2 ലക്ഷം രൂപ അടച്ചാൽ 4 ലക്ഷം രൂപ സ്വന്തമാക്കാം; കെഎസ്എഫ്ഇ മുടക്ക ചിട്ടികൾ ലാഭകരമാകുന്നത് എങ്ങനെ

2 ലക്ഷം രൂപ കയ്യിലുള്ള വ്യക്തിക്ക് 4 ലക്ഷത്തിന്റെ ആവശ്യം നടത്താനും കെഎസ്എഫ്ഇ ചിട്ടി ഉപയോ​ഗിക്കാം. ഇവിടെ കെഎസ്എഫ്ഇയുടെ മുടക്ക ചിട്ടികളാണ് ഉപകാരപ്പെടുക. മുടങ്ങി കിടക്കുന്ന ചിട്ടികളിൽ കുടിശ്ശിക അടച്ച് ചേരുകയും വേ​ഗത്തിൽ വിളിച്ചെടുത്ത് ഉപയോ​ഗിക്കുകയും ചെയ്താൽ ലാഭകരമാണ്. അധികമായി ആവശ്യമായി വരുന്ന തുകയ്ക്ക് വായ്പയിലേക്ക് കടക്കുമ്പോൾ പലിശ സഹിതം വലിയ തുക അടയ്ക്കുന്നത് ഒഴിവാക്കാൻ ഇവ സഹായിക്കും.

എന്താണ് മുടക്ക ചിട്ടി

പേര് സൂചിപ്പിക്കുന്നത് പോലെ മുടങ്ങി കിടക്കുന്ന ചിട്ടികളാണ് മുടക്ക ചിട്ടികൾ. കെഎസ്എഫ്ഇ ശാഖകളിൽ മാസ അടവ് മുടങ്ങിയ ചിട്ടികൾ ലഭ്യമാകും. സാമ്പത്തിക സ്ഥിതി അനുകൂലമല്ലാത്തതിനാൽ ചിട്ടി തുടർന്ന് അടയ്ക്കാൻ സാധിക്കാത്തവരാണെങ്കിൽ ചിട്ടിയിൽ നിന്ന് ഒവിയാൻ സാധിക്കും. ചിട്ടിയുള്ള കെഎസ്എഫ്‌സി ബ്രാഞ്ചില്‍ ചിട്ടി ഒഴിവാക്കി തരാനുള്ള അപേക്ഷ സമര്‍പ്പിച്ചാൽ മതി. വിളിച്ചെടുക്കാത്ത ചിട്ടികളെയാണ് ഇപ്രകാരം ഒഴിവാക്കാൻ സാധിക്കുക. ഇങ്ങനെ ഒഴിവു വരുന്ന ചിട്ടികളെയാണ് മുടക്കചിട്ടികള്‍ എന്നു പറയുന്നത്.

2 ലക്ഷം കൊണ്ട് 4 ലക്ഷത്തിന്റെ കാര്യം നടത്താം

കയ്യില്‍ 2 ലക്ഷം രൂപയുമായി 4 ലക്ഷത്തിന്റെ കാര്‍ വാങ്ങാന്‍ ഇറങ്ങുന്നൊരാള്‍ 2 ലക്ഷം രൂപ വായ്പ എടുക്കുന്നതാണ് സാധാരണ രീതി. എന്നാല്‍ കെഎസ്എഫ്ഇ ബ്രാഞ്ചില്‍ ചെന്ന് മുടക്ക ചിട്ടിയില്‍ ചേര്‍ന്നാലുള്ള നേട്ടം എന്താണെന്ന് നോക്കാം. ഇത്തരക്കാർക്ക് 5 ലക്ഷത്തിന്റെ മുടക്ക ചിട്ടി മതിയാകും. 50 മാസ കാലാവധിയുള്ള 10,000 രൂപ മാസ അടവുള്ള 5 ലക്ഷം രൂപയുടെ മുടക്ക ചിട്ടിയിൽ ചേർന്നാൽ എങ്ങനെ അടവ് വരുന്നതെന്ന് നോക്കാം. 

