അവസാന അവസരം; ഇപ്പോൾ ചിട്ടി ചേർന്നാൽ 1,000 പവൻ വരെ നേടാം; ഡയമണ്ട് ചിട്ടി സ്കീമിൽ ചിട്ടി ചേരാം

കെഎസ്എഫ്ഇ ചിട്ടി ചേർന്ന് ചിട്ടി വിളിച്ച് തുല്യമായ ജാമ്യം നൽകിയാൽ പണം ലഭിക്കും. വലിയ തുകയുടെ സാമ്പത്തിക ആവശ്യങ്ങൾ വരാനുള്ളവർക്ക് അനുയോജ്യമായൊരു സാമ്പത്തിക ഉപകരമാണ് കെഎസ്എഫ്ഇ ചിട്ടികൾ. എന്നാൽ ചിട്ടിയിൽ നിന്ന് സ്വർണം ലഭിക്കുന്നത് എങ്ങനെ.

കെഎസ്എഫ്ഇ ചിട്ടി വരിക്കാർക്കായി ആരംഭിച്ച ഡയമണ്ട് ചിട്ടി സ്കീം പ്രകാരമാണ് ഭാ​ഗ്യശാലികളായ ചിട്ടി വരിക്കാർക്ക് സ്വർണം സമ്മാനം ലഭിക്കുന്നത്. നിശ്ചിത കാലയളവിൽ ചിട്ടി ചേരുന്നവർക്കാണ് ഈ സ്കീമിന്റെ ​ഗുണം ലഭിക്കുക. പദ്ധതിയുടെ കാലാവധി സെപ്റ്റംബർ 30 ന് അവസാനിക്കും.

കെഎസ്എഫ്ഇ ഡയമണ്ട് ചിട്ടി

കെഎസ്എഫ്ഇ ഉപഭോക്താക്കളുമായി ലാഭം പങ്കിടുന്നതിനാണ് സ്കീമുകൾ ആരംഭിക്കുന്നത്. ഇത്തരത്തിൽ പുതുതായി ആരംഭിച്ച സ്കീമാണ് കെഎസ്എഫ്ഇ ഡയമണ്ട് ചിട്ടി. ഏപ്രില്‍ 17 മുതല്‍ സെപ്റ്റംബര്‍ 30 വരെ ചിട്ടിയിൽ ചേരുന്ന അം​ഗങ്ങൾക്ക് സ്വർണവും ഡയമണ്ടും അടക്കമുള്ള സമ്മാനങ്ങളാണ് ലഭിക്കുക. ഇക്കാലയളവിൽ ആരംഭിക്കുന്ന ചിട്ടികളിൽ ചേരുന്നവർക്ക് ഡയമണ്ട് ചിട്ടിയുടെ ആനുകൂല്യങ്ങൾ ലഭിക്കും. ഇതോടൊപ്പം ചിട്ടി വായ്പ സൗകര്യവും നേടാം.

സമ്മാനങ്ങൾ

ബംബർ സമ്മാനമായ 25 ലക്ഷം രൂപയുടെ ഡയമണ്ട് ആഭരണങ്ങളും ആകെ 1,000 പവൻ സ്വർണ സമ്മാനങ്ങളുമാണ് കെഎസ്എഫ്ഇ ഡയമണ്ട് ചിട്ടിയിലൂടെ വരിക്കാർക്ക് നൽകുന്നത്. 25 ലക്ഷം രൂപ വില വരുന്ന ഡയമണ്ട് ആഭരണങ്ങളാണ് ഒന്നാം സമ്മാനം. നറുക്കെടുപ്പിലൂടെ ഒരാൾക്ക് സമ്മാനം ലഭിക്കും. ആഭരണങ്ങൾ ആവശ്യമില്ലാത്തവർക്ക് 25 ലക്ഷം രൂപയും സമ്മാനമായി സ്വീകരിക്കാം. ഇതോടൊപ്പം മേഖലാ തല സമ്മാനങ്ങളും ബ്രാഞ്ച് തല സമ്മാനങ്ങളും ലഭിക്കും.

