സുവർണാവസരം; ഇപ്പോൾ ചിട്ടി ചേർന്നാൽ 1000 പവൻ വരെ നേടാം; കെഎഫ്എഫ്ഇയുടെ പുതിയ സ്കീം ഇങ്ങനെ

ഭാവിയിൽ വരാനിരിക്കുന്ന സാമ്പത്തിക ചെലവുകളെ ആസൂത്രണം ചെയ്യുന്നവർക്ക് ഏറ്റവും അനുയോജ്യമായ മാർ​ഗമാണ് കെഎഫ്എഫ്ഇ ചിട്ടികൾ. കൃത്യമായി ചിട്ടി അടവ് നടത്തുന്നവർക്ക് ആവശ്യ സമയത്ത് ചിട്ടി വിളിച്ചെടുക്കാനും വായ്പ ബാധ്യതകളില്ലാതെ പണം സ്വന്തമാക്കാനും കെഎസ്എഫ്ഇ ചിട്ടിയിലൂടെ സാധിക്കുന്നുണ്ട്.

ഇതോടൊപ്പം വിവിധ സ്കീമുകളിലൂടെ കെഎസ്എഫ്ഇ ഉപഭോക്താക്കൾക്ക് വ്യത്യസ്ത ആനുകൂല്യങ്ങൾ നൽകാറുണ്ട്. ഇത്തരത്തിൽ പുതുതായി കെഎസ്എഫ്ഇ ആരംഭിച്ച സ്കീമാണ് ഡയമണ്ട് ചിട്ടി. വിശദാംശങ്ങൾ നോക്കാം.

കെഎസ്എഫ്ഇ ഡയമണ്ട് ചിട്ടി

കെഎസ്എഫ്ഇയുടെ ലാഭം ഉപഭോക്താക്കളുമായി കൈമാറുന്നതിനായാണ് കെഎസ്എഫ്ഇ സ്കീമുകൾ ആരംഭിക്കുന്നത്. ഇത്തരത്തിൽ പുതുതായി ആരംഭിച്ച സ്കീമാണ് കെഎസ്എഫ്ഇ ഡയമണ്ട് ചിട്ടി. ചിട്ടിയിൽ ചേരുന്ന അം​ഗങ്ങൾക്ക് സ്വർണവും ഡയമണ്ടും അടക്കമുള്ള സമ്മാനങ്ങളാണ് നൽകുന്നത്. ഏപ്രില്‍ 17 മുതല്‍ സെപ്റ്റംബര്‍ 30 വരെയാണ് സ്കീമിന്റെ കാലാവധി. ഇക്കാലയളവിൽ ആരംഭിക്കുന്ന ചിട്ടികളിൽ ചേരുന്നവർക്ക് ഡയമണ്ട് ചിട്ടിയുടെ ആനുകൂല്യങ്ങൾ ലഭിക്കും.

കെഎസ്എഫ്ഇ ഡയമണ്ട് ചിട്ടി- സമ്മാനങ്ങൾ

ബംബർ സമ്മാനമായി 25 ലക്ഷം രൂപയുടെ ഡയമണ്ട് ആഭരണങ്ങൾ, 1000 പവൻ സ്വർണം എന്നിവയാണ് കെഎസ്എഫ്ഇ ഡയമണ്ട് ചിട്ടിയിലെ സമ്മാനങ്ങളിലെ പ്രധാന ആകർഷണങ്ങൾ. ഇതോടൊപ്പം മേഖലാ തല സമ്മാനങ്ങളും ബ്രാഞ്ച് തല സമ്മാനങ്ങളും ലഭിക്കും. 25 ലക്ഷം രൂപ വില വരുന്ന ഡയമണ്ട് ആഭരണങ്ങളാണ് ഒന്നാം സമ്മാനം. ആഭരണങ്ങൾ ആവശ്യമില്ലാത്തവർക്ക് 25 ലക്ഷം രൂപയും സമ്മാനമായി സ്വീകരിക്കാം. 

