2 വര്‍ഷം കൊണ്ട് 5 ലക്ഷം രൂപ നേടാം; കെഎസ്എഫ്ഇയുടെ പുതിയ ഹ്രസ്വകാല ചിട്ടി നോക്കുന്നോ

പൊടുന്നനെ കയറിയ വരുന്ന ചെലവുകളെ നേരിടാൻ പലർക്കും പ്രയാസമാണ്. എന്നാൽ മുൻകൂട്ടി കാണാവുന്ന ചെലവുകൾ ഓരോരുത്തരുടെയും സാമ്പത്തിക പ്ലാനിം​ഗ് അനുസരിച്ച് നേരിടാം. ഹ്രസ്വകാലത്തേക്ക് വരുന്ന ചെലുകളെ നേരിടാൻ പറ്റിയ മാർ​ഗമാണ് കെഎസ്എഫ്ഇ ചിട്ടികൾ. നിക്ഷേപത്തിനൊപ്പം വായ്പയുടെ സാധ്യതകളും തുറന്നു തരുന്ന കെഎസ്എഫ്ഇ ചിട്ടികൾ പലിശ ബാധ്യതയില്ലാതെ ആവശ്യത്തിന് പണം ഉറപ്പാക്കുന്നു. ഇത്തരത്തിൽ ഹൃസ്വകാലം കൊണ്ട് 5 ലക്ഷം രൂപ നേടാൻ സാധിക്കുന്ന കെഎസ്എഫ്ഇയുടെ ഹ്രസ്വകാല ചിട്ടിയാണ് ചുവടെ വിശദമാക്കുന്നത്.

ഹ്രസ്വകാല ചിട്ടികൾ

25 മാസം മുതൽ 60 മാസം വരെ ദൈർഘ്യമുള്ളവയാണ് കെഎസ്എഫ്ഇ ഹ്രസ്വകാല ചിട്ടികൾ. ചിട്ടിത്തുക പെട്ടന്ന് ആവശ്യമുള്ള വരിക്കാർക്ക് ഈ ചിട്ടി ഉപകാരപ്രദമാണ്. കുറഞ്ഞ വരിക്കാരും കുറഞ്ഞ കാലയളവുമായതിനാൽ പരമാവധി കിഴിവിൽ ലേലം വിളിക്കാൻ കൂടുതൽ പേരുണ്ടാകില്ല. ഇതിനാൽ വലിയ കിഴിവിലേക്ക് പോകാതെ ആവശ്യകാരന് ചിട്ടി ലഭിക്കും.

ചിട്ടി വിശദാംശങ്ങൾ

പെട്ടന്നുള്ള ആവശ്യങ്ങൾക്ക് വായ്പകളെക്കാളും ലാഭകരമായി ഉപയോ​​ഗപ്പെടുത്താവുന്ന ഹ്രസ്വകാല ചിട്ടിയാണ് 20,000 രൂപ മാസ അടവുള്ള 25 മാസ കാലാവധിയുള്ള 5 ലക്ഷം രൂപയുടെ കെഎസ്എഫ്ഇ ഹ്രസ്വകാല ചിട്ടി. ഇതുപ്രകാരം 2 വര്‍ഷവും 1 മാസവുമുള്ള അടവില്‍ ചിട്ടിയിൽ നിന്ന് 5 ലക്ഷം രൂപ ലഭിക്കും. പ്രസ്തുത ചിട്ടിയില്‍ 30 ശതമാനം വരെ കുറച്ച് വിളിക്കാന്‍ സാധിക്കും.

30 ശതമാനം വരെ വിളിച്ചെടുത്താൽ 3.5 ലക്ഷം രൂപവരെ നേടാന്‍ സാധിക്കും. ഫോര്‍മാന്‍ കമ്മീഷനും മറ്റു ചാര്‍ജുകളും ചിട്ടി ലഭിച്ചാല്‍ അടയ്‌ക്കേണ്ടി വരും. 30 ശതമാനം കിഴിവില്‍ പോകുന്ന മാസങ്ങളില്‍ ചിറ്റാളന്മാര്‍ക്ക് 5,000 രൂപ വീതം ലാഭ വിഹിതം ലഭിക്കും. ഇതുപ്രകാരം മാസത്തില്‍ 15,000 രൂപ അടച്ചാല്‍ മതിയാകും. ഓരോ മാസത്തിലും ചിട്ടി എത്ര ശതമാനം കിഴിവിൽ ലേലത്തിൽ പോയി എന്നതിനെ അടിസ്ഥാനമാക്കിയാണ് മാസ അടവ് ക്രമീകരിക്കുന്നത്.

