മാസം 2,000 രൂപ പ്രീമിയമടച്ചാൽ 5 ലക്ഷത്തിന്റെ സമ്പാദ്യവും ജീവിത സുരക്ഷയും; എൽഐസി പോളിസി അറിയാം

ജീവിതത്തിൽ സമ്പാദിക്കുന്നതിനൊപ്പം ഭാവി മുന്നിൽ കാണുന്നൊരാൾ ആവശ്യമായ ലൈഫ് ഇൻഷൂറൻസ് കൂടി കരുതേണ്ടതുണ്ട്. വരുമാന സ്രോതസായ വ്യക്തിക്ക് അത്യാഹിതം സംഭവിച്ചാൽ കുടുംബത്തെ സാമ്പത്തിക ബാധ്യതയിൽ നിന്ന് രക്ഷിക്കാൻ ലൈഫ് ഇൻഷൂറൻസ് പോളിസികൾക്ക് സാധിക്കും.

ഇത്തരം പോളിസികൾ നോക്കുന്നവർക്ക് ലൈഫ് ഇൻഷൂറൻസ് കോർപ്പറേഷനിൽ വിവിധങ്ങളായ സാധ്യതകളുണ്ട്. മാസത്തിലെ ചെറിയ തുകയുടെ അടവ് വഴി പോളിസി കാലായളവിൽ ഇൻഷൂറൻസ് പരിരക്ഷ ലഭിക്കുന്നതിനും കാലാവധിയിൽ ഒരു സമ്പാദ്യം ഉണ്ടാക്കുന്നതിനും ഇത് സഹായിക്കും.

എല്‍ഐസി നടപ്പിലാക്കുന്ന പദ്ധതികളുടെ പ്രധാന നേട്ടം സമ്പാദ്യത്തിനൊപ്പം ജീവിത സുരക്ഷ കൂടി ലഭിക്കും എന്നതാണ്. ഇത്തരം നേട്ടങ്ങള്‍ നല്‍കുന്നൊരു പോളിസിയാണ് എല്‍ഐസി ജീവന്‍ ആസാദ്. പരമ്പരാഗത ലൈഫ് ഇന്‍ഷൂറന്‍സ പ്ലാനായ ജീവന്‍ ആസാദില്‍ ലൈഫ് ഇന്‍ഷൂറനന്‍സും സമ്പാദ്യവും നികുതി ഇളവുകളും ലഭിക്കും. ഈ പദ്ധതിയുടെ വിശദാംശങ്ങൾ നോക്കാം.

എൽഐസി ജീവൻ ആസാദ്

എൽഐസി ജീവൻ ആസാദ് പോളിസി വിശദാംശങ്ങള്‍ പരിശോധിച്ചാല്‍ 2023 ജനുവരി 19 നാണ് ലൈഫ് ഇന്‍ഷൂറന്‍സ് കോര്‍പ്പറേഷന്‍ പോളിസി ആരംഭിച്ചത്. നോണ്‍ ലിങ്ക്ഡ്, നോണ്‍ പാര്‍ട്ടിസിപ്പേറ്റിംഗ്, വ്യക്തിഗത ലൈഫ് ഇന്‍ഷൂറന്‍സ് പ്ലാനാണിത്. പോളിസി കാലയളവില്‍ പോളിസി ഉടമയ്ക്ക് മരണം സംഭവിച്ചാല്‍ പോളിസി ഉടമയ്ക്ക് മരണാനുകൂല്യം ലഭിക്കും. കാലാവധി പൂര്‍ത്തിയാക്കുന്ന പോളിസി ഉടമയ്ക്ക് മെച്യൂരിറ്റി വാല്യു ലഭിക്കും.

