5 ലക്ഷം രൂപ വരെ പലിശ രഹിത വായ്പ നേടാം, കേന്ദ്രസർക്കാർ പദ്ധതിയുണ്ട്, ലാക്പതി ദീദി സ്കീമിൽ ചേരുന്നോ..?

രാജ്യത്ത് സ്ത്രീകളുടെ സാമൂഹികവും സാമ്പത്തികവുമായ ഉന്നമനത്തിനായി നിരവധി പദ്ധതികൾ കേന്ദ്രസർക്കാർ ആവിഷ്ക്കരിച്ചിട്ടുണ്ട്. സുകന്യ സമൃദ്ധി യോജന, നാഷണൽ സേവിംഗ്സ് സർട്ടിഫിക്കറ്റ് തുടങ്ങിയ പദ്ധതികൾ സ്ത്രീ സമൂഹത്തിന്‍റെ സാമ്പത്തിക സുരക്ഷിതത്വം ഉറപ്പുവരുത്തുന്നതിനുള്ള നിക്ഷേപ പദ്ധതികളാണ്. എന്നാൽ രാജ്യത്തെ സ്ത്രീകൾക്ക് സാമ്പത്തിക സഹായം നൽകുന്നതിനും നിരവധി പദ്ധതികളുണ്ട്. അതിൽ ഏറ്റവും പ്രധാനപ്പെട്ടതാണ് ലഖ്പതി ദീദി യോജന.

എന്താണ് ലഖ്പതി ദീദി യോജനയെന്നും പദ്ധതിയുടെ ഗുണങ്ങൾ എങ്ങനെ ലഭിക്കുമെന്നും നമുക്ക് വിശദമായി പരിശോധിക്കാം.

എന്താണ് ലഖ്പതി ദീദി സ്കീം..?

ലഖ്പതി ദീദി യോജന യഥാർത്ഥത്തിൽ ഒരു നൈപുണ്യ വികസന പരിശീലന പരിപാടിയാണ്. സ്ത്രീകൾക്കായി പ്രത്യേകം അവതരിപ്പിച്ച ഈ പദ്ധതിയിൽ, സർക്കാർ സ്ത്രീകൾക്ക് നൈപുണ്യ പരിശീലനം നൽകി സ്വയം തൊഴിലിന് യോഗ്യരാക്കുന്നു.

സ്ത്രീകൾക്ക് പ്ലംബിംഗ്, എൽഇഡി ബൾബ് നിമ്മാണം. ഡ്രോണുകൾ പ്രവർത്തിപ്പിക്കൽ അറ്റകുറ്റപ്പണികൾ ചെയ്യൽ തുടങ്ങി നിരവധി വിഭാഗങ്ങളിൽ പരിശീലനം ലഭിക്കും. സംസ്ഥാനങ്ങളിലെ സ്വയം സഹായ സംഘങ്ങൾ വഴിയാണ് ഈ പദ്ധതി നടപ്പിലാക്കുന്നത്.

2023 ഓഗസ്റ്റ് 15 നാണ് പദ്ധതി കേന്ദ്രസർക്കാർ ആരംഭിക്കുന്നത്. ഇതുവരെ ഏകദേശം 1 കോടി സ്ത്രീകൾ ലഖ്പതി ദീദി പദ്ധതിയുടെ ആനുകൂല്യങ്ങൾ നേടിയിട്ടുണ്ടെന്നാണ് സർക്കാർ വ്യക്തമാക്കുന്നത്.

യോഗ്യതകൾ എന്തൊക്കെ..?

കുടുംബത്തിൻ്റെ വാർഷിക വരുമാനം കുറഞ്ഞത് 1 ലക്ഷം രൂപയുള്ള സ്ത്രീകൾക്ക് ഈ പദ്ധതിയുടെ പ്രയോജനം നേടാം. 18 നും 50 നും ഇടയിലായിരിക്കണം പ്രായം.

സംസ്ഥാനത്തെ 'സ്വയം സഹായ സംഘങ്ങളിൽ' ചേരുകയാണ് ആദ്യം ചെയ്യേണ്ടത്. ബിസിനസ്സ് ആരംഭിക്കുന്നതിന് വായ്പ ലഭിക്കുന്നതിന്, ആവശ്യമായ രേഖകളും ബിസിനസ് പ്ലാനും നിങ്ങളുടെ പ്രാദേശിക സ്വയം സഹായ ഗ്രൂപ്പ് ഓഫീസിൽ സമർപ്പിക്കണം. ഇതിനുശേഷം, അപേക്ഷ അവലോകനം ചെയ്യുകയും അംഗീകരിക്കുകയും ചെയ്യുന്നു, തുടർന്ന് വായ്പയ്ക്കായി നിങ്ങളെ ബന്ധപ്പെടും.

