100 വയസ് വരെ വരുമാനം ഉറപ്പ്; 36,000 രൂപ നേടാൻ മാസത്തിൽ 1,250 രൂപ നിക്ഷേപിക്കാൻ മടിയെന്തിന്

100 വയസ് വരെ വരുമാനം ലഭിക്കുന്നൊരു പദ്ധതി കണ്ടാൽ ആജീവനനാന്ത വരുമാനം എന്ന് തന്നെ പറയാം. ഇത്രയും കാലത്തേക്ക് വരുമാനം നൽകുന്ന ആന്യുറ്റി പദ്ധതികൾ എൽഐസി അവതരിപ്പിച്ചിട്ടുണ്ടെങ്കിലും മറ്റു പദ്ധതികളിൽ ഇത്തരത്തിലുള്ള ആനുകൂല്യം ലഭിക്കാറില്ല. ചെറിയ തുകയുടെ നിക്ഷേപത്തിൽ ഇത് സാധ്യമാക്കുന്ന പോളിസിയാണ് എൽഐസി ജീവൻ ഉമാം​ഗ്. പോളിസി കാലയളവിൽ നിക്ഷേപിക്കുന്ന തുകയിൽ നിന്ന് വരുമാനവും ഇൻഷൂറൻസ് പരിരക്ഷയും അടക്കം ഇരട്ട നേട്ടമാണ് പോളിസി നൽകുന്നത്. വിശദാംശങ്ങൾ നോക്കാം.

എൽഐസി ജീവൻ ഉമാം​ഗ് പ്ലാൻ

എൽഐസി അവതരിപ്പിച്ച സമ്പൂർണ ലൈഫ് ഇൻഷുറൻസ് പോളിസിയാണ് എൽഐസി ജീവൻ ഉമാംഗ് പ്ലാൻ. 100 വയസുവരെയുള്ള കവറേജാണ് പദ്ധതിയുടെ പ്രത്യേകത. പ്രീമിയം അടവ് പൂർത്തിയാകുന്നത് മുതൽ 100 വയസ് വരെ പോളിസിയിൽ നിന്ന് പ്രതിവർഷം വരുമാനം ലഭിക്കും. 100 വര്‍ഷത്തേക്കുള്ള കവറേജാണ് പോളിസി നല്‍കുന്നത്.

32 വയസില്‍ പോളിസിയില്‍ ചേരുന്നൊരാൾക്ക് 68 വർഷം വരെ കവറേജ് ലഭിക്കും. അതോടൊപ്പം സാധാരണ പോളിസികളിൽ ലഭിക്കുന്ന, ഇൻഷ്വർ ചെയ്ത വ്യക്തിയുടെ മരണ സമയത്ത് കുടുംബത്തിന് ലഭിക്കുന്ന സാമ്പത്തിക സഹായമായ മരണാനുകൂല്യം, കാലാവധി പൂർത്തിയാക്കുന്നവർക്ക് മെച്യൂരിറ്റി വാല്യു എന്നിവ പോളിസിയിൽ നിന്ന് ലഭിക്കും.

ആർക്കൊക്കെ പദ്ധതിയിൽ ചേരാം

ജീവൻ ഉമാം​ഗ് പോളിസി ചേരാനുള്ള യോ​ഗ്യത പരിശോധിച്ചാൽ പ്രായ പരിധി 90 ദിവസം പ്രായമുള്ള കുട്ടി മുതല്‍ 55 വയസ് വരെയാണ്. 2 ലക്ഷമാണ് പോളിസിയിൽ തിരഞ്ഞെടുക്കാവുന്ന ഏറ്റവും കുറഞ്ഞ സം അഷ്വേഡ് തുക. ഉയർന്ന സം അഷ്വേഡ് തുകയ്ക്ക് പരിധിയില്ല. ചുരുങ്ങിയ പോളിസി കാലയളവ് 15 വർഷമാണ്.

20 വർഷം, 25 വർഷം, 30 വ​ർഷം എന്നിങ്ങനെ വിവിധ കാലാവധിയിൽ പ്രീമിയം അടയ്ക്കാൻ സാധിക്കും. മാസത്തിലോ ത്രൈമാസത്തിലോ അര്‍ധ വര്‍ഷത്തിലോ പോളിസിയിൽ പ്രീമിയം അടയ്ക്കാം. കുട്ടികളുടെ പേരിലാണ് പോളിസിയിൽ ചേരുന്നതെങ്കിൽ വരുമാനം ലഭിക്കാൻ 30 വയസ് പൂര്‍ത്തിയാകണം. 3 വർഷത്തിന് ശേഷം പോളിസി സറണ്ടർ ചെയ്യാൻ സാധിക്കും.

പോളിസിയുടെ രീതി ഇങ്ങനെ

100 വര്‍ഷത്തേക്കുള്ള കവറേജാണ് എൽഐസി ജീവൻ ഉമാം​ഗ് പോളിസി നല്‍കുന്നത്. 32 വയസില്‍ പോളിസിയില്‍ ചേരുന്നൊരാൾക്ക് 68 വർഷത്തേക്ക് വരെ കവറേജ് ലഭിക്കും. പോളിസി തിരഞ്ഞെടുക്കുന്ന വ്യക്തി പ്രീമിയം കൃത്യമായി അടച്ച് പ്രീമിയം പൂർത്തിയാക്കിയാൽ തൊട്ടടുത്ത വർഷം മുതൽ വരുമാനം ലഭിക്കും. സം അഷ്വേഡ് തുകയുടെ 8 ശതമാനം നിരക്കിലാണ് മെച്യൂരിറ്റി ബെനഫിറ്റ് നൽകുന്നത്. 32 വയസിൽ 30 വർഷ പോളിസിയെടുത്താൽ 62-ാം വയസ് മുതൽ വരുമാനം ലഭിക്കും.

പോളിസി കാൽക്കുലേറ്റർ

30 വയസുകാരന്‍ 4.50 ലക്ഷം രൂപ അഷ്വേഡ് തുകയ്ക്ക് ജീവൻ ഉമാം​ഗ് പോളിസി വാങ്ങിയാൽ, 30 വര്‍ഷ പോളിസി കാലയളവാണെങ്കിൽ വാര്‍ഷിക പ്രീമിയം 14,770 രൂപ വരും. മാസത്തിലാണെങ്കില്‍ 1,256 രൂപ വീതം അടയ്ക്കണം. 30 വര്‍ഷമാണ് പ്രീമിയം അടയ്‌ക്കേണ്ടത്. 30-ാം വർഷത്തിൽ 60-ാം വയസില്‍ പ്രീമിയം കാലാവധി പൂർത്തിയാകും. ശേഷം 100 വയസ് വരെ വരുമാനം ലഭിക്കും.

പോളിസിയുടെ ചട്ടം പ്രകാരം സം അഷ്വേഡ് തുകയുടെ 8 ശതമാനം പ്രീമിയം അടവ് കാലാവധിക്ക് ശേഷം ലഭിക്കും. ഇവിടെ 4.5 ലക്ഷത്തിന്റെ 8 ശതമാനമായി 36,000 രൂപ 100 വയസ് വരെ പോളിസി ഉടമയ്ക്ക് ലഭിക്കും.