എൽഐസി മുതൽ എസ്ബിഐ വരെ; പ്രതിമാസം നല്ലൊരു തുക പെൻഷൻ നേടാൻ ഏത് ആന്യുറ്റി പ്ലാൻ വാങ്ങണം

വിരമിക്കൽ കാലത്ത് മാസ വരുമാനത്തിനായി മികച്ച പെൻഷൻ പദ്ധതികളെയാണ് പലരും ആ​ശ്രയിക്കുക. സുരക്ഷിതമായി, മാന്യമായ പെൻഷൻ ലഭിക്കാൻ സഹായിക്കും എന്നത് തന്നെയാണ് കാരണം. പലതരം പെൻഷൻ പദ്ധതികളുണ്ടെങ്കിലും ഭൂരിഭാഗവും ആന്യുറ്റി പ്ലാനുകളെ അടിസ്ഥാനമാക്കിയാണ്. പെന്‍ഷന്‍ ആവശ്യമുള്ളവര്‍ ഒറ്റത്തവണ നിക്ഷേപം നടത്തി ഇന്‍ഷൂറന്‍സ് കമ്പനികളില്‍ നിന്ന് ആന്യുറ്റി പ്ലാനുകള്‍ വാങ്ങേണ്ടതുണ്ട്.

നിലവിൽ 12 ഇൻഷൂറൻസ് സ്ഥാപനങ്ങളാണ് ആന്യുറ്റി പ്ലാനുകൾ നൽകുന്നത്. 2023 ജനുവരിയിൽ പെന്‍ഷന്‍ ഫണ്ട് റെഗുേറ്ററി ആന്‍ഡ് ഡെവലപ്മെന്റ് അതോറിറ്റിയുടെ പെന്‍ഷന്‍ ബുള്ളറ്റില്‍ പ്രകാരം 5.44 ശതമാനം മുതല്‍ 9.24 ശതമാനം വരെ ആന്യുറ്റി നിരക്കാണ് ഇന്‍ഷൂറന്‍സ് സ്ഥാപനങ്ങള്‍ അനുവദിക്കുന്നത്. പെൻഷൻ പദ്ധതി തിരഞ്ഞെടുക്കുകയാണെങ്കിൽ ആന്യുറ്റി നിരക്ക് പ്രധാന പരി​ഗണനാ വിഷയമാണ്. 

ആന്യുറ്റി കാൽക്കുലേറ്റർ

കാലാവധിക്ക് ശേഷം ആന്യുറ്റി വാങ്ങിയ വില തിരികെ ലഭിക്കുന്ന റിട്ടേൺ ഓഫ് പർച്ചേസ് പ്രൈസ് പ്ലാനും ആന്യുറ്റി തുക തിരികെ ലഭിക്കാത്ത വിത്ത് ഔട്ട് റിട്ടേൺ ഓഫ് പർച്ചേസ് പ്രൈസ് പ്ലാനുമാണ് ലഭിക്കുക.

ഇതിൽ വ്യക്തി​ഗത പെൻഷൻ ലഭിക്കുന്ന സിം​ഗിൾ ആന്യുിറ്റിയും കുടുംബാം​ഗങ്ങൾക്ക് പെൻഷൻ ലഭിക്കുന്ന ജോയിന്റ് ലൈഫ് ആന്യുറ്റി പ്ലാനും ഉണ്ട്. ഇതിന് കീഴിൽ വിവിധ സ്ഥാപനങ്ങൾ നൽകുന്ന ആന്യുറ്റി നിരക്കുകളും 1 കോടി നിക്ഷേപിച്ചാൽ ലഭിക്കുന്ന പ്രതിമാസ വരുമാനവും പരിശോധിക്കാം. 

എസ്ബിഐ ലൈഫ് ഇൻഷൂറൻസ്

എസ്ബിഐ ലൈഫ് ഇൻഷൂറൻസിൽ നിന്ന് വിത്ത്ഔട്ട് റിട്ടേൺ ഓഫ് പർച്ചേസ് പ്ലാനിന് കീഴിൽ ആന്യുറ്റി ഫോർ ലൈഫ് സ്കീമിൽ 1 കോടി രൂപ നിക്ഷേപിച്ചാൽ 8.41 ശതമാനമാണ് ആന്യുറ്റി നിരക്ക്. നിക്ഷേപകന് പ്രതിമാസം 70,086 രൂപ പെൻഷൻ നേടാം. റിട്ടേണ്‍ ഓഫ് പര്‍ച്ചേസ് പ്രൈസ് പ്ലാനിൽ 7.13 ശതമാനമാണ് ആന്യുറ്റി നിരക്ക്. പ്രതിമാസം 59,452 രൂപ പെൻഷൻ ലഭിക്കും.

