ഇത്തരം ഈടുകൾ ആവശ്യമില്ല, നിങ്ങൾക്ക് കുറഞ്ഞ പലിശയിൽ പെട്ടെന്ന് ലോൺ കിട്ടും; ഏതാണീ വായ്പ?

നിക്ഷേപകർക്കിടയിൽ ഏറ്റവും ജനപ്രിയമായൊരു ധനകാര്യ സ്ഥാപനമാണ് കെ.എസ്.എഫ്.ഇ. ബാങ്ക് നൽകുന്നതിനേക്കാൾ മികച്ച നേട്ടവും കുറഞ്ഞ പലിശയുള്ള വായ്പകളും കെ.എസ്.എഫ്.ഇ നൽകുന്നു. അതിനാൽ എല്ലാ തരം ജനങ്ങൾക്കും കെ.എസ്.എഫ്.ഇയുടെ ഈ സമീപനത്തോട് പ്രത്യേക ഇഷ്ടമുണ്ട്. ഒരു ബാങ്കിൽ വായ്പയ്ക്ക് അപേക്ഷിച്ച് നിങ്ങൾക്ക് ഒരു നിശ്ചിത തുക ലഭിച്ചാൽ അതിന് വലിയ പലിശയോടെയുള്ള തിരിച്ചടവുകൾ അടക്കേണ്ടി വരും. എന്നാൽ കെ.എസ്.എഫ്.ഇ നൽകുന്ന ചിട്ടികളിലൂടെ വലിയ തുക പലിശയില്ലാതെ ലഭിക്കും.

കെ.എസ്.എഫ്.ഇയിലെ വായ്പകൾ കുറഞ്ഞ പലിശയിൽ നിങ്ങൾക്ക് ലഭിക്കും. ബാങ്കുകൾ നൽകുന്ന പലിശയെ അപേക്ഷിച്ച് ഈ പലിശ വളരെ കുറവാണ്. കെ.എസ്.എഫ്.ഇ ചിട്ടിയിലുള്ളവർക്കും വായ്പ ലഭിക്കും. അതായത് നിങ്ങൾക്ക് സാമ്പത്തിക ആവശ്യം വരുമ്പോൾ വായ്പ എടുക്കാനുള്ള അവസരവും കെ.എസ്.എഫ്.ഇ ഒരുക്കുന്നുണ്ട്.

കുറഞ്ഞ സമയത്തിനുള്ളിൽ ഒരു ലോൺ ലഭിക്കാൻ ആ​ഗ്രഹമില്ലാത്തവർ ആരുമുണ്ടാവില്ല. കെ.എസ്.എഫ്.ഇ അത്തരത്തിൽ ചുരുങ്ങിയ സമയത്തിനുള്ളിൽ മറ്റു ഈടുകൾ വെക്കാതെ പാസാക്കുന്ന വായ്പയാണ് കെ.എസ്.എഫ്.ഇ പാസ്ബുക്ക് ലോൺ. ഇത് ശരിക്കും കെ.എസ്.എഫ്.ഇ ചിട്ടികളിലുള്ളവർക്ക് ഏറ്റവും ഉപകാരപ്രദമായ വായ്പാ മാർ​ഗമാണ്. എന്താണ് കെ.എസ്.എഫ്.ഇ പാസ്ബുക്ക് ലോൺ? വിശദമായി അറിയാം.

കെ.എസ്.എഫ്.ഇ പാസ്ബുക്ക് ലോൺ

നിങ്ങൾ കെ.എസ്.എഫ്.ഇയിലെ ഏതെങ്കിലും ചിട്ടിയിൽ ചേർന്ന വ്യക്തിയാണെങ്കിൽ ഒരു പാസ്ബുക്ക് കൈവശമുണ്ടായിരിക്കും. ഈ പാസ്ബുക്ക് ജാമ്യമായി സ്വീകരിച്ചു കൊണ്ട് കെ.എസ്.എഫ്.ഇ നിങ്ങൾക്ക് നൽകുന്ന വായ്പയാണ് പാസ്ബുക്ക് ലോൺ. ഈ ലോണിന് മറ്റു ഈടുകൾ നൽകേണ്ട ആവശ്യമില്ല.