എന്തൊക്കെ രേഖകൾ ആവശ്യമാണ്..?

ആധാർ കാർഡ്, പാൻ കാർഡ്, വരുമാന തെളിവ്, ബാങ്ക് പാസ്ബുക്ക് എന്നിവ കൂടാതെ, അപേക്ഷകൻ സാധുവായ മൊബൈൽ നമ്പറും പാസ്‌പോർട്ട് സൈസ് ഫോട്ടോയും നൽകണം.

ലഖ്പതി ദീദി പദ്ധതിയിൽ വലിയ നേട്ടങ്ങൾ

ലഖ്പതി ദീദി സ്കീമിൽ, നിങ്ങൾക്ക് ഒരു ബിസിനസ്സ് ആരംഭിക്കുന്നതിനുള്ള പരിശീലനവും മാർഗ്ഗനിർദ്ദേശവും നൽകുന്നു. ബിസിനസ്സ് തുടങ്ങുന്നത് മുതൽ വിപണിയിലെത്തുന്നത് വരെ സഹായം ലഭിക്കും. സ്കീം വഴി ബിസിനസ്സ് ആരംഭിക്കുന്നതിന് പലിശ രഹിത വായ്പ നൽകുന്നു. കുറഞ്ഞ ചെലവിൽ ഇൻഷുറൻസ് സൗകര്യവും ഏർപ്പെടുത്തിയിട്ടുണ്ട്.

എത്ര രൂപ വായ്പ ലഭിക്കും

ലഖ്പതി ദീദി യോജന പ്രകാരം സ്ത്രീകൾക്ക് സ്വയം തൊഴിൽ ആരംഭിക്കുന്നതിന് സർക്കാർ 1 മുതൽ 5 ലക്ഷം രൂപ വരെ സാമ്പത്തിക സഹായം നൽകുന്നുണ്ട്. തികച്ചും പലിശ രഹിതമാണ് വായ്പ എന്ന കാര്യം പ്രത്യേകം ഓർക്കണം.

ലഖ്പതി ദീദി യോജനയുടെ പ്രയോജനങ്ങൾ

1. എല്ലാ സ്ത്രീകൾക്കും പരിശീലനം: ഈ പദ്ധതി സ്ത്രീകൾക്ക് സമഗ്രമായ പരിശീലന അവസരങ്ങൾ ഉറപ്പാക്കുകയും അവരുടെ കഴിവുകൾ വർദ്ധിപ്പിക്കുകയും അവരെ സാമ്പത്തികമായി ശാക്തീകരിക്കുകയും ചെയ്യുന്നു.

2. കൃഷിക്ക് ഡ്രോൺ സൗകര്യം: ഗ്രാമീണ കാർഷിക മേഖല മെച്ചപ്പെടുത്തുന്നതിനും സ്ത്രീകളെ ശാക്തീകരിക്കുന്നതിനുമുള്ള സാങ്കേതിക മാറ്റത്തെ അടയാളപ്പെടുത്തിക്കൊണ്ട് കാർഷിക പ്രവർത്തനങ്ങൾക്കായി വനിതാ സ്വയം സഹായ സംഘങ്ങൾക്ക് ഡ്രോണുകൾ ലഭിക്കും. ഏകദേശം 15,000 വനിതാ സ്വയം സഹായ സംഘങ്ങൾ ഡ്രോൺ പ്രവർത്തനത്തിലും അറ്റകുറ്റപ്പണിയിലും പരിശീലനം നേടും.

3. സ്വയം പര്യാപ്തത: വായ്പാ സൗകര്യങ്ങൾ, തൊഴിലധിഷ്ഠിത പരിശീലനം, ഇൻഷുറൻസ് പരിരക്ഷ, ശാക്തീകരണം എന്നിവയുൾപ്പെടെയുള്ള കാര്യങ്ങളും സ്ത്രീകൾക്ക് പദ്ധതിയിലൂടെ ലഭിക്കുന്നു.