കയ്യിൽ പണമില്ലേ, സഹായത്തിന് ഇവരുണ്ട്; വ്യക്തിഗത വായ്പ നേടാം കുറഞ്ഞ പലിശയിൽ

ജീവിതത്തിനിടയിൽ പണത്തിനുള്ള ആവശ്യം എപ്പോൾ വേണമെങ്കിലും ഉണ്ടാകാം. വീട് പുതുക്കി പണിയാൻ, വാഹന റിപ്പയറിങ്, ആശുപത്രി ചിലവുകൾ തുടങ്ങിയ സാമ്പത്തിക ചിലവുകൾ ഒട്ടും പ്രതീക്ഷിക്കാതെയാണ് കടന്നുവരുന്നത്. ഈ അപ്രതീക്ഷിത ചിലവുകൾ മുന്നിൽകണ്ട് ചിലരെങ്കിലും നിക്ഷേപ പദ്ധതികൾ ആസൂത്രണം ചെയ്യും. എന്നാൽ ഭൂരിപക്ഷം പേർക്കും അത്തരത്തിലുള്ള ഒരു നിക്ഷേപ പദ്ധതി ഉണ്ടാകാനിടയില്ല. അതുകൊണ്ടുതന്നെ പെട്ടെന്നുള്ള സാമ്പത്തിക ആവശ്യങ്ങൾ നിറവേറ്റുന്നതിന് ഉപകരിക്കുന്നത് വ്യക്തിഗത വായ്പ അഥവാ പേഴ്സണൽ ലോണുകളാണ്.

പെട്ടെന്ന് പണം ലഭിക്കും എന്നുള്ളത് മാത്രമാണ് വ്യക്തിഗത വായ്പയുടെ ഗുണം. എന്നാൽ നിരവധി ദോഷങ്ങൾ ഉണ്ട്. അതിൽ ഏറ്റവും പ്രധാനപ്പെട്ടത് ഉയർന്ന പലിശ നിരക്കാണ്. വ്യക്തിഗത വായ്പകൾക്ക് 8 മുതൽ 24 ശതമാനം വരെ പലിശ ഈടാക്കുന്ന ബാങ്കുകളുണ്ട്.

വ്യക്തിഗത വായ്പകൾ സുരക്ഷിതമല്ലാത്ത വായ്പകളാണെന്ന് ചൂണ്ടിക്കാട്ടിയാണ് ബാങ്കുകള്‍ ഇവയ്ക്ക് ഉയര്‍ന്ന പലിശ നിരക്ക് ഈടാക്കുന്നത്. അതുകൊണ്ടുതന്നെ വ്യക്തിഗത വായ്പകൾ സ്വീകരിക്കുന്നതിനു മുൻപ് പലിശ നിരക്കിനെ കുറിച്ചും മറ്റ് നിബന്ധനകളെക്കുറിച്ചും കൃത്യമായി മനസ്സിലാക്കേണ്ടത് അത്യാവശ്യമാണ്.

രാജ്യത്തെ പ്രമുഖ ബാങ്കുകൾ നൽകുന്ന വ്യക്തിഗത വായ്പകളുടെ പലിശ നിരക്ക് പരിശോധിക്കാം.

1. യൂണിയൻ ബാങ്ക് - 9.30 മുതൽ 13.40 ശതമാനം വരെ

പ്രതിമാസ തിരിച്ചടവ് - 2090 മുതൽ 2296 രൂപ

2. ഇന്ത്യൻ ബാങ്ക് - 10 മുതൽ 12.80 ശതമാനം വരെ

പ്രതിമാസ തിരിച്ചടവ് - 2125 മുതൽ 2665 രൂപ

3. ബാങ്ക് ഓഫ് ബറോഡ - 10.10 മുതൽ 18.25 ശതമാനം വരെ

പ്രതിമാസ തിരിച്ചടവ് - 2130 മുതൽ 2553 രൂപ

4. ബാങ്ക് ഓഫ് ഇന്ത്യ - 10.25 മുതൽ 12.80 ശതമാനം വരെ

പ്രതിമാസ തിരിച്ചടവ് - 2132 മുതൽ 2366 രൂപ

5. ആക്സിസ് ബാങ്ക് - 10.49 മുതൽ 22 ശതമാനം വരെ

പ്രതിമാസ തിരിച്ചടവ് - 2137 മുതൽ 20762 രൂപ

6. എച്ച്ഡിഎഫ്സി ബാങ്ക് - 10.5 മുതൽ 24 ശതമാനം വരെ

പ്രതിമാസ തിരിച്ചടവ് - 2149 മുതൽ 2777 രൂപ

7. ഐസിഐസിഐ ബാങ്ക് - 10.5 മുതൽ 16 ശതമാനം വരെ

പ്രതിമാസ തിരിച്ചടവ് - 2162 മുതൽ 2432 രൂപ

8. കാനറാ ബാങ്ക് - 10.65 മുതൽ 16.25 ശതമാനം വരെ

പ്രതിമാസ തിരിച്ചടവ് - 2157 മുതൽ 2877 രൂപ

9. ഇന്ത്യൻ ഓവർസീസ് ബാങ്ക് - 10.85 മുതൽ 13 ശതമാനം വരെ

പ്രതിമാസ തിരിച്ചടവ് - 2167 മുതൽ 2275 രൂപ

10. ഐഡിബിഐ ബാങ്ക് - 11 ശതമാനം മുതൽ 15.5 ശതമാനം വരെ

പ്രതിമാസ തിരിച്ചടവ് - 2174 മുതൽ 2405 രൂപ

11. കൊട്ടക് മഹീന്ദ്ര ബാങ്ക് - 10.5 മുതൽ 24 ശതമാനം വരെ

പ്രതിമാസ തിരിച്ചടവ് - 2159 മുതൽ 2877 രൂപ

പ്രോസസിംഗ് ഫീസ്

ഭവന വായ്പ, കാർ വായ്പ, സ്വർണ പണയ വായ്പ എന്നിവയെ അപേക്ഷിച്ച് വ്യക്തിഗത വായ്പകളുടെ പ്രോസസിംഗ് ഫീസ് താരതമ്യേന വളരെ കൂടുതലാണ്. ഒന്ന് മുതൽ രണ്ടര ശതമാനം വരെയാണ് മിക്ക ബാങ്കുകളും പ്രോസസിംഗ് ഫീസായി ഈടാക്കുന്നത്.

ക്രെഡിറ്റ് സ്‌കോര്‍ പ്രധാനം

മറ്റേതൊരു വായ്പയെയും പോലെ വായ്പ ലഭ്യമാകുന്നതിനുള്ള പ്രധാന മാനദണ്ഡം ക്രെഡിറ്റ് സ്‌കോര്‍ തന്നെ. ഉപഭോക്താവിന്റെ വരുമാനം, തിരിച്ചടവ് ശേഷി, നിലവിലുള്ള ബാധ്യതകള്‍ എന്നിവയെല്ലാം ക്രെഡിറ്റ് സ്‌കോറിനൊപ്പം ബാങ്ക് പരിശോധിക്കും. ക്രെഡിറ്റ് സ്‌കോര്‍ മികച്ചതാണെങ്കില്‍ മികച്ച പലിശ നിരക്കില്‍ വായ്പ ലഭിക്കുകയും ചെയ്യും.