ആ പാസ്ബുക്കിന്റെ ആദ്യത്തെ പേജിൽ തന്നെ നിങ്ങളുടെ പേരും, ചിട്ടിയുടെ നമ്പറും, ചിറ്റാൾ നമ്പറും, ചിട്ടി തുടങ്ങിയ തിയ്യതിയും , ചിട്ടി അവസാനിക്കുന്ന തിയ്യതിയും രേഖപ്പെടുത്തിയിരിക്കും. ഏത് ദിവസമാണ് ചിട്ടിയുടെ ലേലം നടക്കുന്നതെന്നും ഇതിൽ ഉൾപ്പെടുന്നു.

ആർക്കെല്ലാം ഈ ലോണിന് അപേക്ഷിക്കാം...

കെ.എസ്.എഫ്.ഇ ചിട്ടിയുടെ മാസതവണകൾ കൃത്യമായി തിരിച്ചടക്കുന്ന വ്യക്തിക്ക് ഈ വായ്പക്കായി അപേക്ഷിക്കാം. എന്നാൽ ചിട്ടി വിളിച്ചെടുത്ത വ്യക്തികൾക്ക് ആ പാസ്ബുക്ക് ഉപയോ​ഗിച്ച് ലോൺ എടുക്കാൻ സാധിക്കില്ല. ചിട്ടി വിളിക്കാത്തവർക്കാണ് ഈ അവസരം നൽകുന്നത്.

പാസ്ബുക്ക് ലോൺ എങ്ങനെ കിട്ടും?

നിങ്ങളുടെ വിളിച്ചെടുക്കാത്ത ചിട്ടിയുടെ പാസ്ബുക്കുമായി കെ.എസ്.എഫ്.ഇയുടെ ബ്രാഞ്ചിൽ എത്തുക. ആധാർ കാർഡിന്റെ കോപ്പിയും ഇതിനൊപ്പം സമർപ്പിക്കണം. ഈ ലോണിന് മറ്റു രേഖകളൊന്നും തന്നെ ആവശ്യമില്ല, മാത്രമല്ല പെട്ടെന്ന് തന്നെ ഈ ലോൺ ലഭിക്കുകയും ചെയ്യും.

നിങ്ങളുടെ പാസ്ബുക്കിൽ ഡിവിഡന്റ് കിഴിച്ച് എത്ര രൂപ അടച്ചുവെന്ന് മനസിലാക്കൂ. അതിനനുസരിച്ചാണ് നിങ്ങൾക്ക് വായ്പ ലഭിക്കുന്നത്. ചിട്ടി തുടങ്ങിയിട്ട് എത്ര മാസമായെന്നും, ചിട്ടിക്കാലാവധി അവസാനിക്കാൻ എത്ര മാസം ബാക്കിയുണ്ട് എന്നും പരിശോധിച്ച ശേഷമാണ് വായ്പാ തുക നിശ്ചയിക്കുന്നത്. വായ്പയ്ക്ക് അപേക്ഷിക്കുമ്പോൾ ഡോക്യുമെന്റേഷൻ ചാർജ് നൽകേണ്ടി വരും. എന്നാൽ അതിലുപരി യാതൊരു ചിലവും വരില്ല. ഈ ചാർജ് ഏകദേശം 50 രൂപ മുതൽ 200 രൂപ വരെയാണ്.

പലിശ

പാസ്ബുക്ക് ലോണിന് അപേക്ഷിച്ചാൽ 11.5% എന്ന നിരക്കിലാണ് പലിശ ഈടാക്കുന്നത്. കെ.എസ്.എഫ്.ഇയുടെ പേഴ്സണൽ ലോണിനും ഇതേ പലിശയാണ് ഈടാക്കുന്നത്. മറ്റു ബാങ്കുകൾ ഈടാക്കുന്ന പലിശ താരതമ്യം ചെയ്യുമ്പോൾ ഇത് വളരെ കുറവാണ്.