എൽഐസി പോളിസി ഉപയോഗിച്ച് ലോൺ; കൂടുതൽ അറിയാം

വിവിധ തരത്തിലുള്ള വായ്പകൾ പ്രയോജനപ്പെടുത്തുന്നവരാണ് നമ്മൾ. അത്യാവശ്യ ഘട്ടങ്ങളിൽ പലപ്പോഴും ഈട് നൽകി വായ്പയെടുത്ത് കാര്യം നടത്തുകയാണ് പതിവ്. അത് ചിലപ്പോൾ വസ്തുവാകാം, സ്വർണമാകാം, വാഹനം പോലെയുള്ളവയുമാകാം. ലൈഫ് ഇൻഷുറൻസ് പോളിസിയുപയോഗിച്ച് വായ്പയെടുക്കാൻ സാധിക്കുമോ? പറ്റുമെന്ന് തന്നെയാണ് ഉത്തരം. പോളിസി ഉടമകൾക്ക് അത്യാവശ്യ ഘട്ടത്തിൽ സാമ്പത്തിക സഹായം ഉറപ്പാക്കുന്നതിനുള്ള നീക്കത്തിന്റെ ഭാഗമായാണ് ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ അഥവ എൽഐസി ഇത്തരത്തിലൊരു പദ്ധതി അവതരിപ്പിച്ചിരിക്കുന്നത്. പരമ്പരാഗത ബാങ്കിംഗ് രീതികളിൽ നിന്നും മറ്റ് ധനകാര്യ സ്ഥാപനങ്ങളിൽ നിന്നും വായ്പ നേടുന്നതിൽ വെല്ലുവിളികൾ നേരിടുന്ന വ്യക്തികൾക്ക് സൗകര്യപ്രദമായ ഒരു പരിഹാരം എൽഐസി ഇതിലൂടെ വാഗ്ദാനം ചെയ്യുന്നു.

ഒരു എൽഐസി പോളിസിയുപയോഗിച്ച് ലോൺ നേടുക വളരെ എളുപ്പമാണ്. ഇവിടെ എൽഐസി പോളിസി ഉടമകൾ അവരുടെ പോളിസി തന്നെയാണ് ഈടായി നൽകുന്നത്. കുറഞ്ഞ ക്രെഡിറ്റ് സ്‌കോറുകളോ ബാങ്കുകളിൽ നിന്ന് വായ്പ ലഭിക്കാൻ പ്രയാസമോ ഉള്ളവർക്ക് ഇത് പ്രത്യേകിച്ചും പ്രയോജനകരമാണ്. എൽഐസിക്ക് പുറമെ, ലൈഫ് ഇൻഷുറൻസ് പോളിസികൾക്കെതിരെ വായ്പ നൽകുന്ന മറ്റ് വായ്പക്കാരും ഉണ്ടെന്നത് ശ്രദ്ധിക്കേണ്ടതാണ്.

18 വയസാണ് എൽഐസി പോളിസിയുപയോഗിച്ച് വായ്പയെടുക്കുന്നതിനുള്ള കുറഞ്ഞ പ്രായപരിധി. ഇയാൾക്ക് സാധുതയുള്ള ഒരു എൽഐസി പോളിസി ഉണ്ടായിരിക്കണം. ഇതോടൊപ്പം ആ പോളിസിക്ക് ഉറപ്പുള്ള സറണ്ടർ മൂല്യം ഉണ്ടായിരിക്കണമെന്നതും പ്രധാനമാണ്. അപേക്ഷകൻ കുറഞ്ഞത് മൂന്ന് വർഷത്തെ എൽഐസി പ്രീമിയം മുഴുവൻ അടച്ചിരിക്കണം. പലിശ നിരക്ക് അപേക്ഷകന്റെ പ്രൊഫൈലിനെ ആശ്രയിച്ചിരിക്കുന്നു, കൂടാതെ എൽഐസി എൻഡോവ്‌മെന്റ് പോളിസി ഉടമകൾക്ക് മാത്രമേ വായ്പ ലഭിക്കൂ.

വായ്പ തുക പോളിസിയുടെ സറണ്ടർ മൂല്യത്തിന്റെ മുൻകൂർ തുകയാണ്. എൽഐസി ഇൻഷുറൻസ് പോളിസി ഈടായി കണക്കാക്കുന്നു, വീഴ്ച വരുത്തിയാൽ ലോൺ തടഞ്ഞുവയ്ക്കാനും സാധിക്കും. എല്ലാ എൽഐസി പോളിസികൾക്കും ലോൺ ലഭിക്കണമെന്നുമില്ല. വായ്പ യോഗ്യത ലഭ്യമായ പോളിസിയെക്കുറിച്ച് അറിഞ്ഞിരിക്കണം. വായ്പ തുക പോളിസിയുടെ സറണ്ടർ മൂല്യത്തേക്കാൾ കൂടുതലാണെങ്കിൽ, എൽഐസിക്ക് പോളിസി അവസാനിപ്പിക്കാനും സാധിക്കും. ലോൺ പൂർണ്ണമായി തിരിച്ചടയ്ക്കുന്നതിന് മുമ്പ് ഇൻഷുറൻസ് പോളിസി കാലാവധി പൂർത്തിയാകുകയാണെങ്കിൽ, ആവശ്യമായ തുക എൽഐസിക്ക് കുറയ്ക്കാനാകും.