ലാപ്ടോപ്പ് വാങ്ങാൻ കേരള സർക്കാരിന്റെ ചിട്ടി പദ്ധതി; മാസം വെറും 500 രൂപ മാത്രം

കുട്ടികൾക്ക് ഓൺലൈൻ ക്ലാസുകളിൽ പങ്കെടുക്കാൻ ലാപ്‌ടോപ്പ് വാങ്ങാൻ മാതാപിതാക്കളെ സഹായിക്കുകയെന്ന ലക്ഷ്യത്തോടെ, മൈക്രോ ചിട്ടി സ്കീം ആരംഭിക്കാൻ കുടുംബശ്രീയും കെഎസ്എഫ്ഇയും കൈകോർത്തു. ചിട്ടി വഴി 3 മാസത്തിനുള്ളിൽ 2 ലക്ഷം ലാപ്ടോപ്പുകൾ വിതരണം ചെയ്യുമെന്ന് മന്ത്രി തോമസ് ഐസക് ഈ മാസം ആദ്യം വ്യക്തമാക്കിയിരുന്നു. എല്ലാ കുട്ടികൾക്കും ഓൺലൈൻ ക്ലാസുകൾ ലഭ്യമാണെന്ന് ഉറപ്പാക്കുന്നതിന് സമീപസ്ഥല പഠന കേന്ദ്രങ്ങൾ ആരംഭിക്കുമെന്നും മന്ത്രി വ്യക്തമാക്കിയിരുന്നു.

ലാപ്‌ടോപ്പ് ചിട്ടി

ഇതിനുപുറമെയാണ് 15,000 രൂപയിൽ താഴെയുള്ള ലാപ്‌ടോപ്പ് ചിട്ടി പദ്ധതി വഴി വിതരണം ചെയ്യുന്നത്. ലാപ് ടോപ്പ് വാങ്ങാൻ ആഗ്രഹിയ്ക്കുന്ന കുട്ടികളുടെ രക്ഷിതാക്കൾക്ക് പദ്ധതിയിൽ ചേരാം. 15,000 രൂപ മൈക്രോ ചിട്ടി സ്കീം കുടുംബശ്രീക്കായി കെഎസ്എഫ്ഇയാണ് നടത്തുക. പദ്ധതിയുടെ ഗുണഭോക്താക്കൾ 30 മാസത്തേക്ക് പ്രതിമാസം 500 രൂപ അടയ്ക്കണം.

കെഎസ്എഫ്ഇ

10 തവണകൾ കൃത്യമായി പണമടയ്ക്കുന്നവർക്ക് കെഎസ്എഫ്ഇ അടുത്ത തവണ 500 രൂപ നൽകും. ഈ രീതിയിൽ, കൃത്യസമയത്ത് പേയ്മെന്റ് നടത്തുന്ന ഗുണഭോക്താക്കൾക്ക് കെഎസ്എഫ്ഇ 1500 രൂപ നൽകും. പദ്ധതിയിലേക്ക് ഗുണഭോക്താക്കളെ ചേർക്കുന്ന കുടുംബശ്രീ യൂണിറ്റിന് ഓരോ തവണയുടെയും രണ്ട് ശതമാനം കമ്മീഷൻ ലഭിക്കും.

മൂന്നാം മാസം

ചിട്ടിയുടെ മൂന്നാം മാസത്തിലാണ് ലാപ്‌ടോപ്പ് ലഭിക്കുക. മൂന്നാം മാസത്തിൽ ഒരു ലാപ്‌ടോപ്പ് വാങ്ങുന്നതിന് ആവശ്യമായ തുക കെഎസ്എഫ്ഇ വിതരണം ചെയ്യും. ലാപ്‌ടോപ്പ് വിതരണക്കാരെ തിരഞ്ഞെടുക്കാൻ ഐടി വകുപ്പ് കുടുംബശ്രീ വഴി ടെണ്ടർ നൽകും. ചിട്ടി മെച്യൂരിറ്റി കാലയളവ് പൂർത്തിയാക്കിക്കഴിഞ്ഞാൽ, ലാപ്ടോപ്പിനായി ചെലവഴിച്ച തുക അതിൽ നിന്ന് കുറയ്ക്കുകയും ബാക്കി തുക ഗുണഭോക്താവിന് നൽകുകയും ചെയ്യും.

ലാപ്ടോപ്പിനുള്ള സബ്സിഡി

പ്രാദേശിക സ്വയംഭരണ സ്ഥാപനങ്ങൾ, പട്ടികജാതി, എസ്ടി വകുപ്പ്, ഫിഷറീസ് വകുപ്പ് എന്നിവയ്ക്ക് ലാപ്ടോപ്പ് വാങ്ങുന്നതിന് സബ്സിഡി നൽകാൻ അനുമതിയുണ്ട്. എം‌എൽ‌എമാർക്ക് അവരുടെ ഫണ്ടിൽ നിന്ന് സബ്‌സിഡി അനുവദിക്കുന്നത് പരിഗണിക്കുന്നതിനെക്കുറിച്ചും സർക്കാർ ആലോചിക്കുന്നുണ്ട്. സബ്സിഡി തുക കെഎസ്എഫ്ഇയിൽ അടയ്ക്കണം. ഇതിന്റെ അടിസ്ഥാനത്തിൽ തവണകൾ കുറയും. പൊതു പ്രതിനിധികൾക്കും സ്പോൺസർമാർ വഴി കൂടുതൽ സബ്സിഡി നൽകാൻ അനുവാദമുണ്ട്. ലാപ്ടോപ്പ് ചിട്ടി സംബന്ധിച്ച ഔദ്യോഗിക ഉത്തരവ് വിവിധ വകുപ്പുകൾ ഉടൻ പുറപ്പെടുവിക്കും.