മേഖലാ തല സമ്മാനമായി 10 പവന്‍ നൽകും. 10 പവൻ സ്വർണം വീതം 17 പേർക്കാണ് സമ്മാനം ലഭിക്കുക. 16 മേഖലകളിലും ഒരു ഡിജിറ്റൽ ബിസിനസ് സെന്ററിലുമായാണ് 17 പേർക്ക് സമ്മാനം ലഭിക്കുക. പണമായി സമ്മാനം വേണ്ടവർക്ക് പരമാവധി 4.50 ലക്ഷം രൂപ ലഭിക്കും. 

ശാഖ തല സമ്മാനങ്ങൾ 3,744 പേര്‍ക്ക് സ്മാനം ലഭിക്കും. ശാഖാതലത്തില്‍ ഓരോ ശാഖയുടെയും വാര്‍ഷിക വരുമാനം കണക്കാക്കി വ്യത്യസ്ത അളവിലാണ് സമ്മാനം നൽകുന്നത്. 1.50 കോടിക്ക് മുകളില്‍ വാർഷിക ബിസിനസ് നടത്തുന്ന ശാഖകളിൽ നിന്ന് 8 പേര്‍ക്ക് 10,000 രൂപ വില വരുന്ന സ്വര്‍ണ നാണയം ലഭിക്കും.

75 ലക്ഷത്തിനും 1.50 കോടി രൂപയ്ക്കും ഉള്ളില്‍ വാർഷിക ബിസിനസ് നടത്തുന്ന ശാഖകളിൽ നിന്ന് 5 പേര്‍ക്ക് 10,000 രൂപയുടെ സ്വര്‍ണ നാണയം സമ്മാനമായയി ലഭിക്കും. 75 ലക്ഷത്തിന് താഴെ ബിസിനസുള്ള ശാഖകയില്‍ നിന്ന് നറുക്കെടുക്കുന്ന 3 പേര്‍ക്കാണ് 10,000 രൂപയുടെ സ്വർണം ലഭിക്കുക. പണമായി പരമാവധി 10,000 രൂപയും ലഭിക്കും.

ചിട്ടി വായ്പ

കെഎസ്എഫ്ഇ ഡയമണ്ട് ചിട്ടിയുടെ ഭാ​ഗമായി ചിട്ടിയുടെ ആകെ അടവിന്റെ 5 ശതമാനം അടയ്ക്കുന്നവർക്ക് 50 ശതമാനം തുക വായ്പ ലഭിക്കും. 40 മാസ കാലയളവുള്ള 25,000 രൂപ മാസ അടവുള്ള 10 ലക്ഷം രൂപയുടെ ചിട്ടി ചേർന്നൊരാൾക്ക് 2 മാസത്തെ അടവ് കഴിഞ്ഞാല്‍ 5 ലക്ഷം രൂപ വരെ വായ്പ എടുക്കാൻ സാധിക്കും. വായ്പയ്ക്ക് പലിശയും ജാമ്യവും നൽകണമെന്ന കാര്യം ശ്രദ്ധിക്കണം. 12.50 ശതമാനമാണ് ചിട്ടി വായ്പയ്ക്ക് ഈടാക്കുന്ന പലിശ നിരക്ക്.

ഏതൊക്കെ ചിട്ടിക്ക് ആനുകൂല്യം

2023 ഏപ്രിൽ 17 നും സെപ്റ്റംബർ 30നു ഇടയിൽ കെഎസ്എഫ്ഇ ശാഖകളിൽ ആരംഭിക്കുന്ന ചിട്ടികളിൽ ചേരുന്നവർക്കാണ് ഡയമണ്ട് ചിട്ടിയുടെ ആനുകൂല്യം ലഭിക്കുന്നത്. ഇക്കാലയളവിൽ മുടക്കചിട്ടി ഏറ്റെടുക്കുന്നവര്‍ക്കും ആനുകൂല്യങ്ങള്‍ ലഭിക്കും. പുതുതായി ആരംഭിക്കുന്ന ചിട്ടികളെ പറ്റി അറിയാൻ https://ksfeonline.com/chitty/newchits എന്ന വെബ്സൈറ്റ് സന്ദർശിച്ചാൽ മതിയാകും. ജില്ലകളും ശാഖകളും തിരഞ്ഞെടുത്ത് പുതുതായി ആരംഭിക്കുന്ന ചിട്ടികളെ പറ്റി അറിയാൻ സാധിക്കും.