പ്രായ പരിധി

പോളിസിയില്‍ ചേരാന്‍ 90 ദിവസം മുതല്‍ 50 വയസ് വരെ പ്രായമുള്ളവരെ അനുവദിക്കും. കാലാവധിയെത്തുമ്പോള്‍ കുറഞ്ഞത് 18 വയസും പരമാവധി 70 വയസും പൂര്‍ത്തിയാകണം. എല്‍ഐസി ജീവന്‍ ആസാദ് പോളിസിയുടെ ഏറ്റവും കുറഞ്ഞ സംഅഷ്വേഡ് 2 ലക്ഷം രൂപയാണ്. പോളിസിയുടെ പരമാവധി സം അഷ്വേഡ് തുക 5 ലക്ഷം രൂപയാണ്.

പോളിസിയുടെ കാലയളവിൽ പോളിസി ഉടമ മരണപ്പെട്ടാൽ നോമിനിക്ക് അടിസ്ഥാന സം അഷ്വേർഡ് ലഭിക്കും ഇത് പോളിസി വാങ്ങുമ്പോൾ അടച്ച വാർഷിക പ്രീമിയത്തിന്റെ ഏഴിരട്ടിയാണ്. 

പോളിസി കാലയളവ്

പോളിസി കാലയളവ് 15 മുതല്‍ 20 വര്‍ഷത്തിനുള്ളില്‍ തിരഞ്ഞെടുക്കാം. ലിമിറ്റഡ് പ്രീമിയം പ്ലാനായതിനാല്‍ പോളിസി കാലയളവിനേക്കാളും 8 വര്‍ഷം കുറച്ച് പ്രീമിയം അടച്ചാല്‍ മതിയാകും. അതായത്, 20 വര്‍ഷ പോളിസി വാങ്ങിയാല്‍ 12 വര്‍ഷം മാത്രമെ പ്രീമിയം അടയ്‌ക്കേണ്ടതുള്ളൂ. 15 വര്‍ഷ പോളിസിയില്‍ 7 വര്‍ഷവും 18 വര്‍ഷത്തെ പോളിസിക്ക് 10 വര്‍ഷവുമാണ് പ്രീമിയം അടയ്ക്കേണ്ടത്. മാസത്തിലോ ത്രൈമാസത്തിലോ അര്‍ധ വര്‍ഷത്തിലോ വര്‍ഷത്തിലോ പ്രീമിയം അടയ്ക്കാം. 

പോളിസി കാൽക്കുലേറ്റർ

എല്‍ഐസി ജീവന്‍ ആസാദ് പോളിസിയില്‍ 3 ലക്ഷം രൂപ സം അഷ്വേഡുള്ള പോളിസി വാങ്ങുന്ന വ്യക്തിക്ക് 20 വര്‍ഷം പോളിസി കാലയളവ് തീരുമാനിച്ചാലുള്ള ആനുകൂല്യങ്ങള്‍ നോക്കാം. പോളിസി ഉടമ 12 വര്‍ഷത്തെ പ്രീമിയം കാലയളവില്‍ എല്ലാ വര്‍ഷവും 25,120 രൂപ പ്രീമിയം അടയ്ക്കണം.

മാസത്തില്‍ അടയ്ക്കുമ്പോള്‍ 2,093 രൂപയാണ് പ്രീമിയം വരുന്നത്. 12 വര്‍ഷം മുടക്കാതെ അടച്ചാല്‍ ആകെ അടവ് 3,01440 രൂപ ആയിരിക്കും. മെച്യൂരിറ്റി കാലാവധിയില്‍ ലഭിക്കുന്ന തുക ഏകദേശം അഞ്ച് ലക്ഷം രൂപ ആയിരിക്കും. 

എങ്ങനെ പോളിസിയിൽ ചേരാം

എൽഐസി ജീവൻ ആസാദ് പോളിസി ഓൺലൈനായോ എൽഐസി ശാഖകൾ വഴിയോ വാങ്ങാം. എൽഐസിയുടെ വെബ്‌സൈറ്റായ www.licindia.in ൽ പ്രവേശിച്ച് ഓൺലൈൻ വഴി പോളിസി വാങ്ങാൻ സാധിക്കും.