10 പവൻ 17 പേർക്ക്

മേഖലാ തലത്തിൽ 10 പവനാണ് സമ്മാനമായി നൽകുന്നത്. 10 പവൻ വീതം 17 പേർക്കാണ് സമ്മാനം ലഭിക്കുക. 16 മേഖലകളിലും ഒരു ഡിജിറ്റൽ ബിസിനസ് സെന്ററിലുമായാണ് 17 പേർക്ക് സമ്മാനം ലഭിക്കുക. പണമായി സമ്മാനം വേണ്ടവർക്ക് പരമാവധി 4.50 ലക്ഷം രൂപ ലഭിക്കും. ശാഖ തലത്തിലെ സമ്മാനങ്ങളും സ്വർണത്തിലാണ്. 3,744 പേര്‍ക്ക് സമ്മാനം ലഭിക്കും.

ശാഖാതലത്തില്‍ ഓരോ ശാഖയുടെയും വാര്‍ഷിക വരുമാനം കണക്കാക്കി വ്യത്യസ്ത അളവിലാണ് സമ്മാനം നൽകുന്നത്. 1.50 കോടിക്ക് മുകളില്‍ വാർഷിക ബിസിനസ് നടത്തുന്ന ശാഖകളിൽ നിന്ന് 8 പേര്‍ക്ക് 10,000 രൂപ വില വരുന്ന സ്വര്‍ണ നാണയം ലഭിക്കും.

75 ലക്ഷത്തിനും 1.50 കോടി രൂപയ്ക്കും ഉള്ളില്‍ വാർഷിക ബിസിനസ് നടത്തുന്ന ശാഖകളിൽ നിന്ന് 5 പേര്‍ക്ക് 10,000 രൂപയുടെ സ്വര്‍ണ നാണയം സമ്മാനമായയി ലഭിക്കും. 75 ലക്ഷത്തിന് താഴെ ബിസിനസുള്ള ശാഖകയില്‍ നിന്ന് നറുക്കെടുക്കുന്ന 3 പേര്‍ക്കാണ് 10,000 രൂപയുടെ സ്വർണം ലഭിക്കുക. പണമായി പരമാവധി 10,000 രൂപയും ലഭിക്കും.

ചിട്ടിയിലും ആനുകൂല്യം

നറുക്കെടുപ്പിലൂടെ ഭാ​ഗ്യമുള്ളവർക്കാണ് സമ്മാനം ലഭിക്കുക. കെഎസ്എഫ്ഇ ഡയമണ്ട് ചിട്ടിയുടെ ഭാ​ഗമായി ചിട്ടിയുടെ ആകെ അടവിന്റെ 5 ശതമാനം അടയ്ക്കുന്നവർക്ക് 50 ശതമാനം തുക വായ്പ ലഭിക്കും. 40 മാസ കാലയളവുള്ള 25,000 രൂപ മാസ അടവുള്ള 10 ലക്ഷം രൂപയുടെ ചിട്ടി ചേർന്നൊരാൾക്ക് 2 മാസത്തെ അടവ് കഴിഞ്ഞാല്‍ 5 ലക്ഷം രൂപ വരെ വായ്പ എടുക്കാൻ സാധിക്കും. ഇത് ഡയമണ്ട് ചിട്ടി സ്കീം വഴി ചേർന്ന എല്ലാവർക്കും ലഭിക്കും.

വായ്പയ്ക്ക് പലിശയും ജാമ്യവും നൽകണമെന്ന കാര്യം ശ്രദ്ധിക്കണം. 12.50 ശതമാനമാണ് ചിട്ടി വായ്പയ്ക്ക് ഈടാക്കുന്ന പലിശ നിരക്ക്. ഏതൊക്കെ ചിട്ടിക്ക് ആനുകൂല്യം 2023 ഏപ്രിൽ 17 നും സെപ്റ്റംബർ 30നു ഇടയിൽ കെഎസ്എഫ്ഇ ശാഖകളിൽ ആരംഭിക്കുന്ന ചിട്ടികളിൽ ചേരുന്നവർക്കാണ് ഡയമണ്ട് ചിട്ടിയുടെ ആനുകൂല്യം ലഭിക്കുന്നത്. ഇക്കാലയളവിൽ മുടക്കചിട്ടി ഏറ്റെടുക്കുന്നവര്‍ക്കും ആനുകൂല്യങ്ങള്‍ ലഭിക്കും.