക വർഷത്തിലാണ് നിക്ഷേപ പരിധി 30 ലക്ഷമാക്കി ഉയർത്തിയത്. കൂടാതെ, സീനിയർ സിറ്റിസൺ സേവിം​ഗ്സ് സ്കീമിന് അഞ്ച് വർഷം മുൻപ് 2018 ജനുവരി മുതൽ സെപ്റ്റംബർ വരെ 8.3 ശതമാനവും ഒക്ടോബർ മുതൽ ഡിസംബർ വരെ 8.7 ശതമാനവുമായിരുന്നു പലിശ നിരക്ക്.

സീനിയർ സിറ്റിസൺ സേവിം​ഗ്സ് സ്കീം കാൽക്കുലേറ്റർ പ്രകാരം, 2018 ജനുവരി മുതൽ സെപ്തംബർ വരെയുള്ള കാലയളവിൽ 8.3 ശതമാനം പലിശ നിരക്കിൽ 15 ലക്ഷം രൂപ നിക്ഷേപിച്ചൊരാൾക്ക് 5 വർഷം കൊണ്ട് പലിശയായി ലഭിച്ചത് 6,22,500 രൂപയാണ്. 2018 ഒക്‌ടോബർ മുതൽ ഡിസംബർ വരെ 8.7 ശതമാനം പലിശയിലാണ് 5 വർഷത്തേക്ക് 15 ലക്ഷം രൂപ നിക്ഷേപിച്ചതെങ്കിൽ മൊത്തം 6,52,500 രൂപ പലിശയായി ലഭിക്കുമായിരുന്നു.

റിട്ടയർമെന്റ് മ്യൂച്വൽ ഫണ്ടുകൾ

കഴിഞ്ഞ അഞ്ച് വർഷത്തിനിടയിൽ റിട്ടയർമെന്റ് മ്യൂച്വൽ ഫണ്ടുകളിൽ നിരവധി ഡയറക്ട് പ്ലാനുകൾ 10 ശതമാനം വാർഷിക റിട്ടേൺ നൽകിയിട്ടുണ്ട്. എച്ച്‌ഡിഎഫ്‌സി റിട്ടയർമെന്റ് സേവിംഗ്‌സ് ഫണ്ട് ഇക്വിറ്റി പ്ലാനിന്റെ ഡയറക്ട് പ്ലാനിന് കീഴിൽ 18.52 ശതമാനം വാർഷിക വരുമാനമാണ് ലഭിച്ചത്. റെ​ഗുലർ പ്ലാൻ 17.03 ശതമാനം റിട്ടേൺ നൽകി.

ഡയറക്ട് പ്ലാനിൽ 15 ലക്ഷം രൂപയുടെ ഒറ്റത്തവണ നിക്ഷേപം 5 വർഷത്തിനുള്ളിൽ ഏകദേശം 20 ലക്ഷം രൂപ പലിശ വരുമാനം നൽകുമ്പോൾ സാധാരണ പ്ലാനിൽ ഏകദേശം 17.9 ലക്ഷം രൂപ ലഭിക്കുമായിരുന്നു.

എച്ച്ഡിഎഫ്സിയുടെ തന്നെ, എച്ച്‌ഡിഎഫ്‌സി റിട്ടയർമെന്റ് സേവിംഗ്‌സ് ഫണ്ട് - ഹൈബ്രിഡ് ഇക്വിറ്റി പ്ലാൻ ഡയറക്‌ട് പ്ലാനിന് കീഴിൽ 14.43 ശതമാനം വാർഷിക വരുമാനം നൽകി. റെ​ഗുലർ പ്ലാനിൽ നിക്ഷേപിച്ചവർക്ക് 13 ശതമാനം റിട്ടേണും ലഭിച്ചു. ഡയറക്ട് പ്ലാനിൽ 15 ലക്ഷം രൂപയുടെ ഒറ്റത്തവണ നിക്ഷേപം 5 വർഷത്തിനുള്ളിൽ ഏകദേശം 14.3 ലക്ഷം രൂപ പലിശ വരുമാനം നൽകി. റെ​ഗുലർ പ്ലാനിലായിരുന്നു നിക്ഷേപമെങ്കിൽ 12.6 ലക്ഷം രൂപയായിരുന്നു നേട്ടം.

ടാറ്റ റിട്ടയർമെന്റ് സേവിംഗ്സ് പ്രോഗ്രസീവ് ഫണ്ടാണ് അടുത്തത്. ഡയറക്ട് പ്ലാനിന് കീഴിൽ 11.31 ശതമാനം വാർഷിക റിട്ടേണും റെഗുലർ പ്ലാനിന് കീഴിൽ 9.57 ശതമാനം റിട്ടേണും ലഭിച്ചു. ഡയറക്ട് പ്ലാനിൽ 15 ലക്ഷം രൂപയുടെ ഒറ്റത്തവണ നിക്ഷേപം 5 വർഷത്തിനുള്ളിൽ ഏകദേശം 10.6 ലക്ഷം രൂപയുടെ റിട്ടേൺ നൽകി. റെ​ഗുലർ പ്ലാനിൽ 8.6 ലക്ഷം രൂപയായിരുന്നു നേട്ടം.

അറിയിപ്പ്

മുകളിൽ കൊടുത്തിരിക്കുന്ന ലേഖനം പഠനാവശ്യത്തിന് മാത്രമായി നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങൾ എടുക്കും മുൻപ് സാമ്പത്തിക വിദഗ്ധന്റെ നിർദേശം തേടാം. മ്യൂച്വൽ ഫണ്ട് നിക്ഷേപം നഷ്ട സാധ്യതകൾക്ക് വിധേയമാണ്. സ്വന്തം റിസ്‌കിൽ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തിൽ സംഭവിക്കുന്ന ലാഭനഷ്ടങ്ങൾക്ക് ഗ്രേനിയം ഇൻഫർമേഷൻ ടെക്നോളജീസും ലേഖകനും ഉത്തരവാദികളല്ല.