ഒറ്റത്തവണ അടവിൽ ജീവിതം സേഫ് ആക്കാം; മരണം വരെ 7,000 രൂപ മാസ വരുമാനം; പദ്ധതിക്ക് സർക്കാർ ​ഗ്യാരണ്ടി

മികച്ച രീതിയില്‍ ജീവിതം മുന്നോട്ട് കൊണ്ടുപോകുന്നതിന് അതിനൊത്ത ചെലവുകളുമുണ്ട്. ശമ്പളം മാത്രം വരുമാനമായി കണ്ട് ഇത്തരത്തിൽ ജീവിക്കുക ബുദ്ധിമുട്ടുള്ള കാര്യമാണ്. ഇതിനാൽ തന്നെ രണ്ടാമതൊരു വരുമാന മാര്‍ഗത്തെ പറ്റി എല്ലാവരും ചിന്തിക്കും. നിക്ഷേപത്തിലൂടെ മാസ വരുമാനമുണ്ടാക്കുക എന്നത് മികച്ച മാര്‍ഗമാണ്. ഇതിന് പല സാധ്യതകളും ഇന്നുണ്ട്.

പോസ്റ്റ് ഓഫീസ് മാസ വരുമാന പദ്ധതികളും സ്ഥിര നിക്ഷേപളില്‍ നിന്ന് മാസ വരുമാനം കണ്ടെത്തുകയെന്നതും ഉപയോ​ഗപ്പെടുത്താം. എന്നാൽ നിശ്ചിത കാലത്തേക്ക് മാത്രമുള്ളതാണ് ഈ നിക്ഷേപങ്ങളിൽ നിന്നുള്ള വരുമാനം. എന്നാല്‍ ജീവിത കാലം മുഴുവന്‍ മാസ വരുമാനം നേടിത്തരുന്നൊരു നിക്ഷേപ മാര്‍ഗമാണ് എൽഐസിയുടെ സരൾ പെൻഷൻ പ്ലാൻ. പദ്ധതിൽ ചേരുന്നൊരാൾക്ക് തൊട്ടടുത്ത മാസം മുതൽ വരുമാനം ഉറപ്പാക്കുന്ന പദ്ധതിയാണിത്.

സരൾ പെൻഷൻ പദ്ധതി

40 വയസ് മുതല്‍ 80 വയസ് പ്രായമുള്ളവര്‍ക്ക് ചേരാവുന്ന പെന്‍ഷന്‍ പദ്ധതിയാണ് സരൾ പെൻഷൻ പദ്ധതി. ഒരു സിംഗില്‍ പ്രീമിയം പെന്‍ഷന്‍ പ്ലാനാണിത്. ഒറ്റ പ്രീമിയം അടവിലൂടെ ജീവിത കാലം മുഴുവന്‍ പെന്‍ഷന്‍ നേടാൻ സാധിക്കും. പോളിസി ആരംഭിച്ചത് മുതല്‍ മാസ വരുമാനം ലഭിക്കുമെന്നതാണ് മറ്റൊരു ​ഗുണം.

മാസത്തിലോ ത്രൈമാസത്തിലോ അര്‍ധ വര്‍ഷത്തിലോ വര്‍ഷത്തിലോ തുക അക്കൗണ്ടിലെത്തും. പദ്ധതിയിൽ നിന്ന് ലഭിക്കുന്ന ഏറ്റവും ചുരുങ്ങിയ മാസ വരുമാനം 1,000 രൂപയാണ്. സിം​ഗിൽ ആന്യുറ്റി, ജോയിന്റ് ആന്യുറ്റി എന്നിങ്ങനെ 2 തരത്തിൽ മാസ വരുമാനം തിരഞ്ഞെടുക്കാം. 

സിംഗില്‍ ആന്വുറ്റി പ്ലാന്‍ ഒരാൾക്ക് മാത്രമാണ് പോളിസിയുടെ ​ഗുണം ലഭിക്കുക. പോളിസി ഉടമയ്ക്ക് ജീവിതകാലം മുഴുവന്‍ പെന്‍ഷന്‍ ലഭിക്കുകയും മരണ ശേഷം പ്രീമിയം തുക പോളിസി ഉടമയുടെ നോമിനിക്ക് തിരികെ ലഭിക്കുകയും ചെയ്യും.