ലൈഫ് ഇൻഷൂറൻസ് കോർപ്പറേഷൻ

എൽഐസിയിൽ ലഭിക്കുന്ന ഉയർന്ന ആന്യുറ്റി നിരക്ക് 8.40 ശതമാനമാണ്. ആന്യുറ്റി ഫോർ ലൈഫ് വിത്ത് ഔട്ട് ഓഫ് പര്‍ച്ചേസ് പ്രൈസ് പ്ലാനിനാണ് ഈ നിരക്ക് ലഭിക്കുന്നത്. 1 കോടി രൂപയുടെ ഒറ്റത്തവണ പര്‍ച്ചേസ് വിലയ്ക്ക് ആന്യുറ്റി വാങ്ങുന്ന വ്യക്തിക്ക് 69,960 രൂപ വരെ പ്രതിമാസ പെന്‍ഷന്‍ ലഭിക്കും. ആന്യുറ്റി ഫോർ ലൈഫ് വിത്ത് പര്‍ച്ചേസ് പ്രൈസ് പ്ലാനിൽ 6.04 ശതമാനമാണ് എൽഐസി നൽകുന്ന ആന്യുറ്റി നിരക്ക്.

ഈ പ്ലാനിൽ 1 കോടി നിക്ഷേപിക്കുന്നവർക്ക് 50,325 രൂപ വരെ ലഭിക്കും. ജോയിന്റ് ആന്യുറ്റി പ്ലാനാണെങ്കിൽ 6.03 ശതമാനം ആന്യുറ്റി നിരക്കില്‍ പ്രതിമാസം 50,240 രൂപ വരെയും പെൻഷൻ നേടാം. 

ശ്രീറാം ലൈഫ് ഇൻഷൂറൻസ്

മറ്റു ഇൻഷൂറൻസ് സ്ഥാപനങ്ങളെ അപേക്ഷിച്ച് ശ്രീറാം ലൈഫ് ഇൻഷൂറനസ് 9.24 ശതമാനം ആന്യുറ്റി നിരക്ക് നൽകുന്നു. ആന്യുറ്റി ഫോർ ലൈഫ് വിത്ത് ഔട്ട് ഓഫ് പര്‍ച്ചേസ് പ്രൈസ് പ്ലാനിലാണ് ഈ നിരക്ക് ലഭിക്കുന്നത്.

1 കോടി രൂപയ്ക്ക് ആന്യുറ്റി പ്ലാൻ വാങ്ങുന്നൊരാൾക്ക് പ്രതിമാസം 77,028 രൂപ വരെ പെൻഷൻ നേടാൻ സാധിക്കും. ആന്യുറ്റി ഫോർ ലൈഫ് വിത്ത് പര്‍ച്ചേസ് പ്രൈസ് പ്ലാനിലാണെങ്കിൽ 7 ശതമാനമാണ് ആന്യുറ്റി നിരക്ക്. 58,359 രൂപ പ്രതിമാസം ലഭിക്കും. 

മറ്റു നിരക്കുകൾ

വിവിധ ഇൻഷൂറൻസ് കമ്പനികളുടെ ആന്യുറ്റി ഫോർ ലൈഫ് വിത്ത് ഔട്ട് ഓഫ് പര്‍ച്ചേസ് പ്രൈസ് പ്ലാനിൽ ലഭിക്കുന്ന ആന്യുറ്റി നിരക്കും 1 കോടി നിക്ഷേപിച്ചാലുള്ള പെൻഷനും നോക്കാം.

*ആദിത്യ ബിര്‍ള സണ്‍ലൈഫ് ഇന്‍ഷൂറന്‍സ്- ആന്യുറ്റി നിരക്ക് 8.38%, പ്രതിമാസ പെന്‍ഷന്‍- 67,056 രൂപ

* ബജാജ് അലിയന്‍സ് ലൈഫ് ഇന്‍ഷൂറന്‍സ്- 8.18%- 68128 രൂപ.

* എച്ച്ഡിഎഫ്‌സി ലൈഫ് ഇന്‍ഷൂറന്‍സ് 8.78%- 73,200 രൂപ

* ഐസിഐസിഐ പ്രുഡന്‍ഷ്യല്‍ ലൈഫ് ഇന്‍ഷൂറന്‍സ്-7.42%- 61,868 രൂപ.