ആര്‍ക്കൊക്കെ അനുയോജ്യം

25 പേര്‍ക്ക് മാത്രമാണ് ഈ ചിട്ടിയില്‍ ചേരാന്‍ സാധിക്കുക. പെട്ടന്ന് പണത്തിന് ആവശ്യം വരുന്നവര്‍ക്ക് തിരഞ്ഞെടുക്കാവുന്ന ചിട്ടിയാണിത്. 2 വര്‍ഷത്തിനുള്ളില്‍ 5 ലക്ഷത്തോളം തുക ആവശ്യമുള്ളവര്‍ക്കും മാസത്തില്‍ 15,000 - 20,000 രൂപ വരെ കണ്ടെത്താന്‍ സാധിക്കുന്നവര്‍ക്കും ചിട്ടിയില്‍ ചേരാം. ചിട്ടിയില്‍ ചേരാനായി തൊട്ടടുത്ത ശാഖയില്‍ ചെന്ന് അന്വേഷിച്ചാല്‍ മതിയാകും.. തൃശൂര്‍ വടക്കാഞ്ചേരി ശാഖയില്‍ ഈയടുത്ത് ഇത്തരത്തിലുള്ള ഹൃസ്വകാല ചിട്ടി ആരംഭിക്കുന്നുണ്ട്.

ജാമ്യങ്ങള്‍

പെട്ടന്നുള്ള പണം കണ്ടെത്താന്‍ ഹ്രസ്വകാല ചിട്ടിയില്‍ ചേരുന്നവര്‍ കെഎസ്എഫ്ഇ ചിട്ടിയുടെ ജാമ്യ വ്യവസ്ഥകളെ പറ്റി ബോധവാന്മാരായിരിക്കണം. ചിട്ടി ലേലം വിളിച്ചെടുത്താല്‍ ഭാവി ബാധ്യതയ്ക്ക് ജാമ്യം നല്‍കേണ്ടതുണ്ട്.

ചിട്ടിയില്‍ എത്ര മാസം ബാക്കിയുണ്ടോ ആ അടവിനെ പ്രതിമാസ തവണ കൊണ്ട് ഗുണിച്ചാല്‍ ലഭിക്കുന്ന തുകയാണ് ഭാവി ബാധ്യത. ഉദാഹരണത്തിന് 10ാം മാസത്തില്‍ ലേലം വിളിച്ചെടുത്താല്‍ ചിറ്റാളന്റെ ഭാവി ബാധ്യത (15*20,000) 3 ലക്ഷം രൂപയാണ്. ഒന്നോ, ഒന്നിലധികമോ ജാമ്യങ്ങള്‍ നല്‍കി പണം പിന്‍വലിക്കാം.

ഭൂമി, ബാങ്ക് ഗ്യാരണ്ടി, സ്ഥിര നിക്ഷേപങ്ങളുടെ രസീത്, സ്വര്‍ണ്ണം, വിളിക്കാത്ത ചിട്ടി പാസ് ബുക്ക്, ശമ്പള സര്‍ട്ടിഫിക്കറ്റ്, എല്‍ഐസി പോളിസി തുടങ്ങിയവയാണ് കെഎസ്എഫ്ഇ സ്വീകരിക്കുന്ന ജാമ്യങ്ങള്‍. ഭൂമി ജാമ്യം നല്‍കുന്നവരാണെങ്കില്‍ ചിട്ടിയില്‍ ചേരുന്ന സമയത്ത മുന്നാധാരവും ആധാരവും ബ്രാഞ്ച് മാനേജരെ കണിച്ച് വെരിഫൈ ചെയ്യാവുന്നതാണ്.