വൻ ഡിമാന്റ്; 15 ദിവസത്തിനിടെ വിറ്റത് 50,000 പോളിസികൾ; എൽഐസിയുടെ പുതിയ പോളിസി ഹിറ്റാകാൻ കാരണമിതാ

ലൈഫ് ഇന്‍ഷൂറന്‍സ് കോര്‍പ്പറേഷന്‍ ജനുവരി മാസത്തില്‍ അവതരിപ്പിച്ച പോളിസിയായ ജീവന്‍ ആസാദിന് വന്‍ ഡിമാന്റ്. പോളിസി ആരംഭിച്ച് 15 ദിവസത്തിനിടെ 50,000 പ്ലാനുകളാണ് എല്‍ഐസി വില്പന നടത്തിയത്. സമ്പാദ്യത്തിന് കൂടി പ്രാധാന്യം നല്‍കുന്നൊരു ലൈഫ് ഇന്‍ഷൂറന്‍സ് പോളിസിയാണിത്.

കാലാവധി പൂര്‍ത്തിയാക്കുന്ന പോളിസി ഉടമയ്ക്ക് മെച്യൂരിറ്റി ബെനഫിറ്റ് ലഭിക്കുന്ന പോളിസിയാണിത്. പോളിസി കാലയളവിനേക്കാള്‍ 8 വര്‍ഷം കുറച്ചാണ് പ്രീമിയം അടയ്‌ക്കേണ്ടത്. ഇതിനാല്‍ തന്നെ കുറഞ്ഞ പ്രീമിയം അടവില്‍ നല്ല തുക സമ്പാദിക്കാന്‍ സാധിക്കുന്നൊരു പോളിസിയാണിത്. പദ്ധതിയുടെ കൂടുതല്‍ വിശദാംശങ്ങള്‍ നോക്കാം.

എൽഐസി ജീവൻ ആസാദ് പോളിസി

നോൺ-ലിങ്ക്ഡ്, ലിമിറ്റഡ് പ്രീമിയം, എൻഡൗമെന്റ് പ്ലാൻ വിഭാ​ഗത്തിൽ ഉൾപ്പെടുന്നൊരു പോളിസിയാണ് എൽഐസി ജീവൻ ആസാദ്. സമ്പാദ്യവും ലൈഫ് ഇന്‍ഷൂറന്‍സും ഈ പോളിസിയിലൂടെ നേടാൻ സാധിക്കും. എന്‍ഡൗമെന്റ് പോളിസിയായതിനാല്‍ കാലാവധിക്ക് ശേഷം പോളിസി ഉടമയ്ക്ക് പണം തിരികെ ലഭിക്കും. പോളിസി കാലയളവിൽ ഉടമ മരണപ്പെടുകയാണെങ്കിൽ നോമിനിക്ക് മരണാനുകൂല്യവും ലഭിക്കും. 

പോളിസി വിശദാംശങ്ങൾ

2 ലക്ഷം രൂപയാണ് പോളിസിയുടെ കുറഞ്ഞ സം അഷ്വേഡ് തുക. പരമാവധി സം അഷ്വേഡ് തുക 5 ലക്ഷം രൂപയാണ്. പോളിസി കാലയളവ് 15 മുതല്‍ 20 വര്‍ഷത്തിനുള്ളിൽ തിരഞ്ഞെടുക്കാം. പോളിസി കാലാവധിയേക്കാള്‍ 8 വര്‍ഷം കുറച്ച് പ്രീമിയം അടച്ചാല്‍ മതിയാകും.

18 വര്‍ഷത്തെ പോളിസി ചേര്‍ന്നൊരാള്‍ 10 വര്‍ഷമാണ് പ്രീമിയം അടയ്‌ക്കേണ്ടത്. മാസത്തിലോ ത്രൈമാസത്തിലോ അർധ വർഷത്തിലോ എല്‍ഐസി ജീവന്‍ ആസാദ് പോളിസിയില്‍ ചേരാനുള്ള കുറഞ്ഞ പ്രായ പരിധി 90 ദിവസമാണ്. 50 വയസുവരെ പോളിസിയില്‍ ചേരാം. 

മെച്യൂരിറ്റി ബെനഫിറ്റും മരണാനുകൂല്യവും

15 മുതല്‍ 20 വര്‍ഷം വരെ കാലാവധിയിൽ പോളിസി വാങ്ങാം. കുറഞ്ഞ സം അഷ്വേര്‍ഡ് 2 ലക്ഷം രൂപയും പരമാവധി സം അഷ്വേര്‍ഡ് 5 ലക്ഷം രൂപയുമാണ്. 30 വയസുള്ള വ്യക്തി 18 വർഷ പോളിസി വാങ്ങിയാൽ 10 വര്‍ഷത്തേക്കുള്ള വാർഷിക പ്രീമിയം 12,083 രൂപയാണ്.

കാലാവധിയോളം അടയ്ക്കേണ്ട തുക 1,20,830 രൂപയാണ്. ഇതുപ്രകാരം മെച്യൂരിറ്റി കാലയളവായ 18 വര്‍ഷത്തിന് ശേഷം ഏകദോശം 2 ലക്ഷം രൂപയാകും മെച്യൂരിറ്റി ബെനഫിറ്റായി ലഭിക്കുക. ഇവിടെ 4- 5 ശതമാനം പലിശ ലഭിക്കും. 

എൽഐസി ജീവൻ ആസാദ് പോളിസയിൽ 3 ലക്ഷം രൂപ സം അഷ്വേഡുള്ള പോളിസി വാങ്ങുന്ന വ്യക്തിക്ക് 20 വർഷം പോളിസി കാലയളവ് തീരുമാനിച്ചാലുള്ള ആനുകൂല്യങ്ങൾ നോക്കാം. പോളിസി ഉടമ 12 വർഷത്തെ പ്രീമിയം കാലയളവിൽ എല്ലാ വർഷവും 25,120 രൂപ പ്രീമിയം അടയ്ക്കണം.

മാസത്തിൽ അടയ്ക്കുമ്പോൾ 2,093 രൂപയാണ് പ്രീമിയം വരുന്നത്. 12 വർഷം മുടക്കാതെ അടച്ചാൽ ആകെ അടവ് 3,01440 രൂപ ആയിരിക്കും. മെച്യൂരിറ്റി കാലാവധിയിൽ ലഭിക്കുന്ന തുക ഏകദേശം അഞ്ച് ലക്ഷം രൂപ ആയിരിക്കും. പോളിസി ഉടമ മരണപ്പെട്ടാല്‍, മരണാനുകൂല്യം ബേസിക് സം അഷ്വേര്‍ഡോ, അല്ലെങ്കില്‍ വാര്‍ഷിക പ്രീമിയത്തിന്റെ ഏഴിരട്ടിയോ ആയിരിക്കും. മരണാനുകൂല്യം അടച്ച പ്രീമിയങ്ങളുടെ 105 ശതമാനത്തില്‍ താഴെയാകില്ല.