ലോഞ്ച് ആക്സസ് സൗകര്യം വരെ നൽകുന്ന സൗജന്യ ക്രെഡിറ്റ് കാർഡുകൾ; 4 എണ്ണം പരിചയപ്പെടാം

ക്രെഡിറ്റ് കാർഡിനെ പറ്റി പഠിക്കുന്ന തുടക്കകാരായ വ്യക്തികൾ വലിയ തുക ജോയനിം​ഗ് ഫീസും ഉയർന്ന വാർഷിക വരിസംഖ്യയുമുള്ള ക്രെ‍ഡിറ്റ് കാർഡുകൾ ഉപയോ​ഗിക്കുമ്പോൾ കാര്യമായ ലാഭം ക്രെ‍ഡിറ്റ് കാർഡിൽ നിന്ന് ലഭിക്കാൻ സാധ്യത കുറവാണ്. ക്രെ‍ഡിറ്റ് കാർഡ് രീതികളെ പറ്റി പഠിച്ച് കൂടുതൽ ഇടപാടുകൾ നടത്തുമ്പോൾ പ്രീമിയം കാർഡുകൾ തിരഞ്ഞെടുക്കുന്നതാകും ഉചിതം.

ഇവിടെ തുടക്കകാർക്ക് ആജീവനാന്ത സൗജന്യ ക്രെഡിറ്റ് കാർഡുകൾ തിരയാം. വാർഷിക ഫീസ് ഈടാക്കാത്ത ക്രെഡിറ്റ് കാർഡുകളെയാണ് ആജീവനനാന്ത സൗജന്യ ക്രെഡിറ്റ് കാർഡുകൾ. മികച്ച നേട്ടങ്ങൾ നൽകുന്ന സൗജന്യ ക്രെ‍ഡിറ്റ് കാർഡുകൾ നോക്കാം.

ഐഡിഎഫ്‌സി ഫസ്റ്റ് സെലക്ട് ക്രെഡിറ്റ് കാർഡ്

ഐഡിഎഫ്‌സി ഫസ്റ്റ് ബാങ്കിന്റെ ഐഡിഎഫ്സി ഫസ്റ്റ് സെലക്ട് ക്രെഡിറ്റ് കാർഡ് വാർഷിക, ജോയനിം​ഗ് ഫീസില്ലാതെ പ്രീമിയം ക്രെഡിറ്റ് കാർഡാണ്. ലക്ഷ്വറി സൗകര്യങ്ങൾ ലഭിക്കുന്ന സൗജന്യ ക്രെഡിറ്റ് കാർഡാണിത്. കാർഡ് ആക്ടിവേറ്റ് ചെയ്ത് 90 ദിവസത്തിനുള്ളിൽ 15,000 രൂപ ചെലവഴിച്ചാൽ 500 രൂപയുടെ വൗച്ചർ ലഭിക്കും.

90 ദിവസത്തിനുള്ളിൽ കാർഡ് ഉപയോ​ഗിച്ച് നടത്തുന്ന ആദ്യ ഇഎംഐ ഇടപാടിന് 5 ശതമാനം, പരമാവധി 1,000 രൂപ വരെ ക്യാഷ് ബാക്ക് ലഭിക്കും. ഓരോ പാദത്തിലും 4 സൗജന്യ ആഭ്യന്തര എയർപോർട്ട് ലോഞ്ച് ആക്സസും, 4 സൗജന്യ റെയിൽവേ ലോഞ്ച് ആക്സസും ലഭിക്കും.   

റിവാർഡ് പോയിന്റ്

ഓൺലൈനായി ചെലവഴിക്കുന്ന ഓരോ 150 രൂപയ്ക്കും 6 റിവാർഡ് പോയിന്റുകളും ഓഫ്‌ലൈനിനായി 20,000 രൂപയിൽ താഴെ ചെലവഴിക്കുന്ന ഓരോ 150 രൂപയ്ക്കും 3 റിവാർഡ് പോയിന്റുകളും ലഭിക്കും. 1 റിവാർഡ് പോയിന്റ് 0.25 രൂപയ്ക്ക് തുല്യമാണ്. റിവാർഡ് പോയിന്റുകൾക്ക് ഉയർന്ന പരിധിയില്ല. 

ഐഡിഎഫ്സി ഫസ്റ്റ് ബാങ്ക് മില്യേനിയ ക്രെഡിറ്റ് കാർഡ്

ഐഡിഎഫ്സി ബാങ്കിന്റെ തന്നെ മറ്റൊരു സൗജന്യ ക്രെഡിറ്റ് കാർഡാണ് ഐഡിഎഫ്സി ഫസ്റ്റ് ബാങ്ക് മില്യേനിയ ക്രെഡിറ്റ് കാർഡ്. ഷോപ്പിം​ഗുകൾക്ക് ക്യാഷ് ബാക്കും 48 ദിവസത്തെ പലിശ രഹിത കാലയളും കാർഡ് നൽകുന്നു. കാർഡ് ആക്ടിവേറ്റ് ചെയ്ത് 90 ദിവസത്തിനുള്ളിൽ 15,000 രൂപ ചെലവഴിച്ചാൽ 500 രൂപയുടെ വൗച്ചർ ലഭിക്കും.