25 മാസത്തില്‍ കുടിശ്ശിക വരുത്തിയ ചിട്ടിയില്‍ 26ാം മാസത്തില്‍ ചേരുമ്പോള്‍ 2,03,950 രൂപയാണ് അടയ്‌ക്കേണ്ടി വരിക. 48,550 രൂപയാണ് ഇത്രയും കാലത്തിനിടെ ലഭിച്ച ലാഭ വിഹിതം. തൊട്ടടുത്ത മാസം 4,46,900 രൂപയ്ക്ക് ചിട്ടി പിടിച്ചാല്‍ ചാര്‍ജും കിഴിച്ച് 4,43,900 രൂപ കിട്ടും. 25 മാസം കൊണ്ട് ബാക്കി വരുന്ന 2,39,248 രൂപ അടച്ചു തീർത്താൽ മതി.

മുടക്ക ചിട്ടിയിൽ ശ്രദ്ധിക്കാം

മുടക്ക ചിട്ടിയിൽ ചേരുന്നതിന് മുൻപ് ചിട്ടിയുമായി ബന്ധപ്പെട്ട നിബന്ധനകൾ അറിയണം. ആകെ കാലയളവിന്റെ 60 ശതമാനം അടവ് നടക്കാത്ത മുടക്ക ചിട്ടിയിൽ മാത്രമെ ചേരാൻ സാധിക്കുകയുള്ളൂ. ഉദാഹരണത്തിന് 100 മാസ ചിട്ടികളിൽ 60 മാസം വരെ മുടക്ക ചിട്ടി ചേരാം. 50 മാസ ചിട്ടികളാണെങ്കിൽ 30 മാസം വരെ ചിട്ടി ചേരാം.

കയ്യിൽ മുഴുവൻ തുകയില്ലാത്ത ആവശ്യത്തിന് ചിട്ടി ചേർന്ന് പണം സ്വന്തമാക്കാം. കാര്‍ വാങ്ങല്‍ പോലുള്ള ആവശ്യങ്ങള്‍ക്ക് മുഴുവന്‍ തുകയും കൈയ്യിലില്ലാത്ത അവസ്ഥയില്‍ മുടക്ക ചിട്ടിയില്‍ ചേരുന്നത് ഉപകാരമാണ്. വായ്പ എടുത്ത് ഇഎംഐ അടച്ചു തീര്‍ക്കുന്നതിനെക്കാൾ ലാഭകരമായി മുടക്ക ചിട്ടി അടയ്ക്കാം. 

മുടക്ക ചിട്ടിയിൽ ചേരുമ്പോൾ, ചിട്ടി ഒഴിയുന്ന വ്യക്തി ലാഭ വിഹിതം കിഴിച്ച് ഇതുവരെ അടച്ച തുക മുടക്ക ചിട്ടിയിലേക്ക് ചേരുന്നൊരാൾ അടയ്ക്കണം. ഇതുവഴി ഒറ്റ അടവിൽ തന്നെ ലാഭ വിഹിതം പൂർണമായും നേടാൻ സാധിക്കും. ചിട്ടിയിൽ ചേർന്ന മാസം തന്നെ ലേലം വിളിക്കാൻ സാധിക്കും. ഈ അവസരത്തിൽ ചിട്ടി വിളിച്ചെടുത്ത് ആവശ്യങ്ങൾക്ക് ഉപയോ​ഗിക്കാം.

എവിടെ ലഭിക്കും

ഓൺലൈൻ സൗകര്യങ്ങൾ ഉപയോ​ഗിച്ച് മുടക്ക ചിട്ടികളെ അറിയാൻ സാധിക്കില്ല. മുടക്കചിട്ടിയുണ്ടോ എന്നറിയാന്‍ കെഎസ്എഫ്ഇ ബ്രാഞ്ചുകളില്‍ ചെന്ന് തിരക്കണം. കെഎസ്എഫ്ഇയിൽ അടവ് മുടങ്ങി കിടക്കുന്ന വിളിച്ചെടുക്കാത്ത ചിട്ടികൾ പഴയ പടിയാക്കാനും ആവശ്യക്കാർക്ക് മുടക്ക ചിട്ടി അനുവദിക്കാനും കെഎസ്എഫ്ഇ സഞ്ജീവനം പദ്ധതി നടത്തുന്നുണ്ട്. ഇതിനാൽ ആവശ്യക്കാർക്ക് ശാഖകളെ സമീപിക്കാം.