ജോയിന്റ് ലൈഫ് ആന്വുറ്റി പ്ലാനില്‍ പോളിസി ഉടയമക്കൊപ്പം പങ്കാളിക്കും മാസ വരുമാനം ലഭിക്കും. പോളിസി ഉടമയുടെ മരണ ശേഷമാണ് പങ്കാളിക്ക് മാസ വരുമാനം ലഭിക്കുക. രണ്ടു പേരുടെയും മരണ ശേഷം അടച്ച തുക നോമിനിക്ക് തിരികെ നല്‍കും. 

മാസം വരുമാനം കണ്ടെത്താം

ജീവിത കാലം മുഴുവൻ മാസ വരുമാനം കണ്ടെത്താനുള്ളൊരു മാർ​ഗമാണ് സരൾ പെൻഷൻ പോളിസി. പോളിസി ഉടമയുടെ പ്രായത്തെയും ആവശ്യമായ പെൻഷനെയും തിരഞ്ഞെടുക്കുന്ന ആന്യുറ്റി പ്ലാനിനെയും അടിസ്ഥാനമാക്കിയാണ് പ്രീമിയം തീരുമാക്കിക്കുന്നത്. കുറഞ്ഞത് 2 ലക്ഷത്തിന് മുകളിലുള്ള തുകയ്ക്ക് പോളിസി വാങ്ങണം. എന്നാൽ പരമാവധി നിക്ഷേപിക്കാവുന്ന തുകയ്ക്ക് പരിധിയില്ല. 

47 വയസുകാരൻ സരൾ പെൻഷൻ പോളിസിയിൽ 15 ലക്ഷം രൂപ സിം​ഗിൽ ആന്യുറ്റി രീതിയിൽ നിക്ഷേപിച്ചാൽ വർഷത്തിൽ ലഭിക്കുന്ന പെൻഷൻ 86,925 രൂപയാണ്. മാസത്തിൽ തുക സ്വീകരിക്കുന്നൊരാൾക്ക് 7,000 രൂപ ലഭിക്കും.

42 വയസുകാരന്‍ 3 ലക്ഷം രൂപ സിം​ഗിൽ ആന്യുറ്റി പ്ലാനിൽ നിക്ഷേപിച്ചാല്‍ വര്‍ഷത്തില്‍ 14,790 രൂപ ലഭിക്കും. മാസത്തിൽ 1,232 രൂപയാണ് ലഭിക്കുക. 42 കാരൻ 30 ലക്ഷം സരൾ പെൻഷൻ പ്ലാനിൽ നിക്ഷേപിച്ചാൽ മാസത്തിൽ 12,388 രൂപ ലഭിക്കും. 

പോളിസിയിൽ നിന്ന് ഒഴിയാം

സരൾ പെൻഷൻ പോളിസിയുമായി മുന്നോട്ട് പോകാൻ സാധിക്കാത്തവരാണെങ്കിൽ 15 ദിവസത്തിനകം പോളിസി തിരികെ നൽകാനുള്ള സൗകര്യമുണ്ട്. ഓൺലൈനായി വാങ്ങിയ പോളിസിയിൽ 30 ദിവസം സമയം നൽകുന്നു. അടച്ച പ്രീമിയം തുക സ്റ്റാമ്പ് ഡ്യൂട്ടിയും ആന്വിറ്റി ലഭിച്ചിട്ടുണ്ടെങ്കിൽ അതും കിഴിച്ചാണ് ലഭിക്കുക.

പോളിസിയില്‍ ചേര്‍ന്ന് ആറു മാസത്തിന് ശേഷം പോളിസി ഉടമയ്ക്ക വായ്പ ലഭിക്കും. ആറു മാസത്തിന് ശേഷം പോളിസി സറണ്ടര്‍ ചെയ്യാന്‍ സാധിക്കും. പോളിസി സറണ്ടര്‍ ചെയ്യേണ്ടി വന്നാല്‍ വാങ്ങല്‍ വിലയുടെ 95 ശതമാനം തിരികെ ലഭിക്കും.