റിവാർഡ് പോയിന്റ്

ഓൺലൈനായി ചെലവഴിക്കുന്ന ഓരോ 150 രൂപയ്ക്കും 6 റിവാർഡ് പോയിന്റുകളും ഓഫ്‌ലൈനിനായി 20,000 രൂപയിൽ താഴെ ചെലവഴിക്കുന്ന ഓരോ 150 രൂപയ്ക്കും 3 റിവാർഡ് പോയിന്റുകളും ലഭിക്കും. 1 റിവാർഡ് പോയിന്റ് 0.25 രൂപയ്ക്ക് തുല്യമാണ്. റിവാർഡ് പോയിന്റുകൾക്ക് ഉയർന്ന പരിധിയില്ല. റിവാർഡ് പോയിന്റുകൾ വീണ്ടെടുക്കുന്നതിന് 99 രൂപയും ജിഎസ്ടിയും അടക്കമുള്ള കൺവീനിയൻസ് ഫീസ് ഈടാക്കും. 

ധനലക്ഷ്മി ബാങ്ക് പ്ലാറ്റിനം ക്രെഡിറ്റ് കാർഡ്

തുടക്കക്കാർക്കുള്ള ഏറ്റവും മികച്ച ക്രെഡിറ്റ് കാർഡുകളിലൊന്നായി ധനലക്ഷ്മി ബാങ്ക് പ്ലാറ്റിനം ക്രെ‍ഡിറ്റ് കാർഡിനെ പരി​ഗണിക്കാം. സൂപ്പർമാർക്കറ്റുകളിലും ഡിപ്പാർട്ട്‌മെന്റൽ സ്റ്റോറുകളിലും പർച്ചേസിന് ഉപയോ​ഗിച്ച് ക്യാഷ്ബാക്ക് നേടാൻ സഹായിക്കുന്നു. സൂപ്പർമാർക്കറ്റുകൾ, ഡിപ്പാർട്ട്‌മെന്റൽ സ്റ്റോർ എന്നിവിടങ്ങളിലെ വാങ്ങലുകൾക്ക് 5 ശതമാനമാണ് ക്യാഷ് ബാക്ക്. 1 ലക്ഷം രൂപ വരെയുള്ള ക്രെഡിറ്റ് ഷീൽഡ് കവർ, 1 ലക്ഷത്തിന്റെ പർച്ചേസ് പ്രൊട്ടക്ഷൻ, 2 ലക്ഷം രൂപ വരെ എയർ ആക്സിഡന്റ് ഇൻഷുറൻസ് എന്നിവയും ലഭിക്കും. 

ആമസോൺ പേ ഐസിഐസിഐ ക്രെഡിറ്റ് കാർഡ്

ആമസോണിന്റെ കോ ബ്രാൻഡഡ് ക്രെഡിറ്റ് കാർഡാണ് ആമസോൺ പേ ഐസിഐസിഐ ക്രെഡിറ്റ് കാർഡ്. ആമസോൺ ഷോപ്പിം​ഗ് ചെയ്യുന്നവർക്കും ആമസോൺ പ്രൈം ഉപയോ​ഗിക്കുന്നവർക്കും ഉപകാരപ്പെടും. ആജീവനാന്ത സൗജന്യ കാർഡായതിനാൽ വാർഷിക നിരക്കുകളൊന്നും ഈടാക്കില്ല. ക്യാഷ്ബാക്കാണ് മുഖ്യ ആകർഷണം.

ക്യാഷ്ബാക്ക്

ആമസോൺ പ്രൈം അംഗങ്ങൾക്ക് ആമസോണിന്റെ വെബ്‌സൈറ്റിൽ നിന്ന് വാങ്ങുന്ന ഏതൊരു പർച്ചേസിനും ആമസോൺ പേ ബാലൻസ് രൂപത്തിൽ 5 ശതമാനം ക്യാഷ്ബാക്ക് ലഭിക്കും. ആമസോൺ പ്രൈം അം​ഗങ്ങളല്ലാത്തവർക്ക് 3 ശതമാനം ക്യാഷ്ബാക്ക് ലഭിക്കും. ആമസോൺ പേ സഹകരിക്കുന്നിടത്ത് നിന്നുള്ള വാങ്ങലുകൾക്ക് വിലയുടെ 2 ശതമാനം ആമസോൺ പേ ബാലൻസ് പോയിന്റുകൾ ലഭിക്കും. 1 ശതമാനം ഇന്ധന സർചാർജ് ഒഴിവാക്കലും കാർഡിൽ ലഭിക്കും.